ول – وتكەن مەن بۇگىندى جالعاستىراتىن التىن كوپىر
ارعى-بەرگى تاريحىمىزدا اتا-بابالارىمىز بوستاندىق پەن ەركىندىكتى عاسىرلاپ اڭساعانى شىندىق. اڭساپ قويماي, سول ءۇشىن كۇرەستى. ۇرپاق قامى دەپ, تاۋەلسىزدىك جولىندا قاسىق قاندارىن توككەن ساتتەرى كوپ بولدى. وعان تاسقا قاشالعان شەجىرەمىز, الەمدىك كارى تاريح كۋا. جۇبان اقىن ايتقانداي «مىڭ ءولىپ, مىڭ تىرىلگەن» قازاق حالقىنىڭ باعى جيىرماسىنشى عاسىردىڭ سوڭىنا قاراي جاندى. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ سارا ساياساتىنىڭ ناتيجەسىندە تاۋەلسىز قازاق ەلى الەمگە تانىلدى. دامۋشى ەلۋ ەلدىڭ قاتارىنان نىق ورىن الدىق. ەندىگى ماقسات ەلباسىنىڭ ءوزى جوسىعىن جاساعان «قازاقستان-2050» ستراتەگياسىن ءساتتى ىسكە اسىرىپ, دامىعان 30 مەملەكەتتىڭ قاتارىنان تابىلۋ ەكەندىگى بۇگىندە ءاربىر قازاقستاندىققا ءمالىم, امبەگە ايان. مۇنى وڭتۇستىك قازاقستان وبلىسىنىڭ تۇرعىندارى دا جانىمەن ۇعىپ, سەرگەك سانامەن سەزەدى, اقىل-ويىمەن تۇسىنەدى, پاراساتتىلىقپەن بىلەدى.
ەل تاۋەلسىزدىگى جيىرما ءۇشىنشى جىلعا اياق باستى. ەكونوميكامىز قارىشتاپ, مادەنيەتىمىز بەن وركەنيەتىمىز ءوسىپ-وركەندەپ كەلەدى. استاناداي ايرىقشا كەلبەتتى ەلوردامىز بار. وڭتۇستىك استانامىز الماتى دا بۇرىنعىدان الدەقايدا اجارلانىپ, ۇلكەن مەگاپوليسكە اينالدى. ەلباسى ءۇشىنشى قالا اتاندىرعان شىرايلى شىمكەنت شاھارى دا جىل ساناپ تۇلەپ, كوركىنە كورىك قوسىپ كەلە جاتىر. بۇدان جيىرما جىل بۇرىنعى قالا مەن قازىرگى شۇعىلالى شاھاردى سالىستىرا المايسىز. اسىرەسە, سوڭعى ءتورت-بەس جىلدا شىمكەنتتىڭ سىرتقى ساۋلەتى ايتارلىقتاي وزگەردى. كوزدىڭ جاۋىن الاتىن, «مەنىڭ قالام وسىنداي» دەپ كوڭىلدى كوككە كوتەرەتىن عيماراتتار, مادەنيەت ورتالىقتارى مەن دەمالىس ورىندارى وبلىس ورتالىعى تۇرعىندارىنىڭ يگىلىگىنە اينالدى. گۇلدەنىپ, كورىكتەنگەن ساياباقتار, «داڭق» مەموريالى كەشەنى, ءشامشى قالداياقوۆ اتىنداعى گۇلزار, «وتىرار» كىتاپحاناسى, قوناەۆ, بايدىبەك, استانا داڭعىلدارى جانە باسقا دا ءساندى ءارى كورىكتى جەرلەرىمىزدى سىرتتان كەلگەن قوناقتار تامسانا ايتىپ ءجۇر. قالا انسامبلىنە كىرىككەن ءساندى عيماراتتاردى بىلاي قويعاندا, تاۋەلسىزدىگىمىزدىڭ, ۇلتتىق قۇندىلىقتارىمىزدىڭ قادىر-قاسيەتىن تانىتاتىن كەشەندەر ۇزدىكسىز, بىرىنەن كەيىن ءبىرى قاتارعا قوسىلىپ جاتىر. سولاردىڭ بىرەگەيى, اتاۋى دا اسا سالماقتى ءارى قاستەرلى تاۋەلسىزدىك ساياباعى دەۋگە ابدەن لايىقتى.
