رەسەي «سبەربانكىنىڭ» باسشىسى گەرمان گرەف قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسىندا بولعان كەزىندە دجيم كوللينزدىڭ « ۇلىلىققا ۇشتاسقان يگىلىك» اتتى بەستسەللەرىنىڭ قازاق تىلىندەگى ەكسكليۋزيۆتى نۇسقاسىنىڭ 100 داناسىن سىيعا تارتتى.
رەسەي «سبەربانكىنىڭ» پرەزيدەنتى, باسقارما توراعاسى گەرمان گرەف قازاقستانعا جاساعان جۇمىس ساپارى بارىسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسىندا بولدى. كىتاپحانادا مەملەكەت باسشىسى نۇرسۇلتان نازارباەۆتىڭ جەكە كوللەكتسياسىنان جيناقتالعان ەكسپوناتتارمەن قاتار, كىتاپ قورى اۋقىمدىلىعى جاعىنان بۇگىندە 20 مىڭنان اسادى. «سبەربانك» باسشىسىنىڭ نازارىنا قازاقستان پرەزيدەنتىنىڭ ەكسپوزيتسيالارى ۇسىنىلدى.
ەكسكۋرسيا بارىسىندا گەرمان گرەف ەلباسى كىتاپحاناسىنىڭ مازمۇندىق قۇرىلىمىنىڭ ەرەكشەلىگىنە ءتانتى بولىپ, ەلباسىنىڭ كىتاپحاناسى جوباسىن ىسكە اسىرۋداعى يننوۆاتسيالىق كوزقاراستى ەرەكشە اتاپ ءوتتى. ونىڭ باستى يدەولوگى – قازاقستان رەسپۋبليكاسى پرەزيدەنتى كەڭسەسىنىڭ باستىعى, قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى ديرەكتورىنىڭ ءمىندەتىن اتقارۋشى ماحمۇد قاسىمبەكوۆ.
گەرمان گرەف كىتاپحاناعا دجيم كوللينزدىڭ « ۇلىلىققا ۇشتاسقان يگىلىك» اتتى بەستسەللەرىنىڭ قازاق تىلىندەگى ەكسكليۋزيۆتى نۇسقاسىنىڭ 100 داناسىن سىيلادى. ەڭبەكتى قازاق تىلىنە فيلولوگيا عىلىمدارى دوكتورلارىنىڭ كومەگىمەن «سبەربانكتىڭ» قازاقستانداعى ەنشىلەس بانكى اۋداردى. كىتاپتى «سبەربانك كىتاپحاناسى» سەرياسىندا «سبەربانك» اق ەب شىعاردى.
گەرمان گرەف كىتاپتى تاپسىرىپ تۇرىپ, ونىڭ كەزدەيسوق تاڭدالماعاندىعىن اتاپ ءوتتى. دجيم كوللينز « ۇلىلىققا ۇشتاسقان يگىلىك» كىتابىندا يگىلىك ىستەرىن ۇلى ىستەرگە ۇشتاستىرعان كومپانيالاردىڭ ءتاجىريبەلەرىن تالقىلايدى. اۆتور وسىلاي ۇشتاستىرۋ ءۇشىن قاجەتتى فاكتورلاردى, تالاپتار مەن مەحانيزمدى قاراستىرادى. وسىنداي ۇدەرىس قازاقستاندا دا: يگىلىك ىستەردى ۇلى بولاشاققا ۇشتاستىرىپ دامىتۋداعى ءوز ستراتەگياسىنا سايكەس الدىعا قويعان مىندەتتەردى كەزەڭ-كەزەڭىمەن شەشۋ جانە كوتەرىلۋ ۇدەرىسى كورىنەدى.
«بۇل – قازاق تىلىنە اۋدارىلعان العاشقى بيزنەس-كىتاپ جانە «سبەربا
نكتىڭ» قازاقستاندىق كاسىپكەرلەردىڭ دامۋىنا, سونىمەن قاتار, ەلدىڭ كىتاپحانا قورىنىڭ قازاق تىلىندەگى كىتاپتارمەن تولىعۋىنا قوسقان ۇلەسى ەكەنى ءسوزسىز. ءبىز الداعى ۋاقىتتا رەسپۋبليكانىڭ ءىرى كىتاپحانالارى مەن جەتەكشى جوعارى وقۋ ورىندارىنا سىيعا تارتۋ ءۇشىن وسى كىتاپتىڭ 1000 داناسىن شىعارۋدى جوسپارلاپ وتىرمىز. بۇل كورپوراتيۆتىك الەۋمەتتىك جاۋاپكەرشىلىگىمىزدىڭ ماڭىزدى جوبالارىنىڭ ءبىرى», – دەپ اتاپ ءوتتى قازاقستانداعى «سبەربانك» باسقارماسىنىڭ توراعاسى الەكساندر كامالوۆ.
