قوناقتار ءبىرىنشى كۇنى ەندوسكوپياداعى ماسەلەلەر تۋراسىندا باياندادى. ەكىنشى كۇنى ۇلتتىق عىلىمي ونكولوگيا ورتالىعىنىڭ ساراپتامالىق ەندوسكوپيا وپەراتسيالىق ورتالىعىندا دارىگەرلەر تىكەلەي ەفيردە ەندوسكوپيالىق وپەراتسيالاردىڭ بارىسىن ءتۇسىندىردى. ياعني فورۋمعا كەلگەن قاۋىم وپەراتسيا زالىنداعى ەندوسكوپيالىق وپەراتسيانىڭ بارىسىن باقىلادى. ول قوناقتاردىڭ اراسىندا قىرعىزستان, وزبەكستان, ازەربايجان, تاجىكستان, موڭعوليا, ۋكراينا, تۇركيا, رەسەي, وڭتۇستىك كورەيا جانە جاپونيادان كەلگەن جانە تىكەلەي ەفيردە قوسىلعان دارىگەرلەر بولدى. ولار ىشەك قابىنۋىنىڭ, اسقازان-ىشەك جولدارىنىڭ ىسىككە دەيىنگى جانە ىسىككە دەيىنگى پاتولوگياسىنىڭ ەندوسكوپيالىق دياگنوستيكاسىن جانە گەپاتوبيليارلى ايماق پاتولوگياسىن ەمدەۋ ادىستەرى, جەدەل ەندوسكوپيا, ينتەرۆەنتسيالىق برونحولوگيا تاقىرىبىنا كوبىرەك توقتالدى.
دەنساۋلىق ساقتاۋ مينيسترلىگىنىڭ قولداۋىمەن ۇلتتىق عىلىمي ونكولوگيا ورتالىعى جانە «قازاق ەندوسكوپيالىق قوعامى» بىرلەستىگى ۇيىمداستىرعان فورۋمدا مەديتسينالىق جابدىقتار شىعاراتىن وندىرۋشىلەر وزدەرىنىڭ سوڭعى ازىرلەمەلەرىن كورمەگە الا كەلىپتى. ۇلتتىق عىلىمي ونكولوگيا ورتالىعى باسقارما توراعاسىنىڭ مەديتسينالىق قىزمەت جونىندەگى ورىنباسارى ادىلبەك مۇقاجانوۆ فورۋمنىڭ ماقسات-مىندەتى تۋرالى ايتىپ بەرگەن ەدى.
– فورۋمعا باس-اياعى 500-دەن اسا تاجىريبەلى دارىگەر جيىلدى. ولار سالاداعى جەتىستىكتەردى قامتىپ, تاجىريبە الماسادى. ماماندار ەندوسكوپيا بويىنشا بايانداما جاساۋمەن شەكتەلمەيدى. ونكولوگيا ۇلتتىق عىلىمي ورتالىعىندا ءبىزدىڭ دارىگەرلەر شەتەلدىك ماماندارمەن بىرلەسىپ وپەراتسيالار جاسايدى. سونى فورۋمعا كەلگەن باسقا دا ارىپتەستەر ونلاين تاماشالاپ, تاجىريبەسىن تولىقتىردى. بىزدە قازىر ەندوسكوپيالىق ونكولوگيا, ەندوسكوپيالىق حيرۋرگيا قارقىندى دامىپ كەلەدى. شامامەن ون جىل بۇرىن ەندوسكوپيا تەك دياگنوستيكالىق ءادىس سانالسا, قازىر ەمدەۋگە, حيرۋرگيالىق وپەراتسيا جاساۋعا دا مۇمكىندىك بەرەدى. ەلدە ەندوسكوپيالىق, دياگنوستيكالىق ەمدەۋ تاسىلدەرى قولجەتىمدى.
دارىگەرلەردىڭ ايتۋىنشا, ەندوسكوپيا قاتەرلى ىسىكتىڭ الدىن الۋعا سەپتەسەدى ەكەن. ويتكەنى اسقازان, ىشەك اۋرۋلارى اسقىنىپ, قاتەرلى ىسىككە اپارۋى مۇمكىن عوي. مۇندايدا ناۋقاس ەندوسكوپيالىق دياگنوستيكادان ءوتىپ, قاتەرسىز ىسىكتى الدىراتىن بولسا, ساۋىعىپ كەتەدى. سوندىقتان اۋرۋدىڭ بەلگىسى بايقالسا, ەندوسكوپيادان قاشۋدىڭ قاجەتى جوق. دارىگەرلەردىڭ ءوزى ەلۋدەن اسقان ەرەسەكتەرگە جىلىنا نەمەسە ەكى جىلدا ءبىر مارتە ەندوسكوپيالىق تەكسەرۋدەن ءوتۋدى ۇسىنادى.
– ەندوسكوپيادا جەتىستىكتەر كوپ دەدىك. كەمشىلىكتەر دە جوق ەمەس. مىسالى, مامانداردىڭ تاپشىلىعى, وقىتۋ ءتاسىلىنىڭ ازدىعى, سەرتيفيكات بەرەتىن كۋرستاردىڭ بولماۋى, ءتاريفتىڭ تومەندىگى الاڭداتادى. ونىڭ بارلىعى شەشىمى بار ماسەلە دەسەك بولادى. فورۋمنىڭ تاعى ءبىر ماقساتى سالاداعى كەمشىلىكتەردى ورتاعا سالۋ, تاجىريبە الماسىپ, دامۋ جولدارىن قاراستىرۋ بولدى. ءساتىن سالسا, جىلدىڭ ەكىنشى جارتىسىندا ونكولوگيا ورتالىعىنىڭ جاڭا عيماراتى اشىلادى. دياگنوستيكادا قولداناتىن, ونكولوگيالىق اۋرۋلاردى ەمدەيتىن قۇرال-جابدىقتارمەن قامتىلادى. ەندوسكوپياعا دا سولاي سوڭعى ۇلگىدەگى قۇرىلعىلاردى الامىز. وسىلايشا, جۇمىستى ءبىرشاما شيراتۋ جوسپاردا بار, – دەيدى ءا.مۇقاجانوۆ.