تاۋەلسىزدىك ساياباعى شىمكەنت قالاسىندا قازاقستان رەسپۋبليكاسى تاۋەلسىزدىگىنىڭ 20 جىلدىعىنا ارنالعان ءىس-شارالار اياسىندا سالىنعان. ەلباسى نۇرسۇلتان نازارباەۆتىڭ ءوزى سالتاناتتى جاعدايدا اشقان ساياباق قالانىڭ قابانباي باتىر كوشەسىندەگى تاريحي توبەنىڭ ۇستىندەگى جازىقتا ورىن تەپكەن.
ساياباق ورنى جايدان جاي تاڭدالىنا سالماعانى بەلگىلى. بۇل جەر – كونە شىمكەنت پەن ۇلىستىڭ ۇيىتقىسى بولعان وڭتۇستىك ءوڭىرىنىڭ, ارعى جاعى بۇكىل قازاق حالقىنىڭ تاريحىندا وزىندىك ورنى بار توبە باسىنداعى جازىق. ونىمەن جاپسارلاسىپ, زامان داۋىلدارى كەزىندە قيراپ قالعان ەجەلگى شاھاردىڭ ورنى جاتقاندىعى ارحەولوگيالىق قازبا جۇمىستارى كەزىندە ايقىندالعانى دا راس. بۇل ەجەلگى قالاشىقتىڭ جازىعىندا ەسىمى ەلگە ايگىلى اتا-بابالارىمىز تالاي-تالاي القالى جيىن وتكىزىپ, ەل قامىن, جەر قامىن ويلاپ, كەسىمدى بيلىكتەر ايتقان. ارىعا بارماي-اق قوقان حاندىعى ءداۋىرىن ەسكە الايىقشى. تاپ وسى ارادا بايزاق داتقا قالىڭ قازاق جۇرتىنىڭ باسىن قۇراپ, قوقاندىقتاردىڭ وزبىرلىعىنا قارسى بوستاندىق تۋىن كوتەرمەپ پە ەدى؟ ساتقىندىقتىڭ قۇربانى بولعان باتىر بابانى جاۋى وسى جەردە, توبە باسىنداعى جازىققا اكەلىپ, پاتشا زەڭبىرەكتىڭ ءۇڭىرەيگەن ۇڭعىسىنىڭ اۋزىنا بايلاپ, شاردومالاق ءداۋ وقپەن اتىپ, ەر تۇلعانى جابىرلەگەنىن تاريح جازبالارى راستايدى. قوقان بيلەۋشىلەرىنىڭ سونداعى ويى – تاريحي ورىندا ۇلتتىڭ نارتۇلعاسىنىڭ ءبىرىن وققا بايلاپ, حالىقتىڭ رۋحىن ءتۇسىرۋ ەدى. بىراق ولاردىڭ بۇل قارانيەت پيعىلدارى وزدەرىنە قاتتى سوققى بولىپ ءتيدى. بايزاق داتقانىڭ ءولىمى قازاقتى اتقا وتىرۋعا ءماجبۇر ەتتى...
جالپى, قالاي ايتساق تا بۇل توبە ۇستىندەگى جازىقتىڭ تاريحى تەرەڭدە جاتىر. سوندىقتان بولار, وبلىس اكىمى اسقار مىرزاحمەتوۆ حالىق ءۇشىن قاسيەتتى جەردى تاۋەلسىزدىك ساياباعىنا اينالدىرۋدى قولعا الدى. ماقسات – وتكەن تاريح پەن بۇگىندى استاستىرىپ, تانىمدىق جانە تاربيەلىك مازمۇنمەن جىمداستىرۋ ەكەندىگىن وياۋ كوڭىل سەزسە كەرەك-ءتى. وسىلاي تەرەڭ پايىمداۋمەن, تازا توگىلگەن تەرمەن جۇزەگە اسقان ءىس ءوزىنىڭ جەمىسىن بەرگەن سەكىلدى.