ءوز كەزەگىندە, قازاقستان رەسپۋبليكاسىنىڭ تۇڭعىش پرەزيدەنتى كىتاپحاناسى رەسەي «سبەربانكىنىڭ» پرەزيدەنتى, باسقارما توراعاسى گەرمان گرەفكە جانە دەلەگاتسيا مۇشەلەرىنە ن.ءا.نازارباەۆتىڭ «جىلدار مەن ويلار» («ۆرەمەنا ي دۋمى»), «ەركىن ەلدىڭ ەرتەڭى» («بۋدۋششەە سۆوبودنوي سترانى») اتتى تولعامدارى مەن قاناتتى سوزدەرى توپتاستىرىلعان جيناقتارىن سىيعا تارتتى.
«قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى» مەملەكەتتىك مەكەمەسى 2014 جىلعى ناۋرىزدا «نازارباەۆ ورتالىعى» كوپ فۋنكتسيالى عىلىمي-تالدامالىق جانە گۋمانيتارلىق-اعارتۋشىلىق مەملەكەتتىك مەكەمەسى جانىنان قۇرىلدى. كىتاپحانادا ءوزىنىڭ مازمۇنى بويىنشا سيرەك كەزدەسەتىن «ەلباسىنىڭ ءموبيلدى كىتاپحاناسى» جوباسى ىسكە اسىرىلىپ, وندا ن.ءا.نازارباەۆتىڭ 28 كىتابى جينالعان. ەلباسىنىڭ كىتاپحاناسى «نازارباەۆ ورتالىعىنىڭ» جاڭا عيماراتىندا ورنالاسقان.
الەمدىك دەڭگەيدەگى ىسكەرلىك ادەبيەتتىڭ بىردەن ءبىر وكىلى دجيم كوللينزدىڭ ەڭبەگىن قازاق تىلىندە سويلەتىپ وتىرعان «سبەربانك روسسي» ااق – رەسەيدىڭ ەڭ ءىرى بانكى جانە الدىڭعى قاتارداعى جاھاندىق قارجى ينستيتۋتتارىنىڭ ءبىرى. «سبەربانك» ۇلەسىنە بۇكىل رەسەيلىك بانك سەكتورى اكتيۆتەرىنىڭ ءۇشىنشى بولىگى جاتادى. «سبەربانكتىڭ» ۇلتتىق ەكونوميكا ءۇشىن ماڭىزدى كرەديتور جانە سالىمدار نارىعىندا ەڭ كوپ ۇلەسى بار ەكەندىگى ايان. «سبەربانك روسسي» ااق-تىڭ قۇرىلتايشىسى جانە نەگىزگى اكتسيونەرى – رەسەي فەدەراتسياسىنىڭ ورتالىق بانكى, وعان جارعى كاپيتالىنىڭ 50 پايىز جانە ءبىر داۋىس بەرۋشى اكتسياسى تيەسىلى. بانكتىڭ قالعان اكتسيالارىنىڭ 50 پايىزى رەسەيلىك جانە حالىقارالىق ينۆەستورلاردىڭ ەنشىسىندە. «سبەربانك» قىزمەتتەرىن دۇنيەجۇزىندەگى 22 ەلدىڭ 110 ميلليوننان استام جەكە تۇلعاسى جانە 1 ميلليونعا جۋىق كاسىپورىندارى پايدالانادى. بانكتىڭ رەسەيدە 18 مىڭنان اسا ءبولىمشەلەرى مەن ىشكى قۇرىلىمدىق بولىمشەلەرىنەن تۇراتىن ەڭ اۋقىمدى فيليالدىق جەلىسى بار. ال سىرتقى شەتەلدىك جەلىسى ۇلىبريتانيا, اقش, تمد, ورتالىق جانە شىعىس ەۋروپا, تۇركيا جانە تاعى باسقا ەلدەردەگى ەنشىلەس بانكتەردەن, فيليالداردان جانە وكىلدىكتەردەن تۇرادى.
«سبەربانكتىڭ» حالىقارالىق توبىنا كىرەتىن «سبەربانك» اق ەب قازاقستاننىڭ قارجى نارىعىندا تۇراقتى تۇردە 7 جىل تابىستى جۇمىس ىستەپ كەلەدى جانە اكتيۆتەرىنىڭ كولەمى بويىنشا قازاقستانداعى ەدب اراسىندا 4 ورىنعا يە بولدى. بۇگىنگى تاڭدا «سبەربانك» اق ەب-ءنىڭ 107 قۇرىلىمدىق بولىمشەدەن تۇراتىن 15 فيليالدىق جەلىسى بار. بانكتىڭ ورتالىق ءوفيسى الماتى قالاسىندا ورنالاسقان.
قانات ەسكەندىر,
«ەگەمەن قازاقستان».
الماتى.
