ءباسپاسوز تۋرىندا الدىمەن ۇلتتىق نەيروحيرۋرگيا ورتالىعىنىڭ مەديتسينالىق ديرەكتورى اسىلبەك قاليەۆ ورتالىقتاعى مەديتسينالىق قىزمەتتەر تۋرالى, پاتسيەنتتەردى قابىلداۋ الگوريتمى مەن وزىق تەحنولوگيالاردىڭ كومەگىمەن جاسالاتىن وپەراتسيالار جايىندا تارقاتىپ ايتىپ بەردى.
– بىلتىردىڭ وزىندە ءبىزدىڭ ورتالىقتا ءمامس بويىنشا 4 مىڭنان استام پاتسيەنت ەمدەلدى. ونىڭ ىشىندە جوعارى تەحنولوگيالىق مەديتسينالىق قىزمەتتەردى قولدانا وتىرىپ جاسالعان وپەراتسيالار بار. سونداي-اق گامما-پىشاق تەحنولوگياسى بويىنشا وپەراتسيا جۇرگىزۋدىڭ تيىمدىلىگىن اتاپ وتكىم كەلەدى. وسى قۇرىلعى ىسىكتەردى, تامىرلى جانە فۋنكتسيونالدى مي اۋرۋلارىن ترەپاناتسياسىز جانە ناركوزسىز ەمدەۋگە مۇمكىندىك بەرەدى. مەديتسينالىق كومەكتىڭ بۇل ءتۇرى 2021 جىلى ءمامس بويىنشا كورسەتىلەتىن قىزمەتتەردىڭ تىزىمىنە ەنگەن. بىلتىر ءبىز وسىنداي 460 وپەراتسيا جاسادىق, دەيدى ا. قاليەۆ.
ورتالىقتىڭ تاعى ءبىر ۇلكەن باعىتى – ومىرتقا مەن ج ۇلىن اۋرۋلارىن حيرۋرگيالىق ەمدەۋگە قاتىستى. ءتىپتى, مامانداندىرىلعان بولىمشەنىڭ دارىگەرلەرى وزدىگىنەن ءجۇرىپ-تۇرا الماي, جىگەرى قۇم بولىپ, ءۇمىتىن ۇزگەن ناۋقاستاردىڭ اياققا تۇرۋىنا مۇمكىندىك بەرەتىن ومىرتقاعا جاسالاتىن رەكونسترۋكتيۆتى وپەراتسيالاردى دا يگەرگەن. وسى جاڭاشىلدىقتاردىڭ ارقاسىندا 12 000 ناۋقاسقا وپەراتسيا جاسالعان. دارىگەرلەر ەپيلەپسيانى حيرۋرگيالىق ەمدەۋدىڭ جاڭاشىل ادىستەرىن مەڭگەرگەن. سول سەكىلدى بالالار نەيروحيرۋرگياسى بولىمشەسىندە جاڭا تۋعان نارەستەلەرگە مي پوتولوگياسىن حيرۋرگيالىق ەمدەۋ ءادىس-تاسىلدەرى قولدانىلادى. وسى بولىمشەدە كوبىنە-كوپ ەندوسكوپيالىق وپەراتسيالارعا باسىمدىق بەرىلەدى ەكەن. وسى كۇنى الەۋمەتتىك مەديتسينالىق ساقتاندىرۋ قورىنىڭ زاڭدى جانە جەكە تۇلعالارمەن جۇمىس دەپارتامەنتىنىڭ ديرەكتورى زابيرا ورازاليەۆا ورتالىقتا ءمامس شەڭبەرىندە ىسكە اسقان جۇمىستارعا توقتالدى.