ساياباقتىڭ كورىنىسى جايلى اڭگىمەلەسەك, ونىڭ ءتريۋمفى, ياعني, بيىكتىگى 15 مەترلىك قاقپاسى تەمىرجول ۆوكزالى ماڭىنان ايقىن كوزگە شالىنادى. سودان جارتى شاقىرىمداي جوعارى قاراي ورلەپ كەلىپ, قابانباي باتىر داڭعىلىنىڭ ماڭداي تۇسىندا ەڭسەسىن تىكتەگەن قاقپا جۇرتتىڭ نازارىن وزىنە اۋدارادى. سىرتتان كەلگەن قوناقتاردىڭ كوزىنە العاش شالىناتىن ءساندى عيمارات تا وسى تريۋمف. ونىڭ قاقپاسىنان اتتاپ, العاشقى قادامدى باسقان جەردەن گۇلمەن كومكەرىلگەن «تاۋەلسىزدىك شەجىرەسى» اللەياسى باستالادى. اتاۋى ايتىپ تۇرعانداي, كۇلتەگىن ەسكەرتكىشتەرىن ەسكە تۇسىرەتىن, بۇگىننىڭ وزىق ساۋلەتىنە لايىقتى بىرتەكتەس جاسالعان جيىرما ءبىر ءمارمار تاس قاز-قاتار بوي تۇزەگەن. بۇلاردا قازاقستاننىڭ جاڭا تاريحى 1991 جىلدان 2011 جىلعا دەيىنگى ەلىمىزدە ورىن العان اسا ماڭىزدى وقيعالار ويىپ جازىلعان. مۇنى قازىرگى ءداۋىر عانا ەمەس, كەيىنگى كەزەڭدەگى ۇرپاقتىڭ دا ەسىندە جۇرەتىن ۇلى ۇمتىلىسپەن جاسالعان شەشىمدەر دەۋگە ابدەن لايىقتى. وسىلايشا ەلىمىزدىڭ ءار جىلدارداعى جارقىن تاريحى – كولەمى 5,8 گەكتاردى قۇرايتىن اۋماقتا قۇلاشىن كەڭگە جازىپ جاتىر.
تاۋەلسىزدىك ساياباعىنداعى كوكەيگە ەلجاندىلىقتى ۇيالاتار تاعى ءبىر ەرەكشە نىسان – «التىن شاڭىراق» دەپ اتالاتىن ەل بىرلىگىنە ارنالعان مونۋمەنت. بايىپتاپ قاراساڭىز, مەملەكەتىمىزدە ءومىر ءسۇرىپ جاتقان بارلىق ۇلت پەن ۇلىس وكىلدەرىنىڭ بارەلەفى بەينەلەنگەن الىپ گرانيت تۇعىردا 137 تىك تىرەۋدەن تۇراتىن كومپوزيتسيا شىعار كۇننىڭ ساۋلەسىنە قاراي ماڭدايىن توسەپ, قازاقتىڭ قاسيەتتى شاڭىراعىن بەرىك ۇستاپ تۇر. «التىن شاڭىراقتىڭ» سيمۆوليكالىق استارى ايتپاي-اق ءتۇسىنىكتى. ونداعى 137 ۋىق تەكتەس تىرەۋلەر 137 ۇلت پەن ۇلىس وكىلدەرىنىڭ تاتۋلىق پەن بىرلىكتى تۋ ەتىپ, دانالارىمىز ءدوپ باسىپ ايتقان «ىرىس الدى – ىنتىماقتى» ماقسات تۇتىپ, ءوزارا تاتۋ-ءتاتتى ءومىر ءسۇرىپ جاتقانىن الەمگە پاش ەتكەندەي.
