ءىس-شاراعا مەملەكەتتىك جانە قۇقىق قورعاۋ ورگاندارىنىڭ, جوعارى وقۋ ورىندارىنىڭ وكىلدەرى, پارلامەنت دەپۋتاتتارى, عالىمدار, وزبەكستان, رەسەي جانە بەلارۋستىڭ جەتەكشى زاڭ ۋنيۆەرسيتەتتەرىنىڭ ساراپشىلارى قاتىستى. جينالعانداردى جوعارعى سوتتىڭ توراعاسى اسلامبەك مەرعاليەۆ, باس پروكۋرور بەرىك اسىلوۆ, كونستيتۋتسيالىق سوتتىڭ توراعاسى ەلۆيرا ءازىموۆا, تمد ەلدەرى باس پروكۋرورلارىنىڭ ۇيلەستىرۋ كەڭەسىنىڭ اتقارۋشى حاتشىسى ۆلاديمير زيمين, سونداي-اق استاناداعى ەقىۇ باعدارلامالار كەڭسەسىنىڭ باسشىسى فروبارت فولكەر قارسى الدى. كونفەرەنتسيا جەتەكشى وتاندىق جانە شەتەلدىك ماماندار مەن پراكتيكتەرگە پىكىر جانە تاجىريبە الماسۋعا, جاساندى ينتەللەكت مۇمكىندىكتەرىن ءتيىمدى پايدالانۋ جونىندە ۇسىنىستار ازىرلەۋگە مۇمكىندىك بەردى.
باس پروكۋرور بەرىك اسىلوۆ جاساندى ينتەللەكت تاقىرىبى وزەكتى ەكەنىن, قۇقىق قولدانۋ پراكتيكاسىنا تسيفرلىق تەحنولوگيالاردى ەنگىزۋ قىلمىستىڭ الدىن الۋ, قۇقىق بۇزۋشىلىقتاردى جەدەل اشۋ جانە وبەكتيۆتى تەرگەۋ جونىندەگى جۇمىستىڭ تيىمدىلىگىن ارتتىرۋعا ىقپال ەتەتىنىن اتاپ ءوتتى. سپيكەرلەر تسيفرلاندىرۋ بۇگىندە مەملەكەتتىك باسقارۋ جۇيەسىن جەتىلدىرۋدىڭ جوعارى سۇرانىسقا يە جانە كەلەشەگى زور باعىتىنا اينالعانىن جەتكىزدى.
عىلىمي-تاجىريبەلىك پىكىرتالاستار شەڭبەرىندە قىلمىستاردى تەرگەۋدە, سوت ءىسىن جۇرگىزۋدە, جالپى زاڭ پراكتيكاسىندا, اۋقىمدى دەرەكتەردى حالىقارالىق-قۇقىقتىق رەتتەۋدە تسيفرلىق تەحنولوگيالاردى (Big Data) قولدانۋ ماسەلەلەرى قامتىلدى. تسيفرلىق تەحنولوگيالاردى ەنگىزۋ قۇپيا مالىمەتتەردى جاريا ەتۋ جانە ولاردى قۇقىققا قارسى ماقساتتاردا پايدالانۋ تاۋەكەلدەرىن بولدىرماۋ ءۇشىن ادام قۇقىقتارىن ساقتاۋ جانە دەربەس دەرەكتەردى قورعاۋ ماسەلەلەرىنە ەرەكشە نازار اۋدارىلادى. كيبەرقاۋىپسىزدىكتى قامتاماسىز ەتۋ كونتەكستىندە اقپاراتتىق تەحنولوگيالار سالاسىنداعى زاماناۋي تاۋەكەلدەر مەن قاۋىپتەر, كورپوراتيۆتىك الاياقتىققا قارسى ءىس-قيمىل ماقساتىندا اۋقىمدى دەرەكتەردى (Big Data) پايدالانۋ مۇمكىندىكتەرى, «داركنەت» تەحنولوگيالارىن پايدالانا وتىرىپ جاسالعان قىلمىستاردى تەرگەۋ ەرەكشەلىكتەرى قاراستىرىلدى. قاتىسۋشىلار ءىس-شارا سوڭىندا وسى باعىتتاعى ىنتىماقتاستىقتى قارقىندى تۇردە ارتتىرۋعا كەلىستى.
