وسىدان ءۇش جىل بۇرىن كومپانيا «Saumal» جانە «Saubota» برەندتەرىن قىتايدىڭ گانسۋ پروۆينتسياسىنداعى لانچجوۋ قالاسىنا ەكسپورتتاۋدى باستاعانى ءمالىم. ەندىگى مەجە – بىرىككەن اراب امىرلىگى. نەمىس تەحنولوگياسىمەن وندىرىلەتىن ءونىم – مۇزداتىلعان, كەپتىرىلگەن قالىپتا.
وساكاروۆ اۋدانىنىڭ جانسارى اۋىلدىق وكرۋگىندەگى فەرما بۇگىندە ءوندىرىسىن ۇلعايتقان. نارىق تا كەڭىپ كەلەدى. العاشقىدا 4 مىڭ توننا ءونىم ەكسپورتتاۋدى باستاعان كومپانيا قازىر كولەمىن ارتتىرعان. مال باسى دا وسكەنىن اتاپ وتكەن ءلازىم. نەگىزگى ونىممەن قاتار, الداعى ۋاقىتتا وسىمدىك شارۋاشىلىعىن ورىستەتۋدى دە كوزدەپ وتىر. ءونىم الىناتىن جىلقىنىڭ تۇقىمى فەرماداعى – قازاقى جىلقىدان.
– فەرمادا قازاقى تۇقىمدى جىلقى سانى 1500-دەن 2300-گە دەيىن ءوستى. بيىل مۇزداتىلعان, كەپتىرىلگەن بيە ءسۇتىن ءوندىرۋدى 6 مىڭ توننادان 10 مىڭ تونناعا دەيىن كوبەيتەمىز. ساتۋ نارىعىنىڭ اياسى دا كەڭىپ كەلەدى. قازىر دۋبايدا ساتىپ الۋشىمەن كەلىسسوز ءجۇرىپ جاتىر. كەلەشەكتە وسىمدىك شارۋاشىلىعىن دامىتامىز. بيىل 12 مىڭ گەكتار جەرگە تۇقىم سەبىلدى. وعان قوسا جاڭا زاماناۋي تەحنيكا ساتىپ الىندى. كەلەسى جىلى ەگىس القاپتارىن 15 مىڭ گەكتارعا دەيىن ۇلعايتۋ, سۋارمالى جەرلەردى دامىتۋ باعدارلاماسىن باستاۋ جوسپارىمىزدا بار. ينۆەستيتسيا شامامەن 2,5 ملرد تەڭگە, – دەدى «ەۋرازيا ينۆەست لتد» جشس قۇرىلتايشىسى يۆان گەورگيادي.
بۇگىنگى تاڭدا كاسىپورىندا ەڭبەك ەتەتىن ادامنىڭ سانى جۇزدەن استام. ءوندىرىستىڭ ودان ءارى ۇلعايۋى جاڭا جۇمىس ورىندارىن قامتاماسىز ەتەدى. ساۋىن جۇيەسى تولىقتاي اۆتوماتتاندىرىلعان. ساۋىلعان ءسۇت بىردەن وڭدەۋگە جونەلتىلەدى. سوندىقتان دا ونىڭ قۇرامىنداعى بارشا پايدالى قاسيەتتەرى ساقتالادى دەيدى ءونىم وندىرۋشىلەر.
قاراعاندى