سەرگەك ساناعا سالىپ قاراساق, دەمالىس ورىندارى ادامزات وركەنيەتىندە ايرىقشا مانگە يە ەكەندىگىندە داۋ جوق. سول ەجەلدەن بەرمەن قاراي كەلە جاتقان دەمالىس ورىندارىن ورتا عاسىرلاردا اۋىزدەر, كەيىن سۋبۇرقاقتار سانگە بولەيتىنىن بىلەمىز. تاۋەلسىزدىك ساياباعىندا دا سۋبۇرقاق بار. الۋان تۇسكە بويالاتىن ول سەرۋەندەۋگە كەلگەن كوپشىلىكتى قايران قالدىراتىنى ءسوزسىز. ويتكەنى, اۋەندى سۋبۇرقاق استانادا عانا ەمەس شىمكەنتتە دە اۋەندەتىپ تۇر. وعان سۋ اراسىنان كينو كورسەتەتىن ارنايى پروەكتور دا ورناتىلعان. بۇل دا ءبىر ساۋلەت ونەرىنىڭ بۇگىنگى جەتىستىگى دەۋگە بولادى.
ساياباقتىڭ ءون بويىنا تەكشە تاستان سەرۋەن جولى توسەلىپ, ورىندىقتار ورناتىلعان. ءتىپتى, ەلىمىزدىڭ سيمۆولىنا اينالعان بايتەرەكتىڭ دە كوشىرمەسىن وسى ارادان كورە الاسىز. وسىلاردىڭ سالتاناتىن ارتتىرىپ, گوللانديادان ارنايى جەتكىزىلگەن گۇل شوقتارى كورگەننىڭ كوز جاۋىن الادى.
ۇلتتىق سالت-ءداستۇرىمىزدىڭ تاعى ءبىر كورىنىسى – ۇشتارى كوككە شانشىلعان, كورگەندە كوڭىلگە رۋح ۇيالاتاتىن, ارقايسىسىنىڭ بيىكتىگى 25 مەترلىك «جەتى نايزا» دەر ەدىك. ءتۇپ-توركىنى ۇلتتىق شەجىرەمىزگە نەگىزدەلگەن قازاق داستاندارىندا «اق بىلەكتىڭ كۇشىمەن, كوك نايزانىڭ ۇشىمەن...» دەيتىن تىركەس ءجيى ۇشىراسادى. جايدان جاي قولدانىلا سالعان تىركەس ەمەس, حالىق تاريحىنان سىر شەرتەتىن تانىمدىق تۇسىنىك. دەمەك, بۇدان «جەتى نايزا – ەل قورعانى» دەگەن استارلى ۇعىم بارىن سەزىنۋگە بولادى. سوعان وراي جىل سايىن وسى ساياباقتان وتان الدىنداعى بورىشىن وتەۋگە جاستارىمىز سالتاناتتى جاعدايدا اتتانىپ جاتقانىنىڭ كۋاسى بولىپ ءجۇرمىز. تاۋەلسىزدىك پەن پاتريوتتىق سەزىم وسى تاۋەلسىزدىك ساياباعىندا ۇشتاسقانىن وسىنداي ءىس-شارالاردان تۇيسىكتى جاندار اڭعارا السا كەرەك-ءتى. مۇندا كەلسەڭ دەمالىپ قانا قويمايسىڭ, وتانسۇيگىشتىك سەزىمىڭ ويانىپ, رۋحىڭ سەرپىلەدى.
