«قۇماقساي» – ءحىح عاسىردا بارباستاۋ وزەنىنىڭ جاعالاۋىندا بولعان قازاق اۋىلى ەكەن. حح عاسىردىڭ باسىندا بۇل جەرگە ىشكى رەسەيدەن كوشىپ كەلگەن «قاراشەكپەندىلەر» ورنالاسىپ, جاڭا قونىسقا وزدەرى تۋىپ-وسكەن دەرەۆنيانىڭ اتاۋىن قويعان. ارينە, تاۋەلسىزدىك جىلدارىنداعى دەموگرافيالىق وزگەرىستەر بۇل اۋىلدى قايتادان قازاقىلاندىرىپ, ءمان-مازمۇنىن وزگەرتىپ جىبەرگەن. ەندى, مىنە, اۋىلدىڭ اتاۋى دا وزگەرىپ, تاريحي ادىلەتتىلىك ورنادى.
– سوڭعى 5 جىل ىشىندە ءبىر اۋدان, 36 ەلدى مەكەن, 932 كوشە, 40 مەكتەپ ۇلتتىق تانىمعا جاقىن اتاۋلارعا وزگەرتىلدى, – دەيدى باتىس قازاقستان وبلىسى مادەنيەت, تىلدەردى دامىتۋ جانە ارحيۆ ءىسى باسقارماسى ونوماستيكا جانە كورنەكى اقپاراتتاردى باقىلاۋ ءبولىمىنىڭ باسشىسى ءىزباسار جۇماعالي.
كوپ كەشىكپەي جاڭاقالا اۋىلىنداعى كاسىپتىك-تەحنيكالىق كوللەدجى – بەلگىلى قوعام قايراتكەرى سەيىتقالي مەڭدەشەۆتىڭ, كارمانوۆ ورتا مەكتەبى – دىنمۇحامەد قوناەۆتىڭ, بايتەرەك اۋدانىنداعى چەبوتارەۆ ورتا مەكتەبى – كۇيشى قۇرمانعازى ساعىرباي ۇلىنىڭ ەسىمىن يەلەنۋى مۇمكىن. سونداي-اق ءبورلى اۋدانىنداعى الەكساندروۆ ورتا مەكتەبى – دوستىق, بايتەرەك اۋدانىنداعى كيروۆ جانە پودحوز مەكتەپتەرى – بولاشاق جانە جالىن نەگىزگى ورتا مەكتەبى دەپ اتالماق. بۇل ۇسىنىستار باتىس قازاقستان وبلىسى اكىمدىگىنىڭ 2023 جىلعى 31 مامىرداعى №124 قاۋلىسى جانە باتىس قازاقستان وبلىستىق ءماسليحاتىنىڭ 2023 جىلعى 31 مامىرداعى №3-4 شەشىمىنە سايكەس رەسپۋبليكالىق ونوماستيكالىق كوميسسيانىڭ قاراۋىنا جولدانعان.
وڭىردەگى جەر-سۋ اتاۋلارى سالاسىندا اقپاراتتىق-ناسيحاتتىق جۇمىستاردى جۇرگىزۋ ماقساتىندا قوعامدىق پىكىر كوشباسشىلارىنىڭ قاتىسۋىمەن «ونوماستيكا – مەملەكەتتىك يدەولوگيانىڭ نەگىزى» تاقىرىبىندا كەشەندى كەزدەسۋلەر, «مەن تۇراتىن كوشەنىڭ تاريحى» اكتسياسى, «ونوماستيكا – ەل ايناسى» كەشەندى ءىس-شارالار جۇيەلى ءوتىپ تۇرادى. كورنەكى اقپاراتتاردى راسىمدەۋدە ادىستەمەلىك كومەك كورسەتۋ ءۇشىن «Tilge qurmet» قوعامدىق ءتىل ينسپەكتسياسى دا ءوز جۇمىسىن ناتيجەلى اتقارىپ ءجۇر. ماسەلەن, قازىرگە دەيىن 400-گە جۋىق ءبىلىم ۇيىمى مەن كاسىپكەرلىك نىسانىنا «قازاقستان رەسپۋبليكاسىنداعى تىلدەر تۋرالى» زاڭىنىڭ 21-بابى ءتۇسىندىرىلىپ, ادىستەمەلىك كومەك كورسەتىلىپ, زاڭ بۇزۋشىلىق جويىلعان.
دەگەنمەن, باتىس قازاقستان وبلىسىندا يدەولوگيالىق تۇرعىدان ەسكىرگەن نەمەسە ءمان-ماعىناسىن جوعالتقان ءالى دە 67 ەلدى مەكەن, 600-گە جۋىق كوشە, 48 مەكتەپ بار ەكەن. سوندىقتان وڭىردەگى ونوماستيكالىق جۇمىستار جالعاسادى.
باتىس قازاقستان وبلىسى
