وڭىرگە ىسساپارمەن كەلگەن ىشكى ىستەر ءمينيسترى مارات احمەتجانوۆ تۇرعىندارمەن كەزدەسۋدە تۇجىرىمدامادا ازاماتتاردىڭ سۇرانىسى ەسكەرىلىپ, قۇقىق بۇزۋشىلىقتار پروفيلاكتيكاسى بويىنشا باسقا دا مەملەكەتتىك ورگانداردىڭ جاۋاپكەرشىلىگى بەكىتىلەتىنىن ايتتى. جۇرتتى الاڭداتاتىن نەگىزگى ماسەلەلەردىڭ ءبىرى – تۇرمىستاعى زورلىق-زومبىلىق. سوڭعى 5 جىلدا مۇنداي فاكتىلەر ەل بويىنشا 3 ەسە وسكەن. 60 پايىز جاعدايدا جابىرلەنۋشىلەر پوليتسياعا ارىز جازۋدان باس تارتادى, سول سەبەپتى ء«ۇي تيراندارىن» جاۋاپقا تارتۋ قيىنعا سوعاتىن. ەندى زاڭعا تۇزەتۋلەر ەنگىزىلەدى, ياعني ء«وتىنىش بەرۋ» فورماتىنان «انىقتاۋ» فورماتىنا كوشۋ زاڭ بۇزعان ادامدى ارىزسىز-اق جاۋاپقا تارتۋعا مۇمكىندىك بەرەدى. سونداي-اق مينيستر قىلمىستاردىڭ باسىم كوپشىلىگى ماس كۇيدەگى ادامدارمەن جاسالاتىنىن ايتتى. بەس جىلدا ماس قىلمىسكەرلەردىڭ قولىنان 2 360 ادام قازا بولعان.
وڭىردە ىشىمدىكتەن باس تارتقان اۋىلدار دا بار. ەلىمىزدەگى 380 اۋىلدا 5 جىل ىشىندە بىردە-ءبىر قىلمىس جاسالماعان. ونىڭ ۇشەۋى – تورەارىق, جۋسانساي, اققويلى اۋىلدارى تۇركىستان وبلىسىندا. ەسىرتكى قىلمىسى وڭىردە الاڭدارلىق جاعدايدا. وبلىستا بيىل 111 كيلو ەسىرتكى تاركىلەنگەن. بۇل 21 مىڭ ءبىر رەتتىك دوزاعا تەڭ. ونىڭ قارا نارىقتاعى قۇنى 327 ملن تەڭگەنى قۇرايدى. سونداي-اق وبلىس بويىنشا 5 اي ىشىندە 149 ينتەرنەت-الاياقتىق قىلمىسى, 455 ۇرلىق جانە 88 مال ۇرلىعى جاسالعان.
تۇركىستان وبلىسىندا 21 مىڭ بەينەباقىلاۋ كامەراسى بار. وسى قۇرىلعىلاردىڭ كومەگىمەن بيىل 65 قىلمىس اشىلىپ, 36 مىڭ اكىمشىلىك قۇقىق بۇزۋشىلىقتىڭ جولى كەسىلىپتى. ايماقتىڭ قوعامدىق جەرلەرىندە 12 دابىل باتىرماسى قويىلعان. «قورعاۋ» جۇيەسى ىسكە قوسىلعان ءبىر جىلدىڭ ىشىندە وبلىستا 341 قاۋىپتى جۇرگىزۋشى كۋالىگىنەن ايىرىلىپ, جالعان مەملەكەتتىك نومىرمەن جۇرگەن 28 اۆتوكولىك انىقتالعان. بۇل ورايدا مينيستر جەرگىلىكتى اتقارۋشى ورگانداردى جول ينفراقۇرىلىمىنا, جول بەلگىلەرىنىڭ ورناتىلۋىنا نازار اۋدارۋعا شاقىردى. تۇركىستان وبلىسى پوليتسيا دەپارتامەنتىنىڭ باستىعى مۇرات قابدەنوۆتىڭ ايتۋىنشا, وتكەن جىلى پوليتسيا قىزمەتكەرلەرىنە 252 جاڭا كولىك تابىستالسا, بيىل تاعى دا 