«ەل قورعانىن» بىلدىرەتىن مونۋمەنتتەر قازاقستان رەسپۋبليكاسىنىڭ مەملەكەتتىك رامىزدەرى الاڭىمەن قاپتالداسىپ, قۇشاعىن ءارى قاراي اشادى. وتكەن مەن بۇگىننىڭ جالعاسىن اركىم جانىمەن ۇعىناتىن, بار بولمىسىمەن سەزىنەتىن تۇس بۇل. ەڭسەلى ءمارمار تاستا ەلىمىزدىڭ كارتاسى بەينەلەنىپ, ەلباسى نۇرسۇلتان نازارباەۆتىڭ تاۋەلسىزدىك تۋرالى تولعانىستارى بەدەرلەنىپ جازىلعان. العى بەتتەگى تولعانىسىندا: «دۇنيەدە تاۋەلسىز قازاق ەلى بار. الەمدە ەگەمەن قازاقستان بار. ونىڭ, كوپ ۇلتتى, ىنتىماقشىل حالقى بار. قۋاتتى ەكونوميكاسى, سەنىمدى ساياسي جۇيەسى بار. ەڭ باستىسى – بۇگىننەن نۇرلى, بۇگىننەن كەمەل بولاشاعى بار. سول كۇنگە بەرىك سەنىمى بار», دەپ توگىلتكەن. كەلەسى جاعىنداعى تولعانىسى: «ءبىز مەملەكەت قۇردىق. قۇرعاندا دا, اتى بار زاتى جوق مەملەكەت ەمەس, بۇكىل ادامزات تانيتىن, تانىپ قانا قويماعان, مويىندايتىن, قۇرمەتتەيتىن مەملەكەت قۇرا الدىق. ەندىگى جەردە – تاۋەلسىزدىك تۋىن تىگۋگە قانشالىقتى قاجىر-قايرات كەرەك بولسا, ونى قۋاتتاي ساقتاپ قالۋعا سونشالىقتى قاجىر-قايرات كەرەك» دەلىنىپ, تەرەڭ ويىن بىلدىرگەن. سونداي-اق, وسى ءمارمار تاستا قازاقستان رەسپۋبليكاسىنىڭ كونستيتۋتسيالىق زاڭىنان ءۇزىندى كەلتىرىلگەن.
كوككە شانشىلعان نايزالاردىڭ ورتا شەنىندە كولەمى 128 شارشى قادامدى قۇشاعىنا سيعىزعان كوك تۋىمىز 50 مەترلىك بيىكتىكتە كوزايىم بولىپ, جەلبىرەپ تۇر. تاڭەرتەڭ ويانعان ءاربىر شىمكەنتتىكتىڭ كوزى ساياباق جاققا تۇسسە, ەڭ الدىمەن جانارىنا قازاقستاننىڭ كوك تۋى ىلىگەدى. جانارىمىزدا جۇرگەن تۋىمىزدىڭ جەلبىرەگەنىنىڭ ءوزى قانداي ءساندى, قانداي رۋحتى!
رامىزدەر الاڭىندا تۇرىپ, قالانىڭ كورىنىسىنە قاراعان ادامنىڭ بويىنا ەرەكشە ماقتانىش سەزىمى پايدا بولىپ, كەرەمەت تە كۇشتى رۋح بىتەدى. سەبەبى, كونە تاريحي ورىننان ءسال تومەندە بىرلىك پەن ءبىتىمنىڭ قاسيەتتى ورداسىنىڭ اتاۋىن العان ورداباسى الاڭى مەنمۇندالايدى. بۇل جەردەگى تولە بي, قازىبەك بي, ايتەكە بي كوشەلەرىنىڭ قيىلىسىندا, الاڭنىڭ قاق ورتاسىندا «وتان-انا» تاۋەلسىزدىك مونۋمەنتى نازاردى وزىنە ەرىكسىز اۋدارادى. وبلىس اكىمى اسقار مىرزاحمەتوۆ پەن تۇركىستاندى تۇلەتكەن ساۋلەتشى باقىتجان اشىرباەۆ باستاعان ۇجىمنىڭ شىعارماشىلىق ويىنىڭ جەمىسى ءساتتى ىسكە اسقاندىعىن وسى كورىنىس ايقىنداي تۇسەدى. ويتكەنى, تۇتاس ساۋلەتتىك انسامبل قۇرايتىن تاۋەلسىزدىك ساياباعى مەن تاۋەلسىزدىك مونۋمەنتىنىڭ اراسىن ەنى كەڭدەۋ, ۇزىندىعى 104 مەترلىك كوپىر جالعاپ تۇر. بۇگىندە كوپشىلىك بۇل كوپىردى ەسكى مەن جاڭا تاريحتى بايلانىستىراتىن «التىن كوپىر» دەسىپ ءجۇر. حالىق ايتسا قالت ايتپايدى عوي. شىندىق ەكەنى ءشۇباسىز.
