اسكەريلەر دە انالار كەڭەسىنە ءزارۋ

قوعامدىق ۇيىمنىڭ وكىلى اسكەري ءبولىمنىڭ مەديتسينالىق بولىمشەسىنە ات باسىن تىرەگەن بولاتىن. مۇندا ول اسكەري ءومىر تازالىعىن، جايلىلىقتى جانە العاشقى مەديتسينالىق كومەك كورسەتۋ ءۇشىن قاجەتتى ماتەريالدار مەن ءدارى-دارمەك­تەردىڭ بازالىق جيىنتىعىنىڭ بار ەكەنىن اتاپ ءوتتى. اسكەري ءتارتىپ شاتىرلى قالاشىقتا دا، اسكەرگە شاقىرىلعاندارعا ارنالعان كازارمادا دا بىر­دەن كوزگە تۇسەدى. جوندەۋ جۇمىس­تارىنا بايلانىستى مۇندا قازىرگى ۋاقىتتا التى اي قىزمەت ەتكەن ساربازدار ورنالاستىرىلعان.

قوعامدىق ينسپەكتور اسكەري قىزمەتشىلەردىڭ دەنساۋلىعى جاقسى، اسكەري ءومىر سالتى ۇنايتىنىن جانە ولاردىڭ اراسىندا كەلىسىمشارت بويىنشا قىزمەت ەتۋدى قالايتىندار دا بار ەكەنىنە كوز جەتكىزدى. قازىرگى اسكەرگە كەلگەندەر نەگىزىنەن شىمكەنتتەن شاقىرىلعان جاس­تار. جىگىتتەر قازىردىڭ وزىندە اسكەري ومىرگە ۇيرەنىپ، وسى بولىمگە كەلگەنىنە ءدان ريزا. دەمالىس كۇنى ولار تەاتر، مۋزەي سەكىلدى قوعامدىق ورىندارعا بارىپ، كوڭىل سەرگىتىپ تۇرادى.

تاتيانا تروپينا بۇل جەردەگى ساربازدارعا جاسالعان جاعدايدى اسحاناداعى ءمازىر مەن تاعام ساپاسىنان-اق بىلۋگە بولاتىنىن اتاپ ءوتتى. تاماقتانۋ جاعىنا «Bouk ABL» سەرىكتەستىگى جاۋاپتى. رەيدتىڭ باستاماشىسى ساربازدار اسحاناسىنا بارىپ، تۇسكى اسقا دايىندالعان تاعام­داردىڭ ءدامىن تاتىپ كوردى. ءبىرىن­شى اسقا – قايماق قوسىلعان بورشش، ەكىنشىگە – ەت تۇزدىعى قوسىلعان پيۋرە، ءتاتتى شاي، شيە شىرىنى، الما جانە نان بەرىلدى. تاتيانا ترو­پينا اتاپ وتكەندەي، تۇسكى اس ءدامدى، تولتىرا سالىنعان تاماق­تار مەن ونىڭ كالوريا مولشەرى جاۋىنگەرلەردىڭ دەنە دايىندىق بەلسەندىلىگىنە سايكەس كەلەدى.

– جالپى، وسى اسكەري بولىمگە بارعانىما قۋانىشتىمىن. وفي­تسەرلەرگە، سەرجانتتار قۇ­را­­مى­نا جانە ساربازدار­دى تا­ماقتان­دىرۋدى ۇيىمداس­تى­رۋ­­شىلارعا شاعىم جوق. بۇل ءبولىم كومانديرى مايور ەرنات تولەۋعۇلوۆ پەن ونىڭ ورىنباسارى پودپولكوۆنيك نۇر­لان دۇيسەباەۆتىڭ ىسكە جاۋاپ­كەرشىلىكپەن قاراۋىنىڭ ناتي­جەسى دەپ سانايمىن، – دەدى ول.

سارباز انالارى كوميتەتىنىڭ وكىلى دەمالىس كۇنى ءوز باستاماسىمەن، الدىن الا كەلىسىمسىز اسكەري بولىمگە بارعانىن ايتا كەتكەن ءجون. سوندىقتان مەديتسينالىق قىزمەت كورسەتۋ، تۇرمىستىق جاعدايلار، بوس ۋاقىتتى ۇيىم­داستىرۋ جانە اسكەري بولىمدەگى تاماقتانۋ ساپاسى تۋرالى تۇ­جىرىمدار مەرزىمدى قىزمەت ساربازدارىنىڭ دەمالىس كۇنگى تارتىبىنە نەگىزدەلگەن.