«ادەبيەتتىڭ اكىمى» اتانعان زاڭعار جازۋشىمەن جۇزدەستىرگەن تاعىلىمدى جيىنعا تولەن ابدىك, مىرزاتاي جولداسبەكوۆ, ءشاربانۋ بەيسەنوۆا باستاعان قازاق ادەبيەتىنىڭ ايتۋلى تۇلعالارى, زيالى قاۋىم وكىلدەرى, اقپارات جانە قوعامدىق دامۋ ءمينيسترى دارحان قىدىرالى, مادەنيەت جانە سپورت ءمينيسترى اسحات ورالوۆ, قازاقستان رەسپۋبليكاسى پارلامەنتى سەناتى مەن ءماجىلىسىنىڭ دەپۋتاتتارى, سونداي-اق ادەبيەت جاناشىرلارى, قالامگەردىڭ شاكىرتتەرى, جازۋشىنىڭ جارى, اباي اتىنداعى مەملەكەتتىك سىيلىقتىڭ لاۋرەاتى روزا مۇقانوۆا قاتىستى.
جاقسى مەن جايساڭ باس قوسقان, ءسوز ونەرىنىڭ مەرەيى تاسىعان تۇساۋكەسەر ءراسىمىن تىزگىندەگەن مادەنيەت جانە سپورت ءمينيسترى اسحات ورالوۆ قابىرعالى قالامگەردى مەرەيتويىمەن قۇتتىقتادى. ال مەملەكەت باسشىسى قاسىم-جومارت كەمەل ۇلى توقاەۆتىڭ قالامگەر شىعارماشىلىعى تۋرالى پىكىرى بەينەروليك ارقىلى شارانىڭ شىمىلدىعىن اشتى.
«بىرىنشىدەن, اكىم تارازي – جازۋشى الەمىندە وتە سيرەك كەزدەسەتىن تۇلعا. بۇل كىسىنىڭ قازاق ادەبيەتىندەگى ورنى ەرەكشە, بىرەگەي جازۋشى دەپ ايتۋعا بولادى. اكىم تارازي جالپى قالادا بولىپ جاتقان دۇنيەلەر, ياعني ۋربانيزاتسيا تۋرالى جازادى. بۇل تۇرعىدان الىپ قاراساق, بەلگىلى تۇرىك جازۋشىسى ورحان پامۋكقا ۇقسايدى. ول كىسىنىڭ فيلوسوفياسى وتە تەرەڭ. تاعى ءبىر ەرەكشەلىگى – ول كىسى ناعىز رەاليست. تۋىندىلارىن جازعان كەزدە وقىرماندارىن ايامايدى. شەرحان مۇرتازا ايتقانداي, «جازۋشىنىڭ كوزى – كوكىرەگىندە». ءا.تارازي – جازۋشى رەتىندە دە, دراماتۋرگ رەتىندە دە ومىرگە كوكىرەگىمەن قارايتىن قالامگەر», – دەپ مەملەكەت باسشىسى بەينەقۇتتىقتاۋىندا ءوزىنىڭ اقجارما تىلەگىن جەتكىزىپ, سۋرەتكەر شىعارماشىلىعى تۋرالى كەلەلى پىكىرىن ءبىلدىردى.
اقپارات جانە قوعامدىق دامۋ ءمينيسترى دارحان قىدىرالى دە جازۋشى شىعارماشىلىعى مەن قالامگەردىڭ تۇساۋى كەسىلگەن تۋىندىلارىنا كەڭىنەن توقتالىپ, جوعارى باعاسىن بەردى:
– اكىم اعامىزدىڭ ون ەكى تومدىق شىعارمالار جيناعى – جازۋشىنىڭ «كۇن وتىرماي, ءتۇن ۇيىقتاماي» قولىنان قالامى تۇسپەگەن, تالاي جىلعى قاجىرلى ەڭبەگىنىڭ جەمىسى. سونىڭ ىشىندە تۇتاس تۇركىستان ءۇشىن وت كەشكەن ۇلى كۇرەسكەر مۇستافا شوقايدىڭ ءومىر جولىن, بولمىسى مەن بەينەسىن جاڭا قىرىنان تانىتىپ, شۇرايلى ءتىل, شەبەر سۋرەتكەرلىكپەن كوركەمدەگەن تاعىلىمدى تۋىندى – ادەبيەتىمىزدىڭ اسىل قازىناسىنا قوسىلعان قۇندى دۇنيە ەكەنى انىق, – دەدى مينيستر.
ساليقالى كەشتە سۇبەلى ويلار, كەلەلى پىكىرلەر ايتىلىپ, مەملەكەت جانە قوعام قايراتكەرى مىرزاتاي جولداسبەكوۆ, جازۋشى, مەملەكەتتىك سىيلىقتىڭ لاۋرەاتى تولەن ابدىك, مەملەكەت جانە قوعام قايراتكەرى قۋانىش سۇلتانوۆ, جازۋشى ءشاربانۋ بەيسەنوۆا سىندى جازۋشىنىڭ ارىپتەستەرى, قالامگەردىڭ شىعارماشىلىعىن زەرتتەپ جۇرگەن شاكىرتتەرى ەستەلىكتەرىن, جىلى لەبىزدەرىن ءبىلدىردى.
– اكىم اعانىڭ ەڭ جاقىن دوستارى بولدى. ولار – سايىن مۇراتبەك, قاليحان ىسقاق, رامازان توقتاروۆ جانە قابدەش ءجۇمادىلوۆ. بۇل وتە ساۋاتتى, مىقتى ۇرپاق ەدى. سونداي توپتىڭ باسىندا بولدى. قازاق ادەبيەتىندە قوعامدى سىناۋ, ادامدى سىناۋ, سىن كوزىمەن سىنشىل رەاليزمگە بەت بۇرۋ دەگەندى باستاعان كىسى – ءبىزدىڭ اكىم اعامىز. بۇل كىسى ءار جانردا جەتىستىككە جەتكەن ادام. پروزاسى ءبىر بولەك, دراماتۋرگياداعى ەڭبەگى دە وتە ۇلكەن. قازاق دراماتۋرگياسىن بيىككە كوتەرگەن تۇلعا»,– دەپ جازۋشى, مەملەكەتتىك سىيلىقتىڭ لاۋرەاتى تولەن ابدىك قالامگەرگە ارناعان جۇرەكجاردى لەبىزىن جەتكىزدى. سۋرەتكەر شىعارماشىلىعى تۋرالى ءادىل باعاسىن ورتاعا سالدى.
تاعىلىمدى كەزدەسۋ كىتاپحانانىڭ 4-قاباتىندا ورنالاسقان اكىم تارازي شەبەرحاناسىنداعى جەكە قولتاڭبالار كورمەسىن, ۇلتتىق ارحيۆ قورىنان اكىم تارازيدىڭ جەكە تەكتىك قورىن جانە تۇلعا ومىرىنەن سىر شەرتەتىن فوتوكورمەنى تاماشالاۋمەن جالعاستى. اۆتور شەبەرحاناسىندا شاكىرتتەرىنە اقىل-كەڭەس ايتىپ, قولتاڭبا بەردى.
ايتا كەتەرلىگى, ايتۋلى جيىن – اكىم تارازي مەرەيتويىنىڭ شىمىلدىعىن اشىپ بەرگەن تاعىلىمدى شارالاردىڭ بەتاشارى. ۇلتتىق كىتاپحانا تورىنەن باستاۋ العان مەرەيتوي قوڭىر كۇزدە كۇللى رەسپۋبليكا دەڭگەيىندە تويلاناتىن بولادى.