سونىمەن, تاۋەلسىزدىگىمىزگە ارنالعان ەكى بىردەي ساۋلەت جايى تۇتاس العاندا جالپى اۋماعى 8,2 گەكتاردى الىپ, «يران باققا» اينالعانىن وڭتۇستىكقازاقستاندىقتار ماقتان تۇتادى.
ساياباق وزدىگىنەن اياق استىنان بوي كوتەرە سالماعانى بەلگىلى. بۇل وبلىس اكىمى اسقار مىرزاحمەتوۆ باستاعان بيلىك باسىنداعىلار مەن وڭتۇستىك ساۋلەت ونەرىنىڭ مايتالماندارى جانە ەلىنە قامقورلىق تانىتقان كاسىپكەرلەردىڭ ەلشىلدىگىنىڭ, ەلجاندىلىعىنىڭ ارقاسىندا ەل يگىلىگىنە اينالعان دەمالىس ايماعى. دەمالىس ورنىنىڭ رەڭىن قوشقاراتا وزەنى جانداندىرا تۇسكەنىن دە بايقاۋعا بولادى.
تاۋەلسىزدىك ساياباعى قۇرىلىسىنىڭ جالپى قۇنى 680 ميلليون تەڭگەنى قۇرايدى. ونىڭ – 373,5 ميلليون تەڭگەسى جەرگىلىكتى قازىنادان قارالسا, قالعانى وبلىس اكىمىنىڭ تىكەلەي ۇيىمداستىرۋىمەن ەلباسى قولداعان بيزنەستىڭ الەۋمەتتىك جاۋاپكەرشىلىگى اياسىندا ءوڭتۇستىكتەگى ەلدىكتىڭ تۇعىرىن نىعايتقان كاسىپكەرلەردىڭ قارجىسىمەن جۇزەگە اسىرىلعان. جۇمسالعان قارجىنىڭ جاي-جاپسارىن تاپتىشتەپ ايتپاي-اق قويايىق, ەڭ باستىسى – شىمكەنت قالاسىنىڭ تۇرعىندارى مەن قوناقتارى جاس ۇرپاققا دۇرىس جول سىلتەيتىن, پاتريوتتىق رۋحتى ۇرلەيتىن, مۇراجاي ىسپەتتەس عاجايىپ ساياباقتىڭ يگىلىگىن كورىپ جاتىر.
