ونىڭ ءبىرى – وبلىستىق پەريناتالدى ورتالىق جانىنان قۇرىلعان «قامقورلىق» ەرتە ەمدەۋ ورتالىعى. ال, ەكىنشىسى – اۋتيزم جانە باسقا دا مەنتالدى بۇزىلۋلارى بار بالالارعا الەۋمەتتىك-مەديتسينالىق قىزمەت كورسەتۋگە ارنالعان كۇندىز جۇمىس ىستەيتىن ورتالىق. وبلىس اكىمى ءباسپاسوز قىزمەتىنىڭ حابارلاۋىنشا, بۇل يگى ىسكە الەۋمەتتىك مەكەمەلەر, وبلىس اكىمدىگىنىڭ «قامقورلىق» كورپوراتيۆتىك قورى, «قازاقستان حالقىنا» قوعامدىق قورى, نازارباەۆ قورى جانە «Samruk Kazyna Trust» الەۋمەتتىك جوبالاردى دامىتۋ قولداۋ كورسەتكەن. ەكى الەۋمەتتىك نىسان دا دارىگەرلەردىڭ مەديتسينالىق قورىتىندىسى جانە مەديكو-الەۋمەتتىك ساراپتامانىڭ جولداماسى بويىنشا تەگىن قىزمەت كورسەتەدى. وسى كۇنى ورتالىقتاردىڭ اشىلۋ سالتاناتىنا قاتىسقان وبلىس اكىمىنىڭ ورىنباسارى رۋستام ءالي قوعامدىق قورلاردىڭ وكىلدەرىنە العىس ايتتى.
وبلىستىق پەريناتالدى ورتالىقتىڭ ديرەكتورى قانات جۇماشەۆتىڭ ايتۋىنشا, وبلىستىق پەريناتالدىق ورتالىقتىڭ جانىنان نەيرو-ورتوپەديالىق بۇزىلۋلارى جانە ولاردىڭ دامۋ قاۋپى بار بالالارعا ەم جۇرگىزۋ مەكەمەسىن اشۋ ءىسى قولعا الىنعان. اتاپ ايتقاندا, تسەرەبرالدى پاراليچ, مەرزىمىنەن ەرتە تۋعان سابيلەر, داۋن سيندرومى, ورتالىق نەرۆ جۇيەسى زاقىمدانعان باسقا دا سىرقاتتارى بار بالالار ەم الا الادى.
ء«تۇرلى ەرەكشەلىكپەن تۋعان بالالارعا ۋاقىتىندا ەم جاساسا, دەنساۋلىعىن ەداۋىر جاقسارتۋعا مۇمكىندىك بار. ال كەش جۇرگىزىلگەن ەمنىڭ ناتيجە بەرۋى قيىن. سوندىقتان ەرتە باستان ەمدەيتىن بۇل ورتالىقتىڭ جۇمىسى ەرەكشە قاجەتتىلىگى بار بالالاردىڭ دەنساۋلىعىن ساۋىقتىرۋعا وڭ ىقپالىن تيگىزەدى دەپ ويلايمىن», دەيدى ق.جۇماشەۆ.
مۇندا 3 ايدان 3 جاسقا دەيىنگى بالالاردىڭ دەنساۋلىعى قاداعالانادى. ورتالىق ايىنا 50 بالا قابىلداي الادى. بالالاردىڭ ءار 2-3 اي سايىن كەلىپ, ەم قابىلداۋىنا جاعداي جاسالعان. سەبەبى ەرتە باستالعان ەم ۇزدىكسىز جۇرگىزۋدى قاجەت ەتەدى. ورايى كەلگەندە, ەمدەۋ ورنىندا دياگنوستيكالىق اۋديولوگيالىق تەكسەرۋ جانە سوڭعى ۇلگىدەگى ميدىڭ ەلەكترو ەنتسەفالوگرامماسى بار ەكەنىن ايتا كەتكەنىمىز ءلازىم. مۇندا ارنايى مەديتسينالىق مامانداردان نەۆرولوگ, رەابيليتولوگ, لفك دارىگەرى, پەدياتر, بالالار ورتوپەدى, سۋردولوگ دارىگەر, پەداگوگيكالىق قۇرامنان دەفەكتولوگ, لوگوپەد, ەرگوتەراپەۆت, بالالار پسيحولوگى ماماندارى جۇمىس ىستەيدى.
وسى كۇنى اۋتيزم جانە باسقا دا مەنتالدى بۇزىلۋلارى بار بالالارعا الەۋمەتتىك-مەديتسينالىق قىزمەت كورسەتۋگە ارنالعان كۇندىزگى ورتالىق اشىلعانىن ايتتىق. بۇل ورتالىق 2 قاباتتى عيماراتتا ورنالاسقان. وسى قولايلى عيمارات جەرگىلىكتى بيۋدجەت ەسەبىنەن ساتىپ الىنىپ, وعان جالپى سوماسى 200 ملن تەڭگەگە كۇردەلى جوندەۋ جۇرگىزىلگەن. ال قاجەتتى جابدىقتاردى قورلار تۇگەندەگەن. ورتالىق 125 ورىنعا شاقتالعان. اۋلادا بالالارعا ارنالعان ۆولەيبول, فۋتبول الاڭدارى بار. سونداي-اق ورتالىق سەنسورلىق, ەمدىك دەنە شىنىقتىرۋ كابينەتى, دەفەكتولوگيا, مۋزىكا, فيزيوتەراپيا, ماسساج, ەم-شارا بولمەسى, روبوتوتەحنيكا, لوگوپەد, كونفەرەنتسيا زالى, پسيحولوگ كابينەتى, ەڭبەككە باۋلۋ, قىش قۇمىرا جاساۋ بولمەلەرىمەن قامتىلعان.
جەتىسۋ وبلىسى
