«اۋىل اماناتى» جوباسى بويىنشا باياۋ قيمىلداپ, كوش سوڭىندا قالعان اۋدان اكىمدەرىنىڭ, جاۋاپتى باسقارمالاردىڭ جۇمىسىن سىنعا العان وبلىس اكىمى دارحان ساتىبالدى اپپاراتتىڭ اپتالىق وتىرىسىندا قاراجاتتىڭ ءتيىمدى جۇمسالۋىن تاپسىردى. «اۋىل اماناتى» جوباسىن ىسكە اسىرۋدا جەكە قوسالقى شارۋاشىلىقتاردى كووپەراتيۆتەر نەگىزىندە دامىتۋعا باسىمدىق بەرىلەدى. جوبانى جۇزەگە اسىرۋعا بارلىق اۋىلدىق وكرۋگتەردە سكرينينگ جۇمىستارى جۇرگىزىلىپ, ءبىرىنشى كەزەكتە جوباعا قاتىساتىن 16 اۋداننان 32 اۋىلدىق وكرۋگ, 44 كووپەراتيۆ انىقتالىپ, الەۋەتتى نەسيە الۋشىلاردىڭ ءتىزىمى جاساقتالدى. بۇگىندە 425 جوبا قابىلدانىپ, 1,1 ملرد تەڭگەگە 236 جوبا ماقۇلدانعان, قارجىلاندىرۋ جۇمىستارى جۇرگىزىلۋدە. نەسيە قارجىسىن تاراتۋشى رەتىندە سەنىم بىلدىرگەن وكىل دەپ «تۇركىستان اكك» اق تانىلدى. جالپى قۇنى 7,3 ملرد تەڭگە بولاتىن 847 ءوتىنىم قابىلدانىپ, ونىڭ ىشىندە 312 ءوتىنىمىنىڭ, ياعني 2,6 ملرد تەڭگەنىڭ قۇجاتتارى ماقۇلداۋ ساتىسىندا. جوبا اياسىندا جالپى 4 000 بىرلىككە جۋىق ميكروكرەديت بەرىلەدى. ناتيجەسىندە, 5 200 جاڭا جۇمىس ورىنى قۇرىلىپ, وڭىردەگى 8 451 ااك الۋشى وتباسى سانىن 30%-عا تومەندەتۋ جوسپارلانۋدا. جوبانى قارجىلاندىرۋعا رەسپۋبليكالىق بيۋدجەتتەن جىل باسىندا 11 ملرد تەڭگە, ناۋرىز ايىندا رەسپۋبليكالىق بيۋدجەتتى ناقتىلاۋدا قوسىمشا 8,9 ملرد تەڭگە قاراستىرىلىپ, جالپى 19,8 ملرد تەڭگە ءبولىندى. نەسيەلەندىرۋدىڭ وسىمدىك, مال, قۇس, بالىق شارۋاشىلىقتارىن دامىتۋ, كووپەراتيۆتەردى جابدىقتاۋ, تۇرعىنداردىڭ ءوز كاسىبىن اشۋ سىندى 6 باعىتى تاڭدالعان. سوعان سايكەس 90% ءوتىنىم مال شارۋاشىلىعى سالاسىن دامىتۋ باعىتىندا وتكىزىلگەن نەمەسە 425 جوبادان 380 جوبا مال شارۋاشىلىعى, 40 جوبا ەگىن شارۋاشىلىعى, 5 جوبا بالىق شارۋاشىلىعىن دامىتۋعا باعىتتالىپ وتىر.
سونداي-اق وڭىردە ينۆەستيتسيالىق جوبالاردىڭ جۇزەگە اسىرىلۋى قاتاڭ باقىلاۋعا الىنعان. ينۆەستورلاردىڭ جەرگىلىكتى اكىمدىكتەرگە قويار تالاپتارى دا جوق ەمەس. مىسالى, بايدىبەك اۋدانىندا مىرىش ءوندىرۋ جانە بايىتۋ جوباسىن بىرلەسىپ ىسكە اسىرۋ ءۇشىن «United gold» جشس تۇركيانىڭ «Tekşan Madencilik» كومپانياسىمەن كەلىسىمگە كەلگەن. يندۋستريا جانە ينفراقۇرىلىمدىق دامۋ مينيسترلىگى مەن جوبا باستاماشىسى اراسىندا «بەساعاش-1» كەن ورنىن بارلاۋعا كەلىسىمشارت بار. جوبانىڭ جالپى قۇنى – 1,8 ملرد تەڭگە جۇزەگە اسسا, 200 ادام جۇمىسپەن قامتىلادى. بۇل ورايدا ينۆەستور 4 شاقىرىم جەرگە ەلەكتر جەلىسىن تارتۋ قاجەتتىگىن ايتىپ وتىر. ال «Ernur» جشس جۇمىرتقا, تاۋارلىق قۇس ەتى جانە شۇجىق ونىمدەرىن وندىرەتىن قۇس فابريكاسىن سالۋعا بايدىبەك اۋدانىندا جەر ۋچاسكەلەرى قاراستىرىلىپ جاتىر. 