بۇدان ءۇش جىل بۇرىن ەلباسى نۇرسۇلتان نازارباەۆ وسى ساياباقتىڭ اشىلۋ سالتاناتىندا تەبىرەنىپ سويلەگەنى كوپشىلىكتىڭ ەسىندە. ول: «قازاقستاننىڭ باياندى بولاشاعىن وسى وڭتۇستىك قازاقستان وبلىسى ءومىرىنىڭ وزىنەن كوز جەتكىزۋگە بولادى. بۇرىندارى وسى وبلىستا ءتورت, ءۇش اۋىسىمدىق مەكتەپتەر بولعان. ءبىز ازداعان جىلداردىڭ ىشىندە ساۋلەتتى مەكتەپتەر, بالاباقشالار, اۋرۋحانالار سالىپ, كۇردەلەنگەن ماسەلەلەردىڭ ءتۇيىنىن تارقاتتىق. وڭتۇستىكتە انا مەن بالا ءولىمى بۇرناعى جىلداردان ايتارلىقتاي ازايدى. ادامداردىڭ ءومىر ءسۇرۋ جاسىنىڭ ۇزاقتىعى ارتىپ كەلەدى. مۇنىڭ ءبارى – ەلگە جاسالىپ جاتقان جاقسىلىقتاردىڭ قايتارىمى. شىمكەنت – ساۋلەتتى قالا. تاڭەرتەڭ دەندروباقتى ارالاپ, كولدى كوردىم. ۇلكەن جۇمىستار اتقارىلىپتى. مىنا ساياباق قانداي اسەم. تاريحقا تۇنىپ تۇر. استانا, الماتىدان كەيىنگى قازاقستاننىڭ ءۇشىنشى قالاسى – شىمكەنت دەگەندى مەن بۇرىن دا ايتقانمىن. قالا ورتالىعىنىڭ سيقىن الىپ, قورشاعان ورتاعا زالالىن تيگىزىپ وتىرعان قورعاسىن زاۋىتى سىرتقا كوشىرىلەدى. حالقىنىڭ سانى 1 ملن.-عا جەتەعابىل قالانىڭ كوركى بۇگىنگىسىنەن دە كوركەم بولادى. جىل سايىن ەلىمىزگە 67 مىڭ ءسابي سىيلايتىن التىن قۇرساق وڭتۇستىكتەگى بۇگىنگى اتقارىلىپ جاتقان جۇمىستاردىڭ اۋقىمى ۇلكەن, بولاشاعى زور», دەگەن ەدى.
مەملەكەت باسشىسىنىڭ اقجارىلا ايتقان بۇل ءسوزى شىندىقتان سىر شەرتەدى. شىنىندا دا ءاربىر كومپوزيتسياسى بەلگىلى ءبىر تاريحي وقيعادان دەرەك تارتاتىن دەمالىس ايماعىندا كوڭىل سەرگىتەتىن, جاناردى جاۋلايتىننىڭ ءبارى بار. جايقالعان گ ۇلى, سىلدىراپ اققان سۋى, جاسىل-جەلەك نۋى, ازات ەلدىڭ ايماڭداي ۇرپاعىنىڭ شاتتىققا تولى ءۇنى مەن ورتالىق ازياداعى كوشباسشى ەلدىڭ جىرى مەن تۇعىرلى تۋى ءوزارا جاراسىم تاپقان. سوندىقتان بولار, قازاقستان تاۋەلسىزدىگىنىڭ 20 جىلدىعىنا ارنالعان تاريحي-مونۋمەنتالدىق ساياباق كەشەنىنىڭ بوي كوتەرۋىنە تىكەلەي ارالاسىپ, قوماقتى ۇلەس قوسقان اۆتورلىق ۇجىمدى قازاقستان رەسپۋبليكاسىنىڭ ساۋلەتشىلەر وداعى مەملەكەتتىك سىيلىققا ۇسىندى. اۆتورلىق ۇجىمدا اسقار مىرزاحمەتوۆ, باقىتجان ءاشىرباەۆ, ناسير رۋستاموۆ, ءامىرحان شۇمەنوۆ, نۇرلىجان بوكەباەۆ سىندى ەلگە تانىمال ازاماتتار بار.
ەلباسىنىڭ اۋزىنا ىلىككەن, ۇتقىر ۇلتتىق قۇندىلىعىمىزعا اينالعان تاۋەلسىزدىك ساياباعى تۋرالى اڭگىمە قوزعاعاندا ەسىمىزگە دارحان دالامىزدىڭ كەڭدىگى, تاتۋلىق پەن بەيبىتشىلىك, ەل بىرلىگى مەن ىنتىماعى, ۇلتجاندىلىق پەن پاتريوتتىق سەزىم بويىمىزدى بيلەيدى. اتا-بابالارىمىز اڭساعان تاۋەلسىزدىكتىڭ دە قادىرىن انىق سەزىنەمىز. تاۋەلسىزدىك ساياباعى ءاردايىم سونى ەسكە سالىپ تۇراتىن بولادى.
شويبەك ورىنباي,
جازۋشى.
شىمكەنت.