– قازىر بىزدە ءمامس-ءتىڭ ءتاريفىن كوتەرۋ ماسەلەسى تۋىنداپ وتىرعان جوق. ال نەيروحيرۋرگيا ورتالىعى جايىندا ايتار بولساق, مۇندا مەديتسينالىق ساقتاندىرۋ جارنالارىن ۋاقتىلى تولەپ, ساقتاندىرىلعان ازاماتتار جوسپارلى تۇردە ءوزىنىڭ تىركەلگەن ەمحاناسىنان جولداما الىپ, پورتالعا كەزەككە تۇرىپ, وزىنە قاجەتتى مەديتسينالىق كومەكتى الۋعا مۇمكىندىگى بار. بىلتىرعى ستاتيستيكاعا زەر سالساق, 2000-عا جۋىق جوعارى تەحنولوگيالىق مەديتسينالىق قىزمەت كورسەتىلگەن, ونىڭ 1,5 مىڭى ءمامس جۇيەسىندە جاسالىپ وتىر. بيىل دا وسى باعىتتاعى جۇمىستار ۇزىلمەي, ۇيلەسىمدى جالعاسىپ كەلەدى. بيىل رەسمي تىركەلگەن جۇمىسى جوق ازاماتتار ساقتاندىرۋعا اي سايىن 3 500 تەڭگە تولەسە, ال جۇمىس بەرۋشىلەر ءار جۇمىسشى تابىسىنىڭ 2% تولەپ وتىرادى. مۇندا جۇمىسشىلارعا اسا سالماق تۇسپەيدى. وزىنە-ءوزى تولەيتىندەردىڭ سومماسى ەڭ تومەنگى مولشەردە بەلگىلەنگەن. ولاردىڭ 12 ايدىڭ تولەمىن بىردەن جاساۋعا دا مۇمكىندىگى بار. بۇل دەگەنىڭىز ساقتاندىرۋ قورىنا 2,3 جىل تولەمەگەن ازاماتتار الدىن الا 12 ايعا تولەم جاساپ, سول ارالىقتا ساقتاندىرۋ مارتەبەسىنە يە بولادى. سوعان ساي جىل بويى وزىنە تيەسىلى مەديتسينالىق كومەكتى الىپ وتىرادى. بۇگىندە ەلدە 3,5 ملن-عا جۋىق ازامات ساقتاندىرىلماعان. بۇل ستاتيستيكا كۇندەلىكتى جاڭارىپ تۇرادى, – دەيدى ول.
بۇدان ءارى ورتالىقتىڭ راديولوگيا جانە راديوحيرۋرگيا بولىمشەسىنە بارىپ, جۇمىس بارىسىن باقىلادىق. سونىڭ ىشىندە گامما-پىشاق اپپاراتىنىڭ جۇمىس ىستەۋ ۇدەرىسىمەن تانىستىق. راديوحيرۋرگيالىق قوندىرعىدا راديواكتيۆتى ساۋلەلەر ىسىكتىڭ ايماعىندا تۇيىسەدى. ءسويتىپ, ىسىك جاسۋشالارىنىڭ دنق-سىن بۇزادى. مۇنداي وپەراتسيادا ميدىڭ ساۋ تىندەرى جانە ناۋقاستىڭ دەنەسى تۇتاس ساۋلەلەنبەيدى. ءارى ناۋقاسقا اۋىرلىق سالمايدى. سول ءۇشىن دە گامما-پىشاق راديوحيرۋرگيالىق ەمدەۋدىڭ «التىن ستاندارتى» سانالادى. ءبىز گامما-پىشاق قۇرىلعىسى ورنالاسقان كابينەتكە وتكەندە ساۋلەلىك وپەراتسيادان جاڭا شىققان پاتسيەنتپەن پىكىرلەسۋدىڭ ءساتى تۇسكەن ەدى. ءمامس جۇيەسىندە ساقتاندىرىلعان وسكەمەن قالاسىنىڭ تۇرعىنى ورتالىققا ساناۋلى كۇندە-اق كەلگەنىن ايتتى.
– وسكەمەننەن كەلدىم. ەكى جىلدان بەرى وسى اۋرۋمەن الىسىپ ءجۇرمىن. وسكەمەندەگى اۋرۋحانادا دارىگەردەن كەڭەس العاننان كەيىن نەبارى 5 كۇننىڭ ىشىندە مەديتسينالىق ساراپتامالاردى تۇگەندەپ استاناداعى وسى ورتالىققا كۆوتا ارقىلى بىردەن كەلدىم. دياگنوزىمدى ايتار بولسام, ميداعى ىسىك مەتاستاز بەرىپتى. وسىدان كەيىن دەنساۋلىعىمىز جاقسارىپ, ءبارى جاقسى بولاتىنىنا ىشتەي سەنەمىز. ءوزىمدى جايلى سەزىنىپ تۇرمىن. مەديتسينالىق ساقتاندىرۋ جۇيەسىنىڭ ارقاسىندا تەگىن ەم الدىم. ەندى بۇگىن وسكەمەنگە قايتامىز, – دەپ ساۋىعىپ كەتەرىنە سەنەتىنىن ايتتى ول. ءبىز دە الىستان ارقالانىپ كەلگەن اناعا ەم شيپالى بولسىن دەستىك.