30 اۆتوكولىك الىندى. وبلىس اۋماعىندا جالپى 12 ستاتسيونارلىق پوليتسيا بەكەتى ورناتىلعان. پرەزيدەنتتىڭ پوليتسيانى سەرۆيستىك مودەلگە كوشىرۋ تۋرالى تاپسىرماسىنا سايكەس 2021 جىلدان باستاپ وبلىستا سالاارالىق توپتار قۇرىلىپ, جۇمىس اتقارىپ كەلەدى. قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ تۇركىستان وبلىسى بويىنشا باسقارماسىنىڭ مالىمەتىنشە, العاشقى توقساندا قىلمىستىق قۇقىق بۇزۋشىلىقتاردىڭ تىركەلۋ سانى 12 پايىزعا تومەندەگەن. الايدا قىلمىستىڭ تىركەلۋى وتىرار اۋدانىندا – 42,9, سارىاعاشتا – 16,9, تولەبيدە – 13,6, جەتىسايدا 7,3 پايىزعا وسكەن. كامەلەتكە تولماعاندارمەن جاسالعان قىلمىس سانى بىرقاتار اۋداندا ءوسىم كورسەتىپ وتىر. پوليتسيا دەپارتامەنتىنىڭ مالىمەتىنشە, جالپى قابىلدانىپ جاتقان شارالاردىڭ ناتيجەسىندە وڭىردە اسا اۋىر جانە اۋىر قىلمىستاردىڭ سانى –14,3, اۋىر قىلمىستار – 15,1, ورتا جانە اۋىر ەمەس قىلمىستار 8,1 پايىزعا تومەندەگەن. سونداي-اق قاساقانا كىسى ءولتىرۋ, دەنساۋلىققا اۋىر زيان كەلتىرۋ, زورلاۋ, قاراقشىلىق شابۋىل جاساۋ, توناۋ, بۇزاقىلىق پەن ەسىرتكى قىلمىستارى بويىنشا اشىلىم 100%-دى قۇراعان. قوعامدىق ورىندا جاسالعان قىلمىستار 28%-عا تومەندەگەن. وبلىستا جول-كولىك وقيعالار سانى 4,5%-عا, جاراقات العاندار سانى 16,8 پايىزعا تومەندەگەن, ال جول اپاتتارىنان قازا بولعاندار سانى 66 پايىزعا وسكەن. ءۇش ايدا 150 مىڭعا جۋىق اكىمشىلىك قۇقىق بۇزۋشىلىق انىقتالىپ, 2 ملرد تەڭگەگە جۋىق ايىپپۇل سالىنعان.
ايتا كەتەلىك, ىشكى ىستەر ءمينيسترى مارات احمەتجانوۆ وبلىستىق پوليتسيا دەپارتامەنتى جاڭا عيماراتىنىڭ اشىلۋ راسىمىنە قاتىسىپ, كوپقاباتتى نىساندى ارالاپ شىقتى. جاڭا عيماراتتا ءتارتىپ ساقشىلارىنىڭ الاڭسىز جۇمىس ىستەۋىنە قاجەتتى قۇرال-جابدىقتارمەن قامتاماسىز ەتىلىپ, بارلىق جاعداي جاسالعان. ودان بولەك پوليتسيا دەپارتامەنتىنە تيەسىلى سوڭعى زاماناۋي ۇلگىدەگى كولىكتەر ءموبيلدى كەشەندەر جانە قارۋ-جاراقتار تانىستىرىلدى. جاڭا عيماراتتا سوڭعى ۇلگىدەگى 126 مونيتورى بار جەدەل باسقارۋ ورتالىعى ورنالاسقان. بۇل ورتالىق ارقىلى وبلىستاعى كوشەلەر مەن جولدار, بارلىق ءبىلىم وشاقتارى تاۋلىك بويى قاداعالانادى.
تۇركىستان وبلىسى