2023-2026 جىلدارى ارالىعىندا جۇزەگە اساتىن جوبانىڭ قۇنى – 15 ملرد تەڭگە, 50 ادام جۇمىسپەن قامتىلماق. جوبانى ىسكە اسىرۋ ءۇشىن 40 گەكتار جەر مەن ەلەكتر قۋاتى قاجەت. ينۆەستيتسيالىق شتاب وتىرىسىندا «SIPtechnology» جشس تۇركىستان قالاسىنداعى ارنايى ەكونوميكالىق ايماقتا كوتتەدج قالاشىعىن سالۋعا نيەتتى ەكەنىن بىلدىرسە, وبلىس ورتالىعىندا «Chery» اۆتوكولىك ماركاسىنىڭ ديلەرلىك ورتالىعىن سالۋ ماسەلەسى دە كوتەرىلدى. «ساياحات موتورس – تۇركىستان» جشس وكىلىنىڭ ايتۋىنشا, قۇنى 1 ملرد تەڭگە بولاتىن جوبا جۇزەگە اسسا, اۆتوموبيل ورتالىعىندا 100 ادام جۇمىسپەن قامتىلماق. وتىرار اۋدانىندا جۇگەرىنى تەرەڭ وڭدەپ, بيوەتانول شىعارۋ جوباسى جۇزەگە اسىرىلماق. «Otyrar Bio Tech» جشس اتقاراتىن جۇگەرىنى تەرەڭ وڭدەۋ جوباسىنىڭ قۇنى – 72 ملرد تەڭگە. 2025 جىلعا قاراي اشىلاتىن زاۋىتتا 154 ادام جۇمىسپەن قامتىلادى دەپ كۇتىلۋدە. قازىر ۇيىمداستىرۋ جۇمىستارى جۇرگىزىلىپ جاتىر. ال سايرام اۋدانىندا «Capable group» مۇگەدەكتەر قوعامى» جىلىنا 100 ملن دانا جورگەك شىعاراتىن تسەحىن ىسكە قوسقان. قازىرگى ۋاقىتتا جوبانىڭ باستاماشىسى قوسىمشا 3 ءوندىرىس جەلىسىن ىسكە قوسۋمەن وندىرىستىك قۋاتتىلىقتى كەڭەيتۋدى كوزدەپ وتىر. بۇل رەتتە جوبانىڭ باستاماشىسى 3 ملرد تەڭگەگە جابدىق ساتىپ الۋ ماسەلەسى بويىنشا «ونەركاسىپتى دامىتۋ قورى» اق ارقىلى قارجىلاندىرۋعا قاتىستى كەلىسسوزدەر باستاعان. جالپى قۇنى – 8 ملرد تەڭگە. جوبانىڭ جىلدىق قۋاتى – 350 ملن دانا. اتالعان جوبانى جۇزەگە اسىرۋ بارىسىنداعى ينفراقۇرىلىمعا قاتىستى ماسەلەلەر دە اشىق ايتىلىپ, ۇسىنىستار بەرىلدى. «بەس قارا» جشس سارىاعاش اۋدانىندا 4 ءىرى جوبانى جۇزەگە اسىرۋعا نيەتتى. قۇس ەتىن دايىنداۋ جانە سويۋ بەكەتى جوباسىنىڭ قۇنى – 700 ملن تەڭگە, 25 ادام جۇمىسپەن قامتىلادى. قازىرگى تاڭدا جاڭا قۇرىلعىلار سىناقتان وتكىزىلۋدە. ال ءىرى قارا مال ءۇشىن بورداقىلاۋ الاڭىن 2 500 باسقا كەڭەيتۋ جوباسى بيىل كۇزدە جۇزەگە اسپاق. جوبا بويىنشا جەر انىقتالىپ, قۇرىلىسى باستالعان. اتالعان ينۆەستور مۇنىمەن توقتاماي, 20 مىڭ باس ۇساق مالعا ارنالعان بورداقىلاۋ الاڭىن دا سالماق. جوبا قۇنى – 500 ملن تەڭگە. جوبا 2024 جىلعا قاراي جۇزەگە اسادى. سونىمەن بىرگە «بەس قارا» جشس ارنايى مال سويۋ بەكەتىن اشىپ, ەتتى شەتەلگە ەكسپورتتاماق. «ەت اگرو-مانكەنت» كومپانياسى سايرام اۋدانىنان 5000 باسقا ارنالعان بورداقىلاۋ الاڭىن, ەتتى تەرەڭ وڭدەۋ كەشەنىن, سويۋ بەكەتىن سالۋدى قولعا الىپ وتىر. جوبا جۇزەگە اسقاندا جاڭا 100 جۇمىس ورنى اشىلادى. جەر, نەسيە جانە گازبەن قامتۋ ماسەلەسى بار. بۇل ورايدا جاڭا جوبالار, ىزدەنىستەر از ەكەنىن ايتقان وبلىس اكىمى يندۋستريالدى ايماقتاردىڭ بارىنە رەۆيزيا جاساپ, ماسەلەلەردى زەردەلەۋدى, ينۆەستورلارعا جاعداي جاساپ, كاسىپورىنداردى كوبەيتۋدى تاپسىردى.
تۇركىستان وبلىسى
