اۆتور ءوز مونوگرافياسىندا قازاق مادەنيەتىنىڭ ينتەگراتيۆتى ەرەكشەلىك ماسەلەلەرىن قاراستىرادى. مونوگرافيالىق ەڭبەك جوعارى وقۋ ورىندارىنىڭ ستۋدەنتتەرىنە, ماگيسترانتتارعا, دوكتورانتتارعا, گۋمانيتارلىق سالا ماماندارىنا ارنالعان.
اتالعان ءىس-شاراعا تانىمال عالىمدار بۇركىتباي اياعان, تۇرسىن جۇرتباي, سەرىك نەگيموۆ, ءو.وزعانباي, ك.قۇرماناليەۆ مەملەكەت جانە قوعام قايراتكەرى دارحان مىڭباي قاتىسىپ, اۆتوردىڭ ەڭبەگى جايىندا وي-پىكىرلەرىن ورتاعا سالدى.
– تىلەۋعالي اشىربەك ۇلىن ت.جۇرگەنوۆ اكادەمياسىندا وقىتۋشى بولىپ جۇرگەن كەزىمنەن باستاپ تانيمىن. كەيىن عىلىمي جەتەكشىم بولدى. تۇڭعىش رەت ەسترادا سالاسىنا قاتىستى ديسسەرتاتسيانى ءساتتى قورعاپ شىققان ەدىك. سول كەزدەن باستاپ ءوزىنىڭ ەرەكشە بولمىسىمەن, ىسىنە دەگەن ادالدىعىمەن, ەڭبەكسۇيگىشتىگىمەن بارشامىزعا ۇلگى بولدى. تىلەۋعالي اعانى ۇستازىم رەتىندە عانا ەمەس, جولىمدى اشقان مەيىربان اعا رەتىندە دە قۇرمەتتەيمىن, – دەدى قازاق ۇلتتىق حورەوگرافيا اكادەمياسىنىڭ رەكتورى بيبىگۇل ءنۇسىپجانوۆا.
تىلەۋعالي قىشقاشباي – التى مونوگرافيا مەن بەس وقۋلىقتىڭ, 16 وقۋ قۇرالى جانە 50-گە جۋىق عىلىمي ماقالانىڭ يەسى.
– كىتاپتىڭ ءبىرىنشى تاراۋى قازاق ونەرىن زەرتتەۋدىڭ نەگىزگى ارنالارىنا ارنالعان. بۇدان كەيىنگى تاراۋلاردا قازاق ونەرىنىڭ ميفتىك-ءدىني ۇلگىسىنىڭ پرينتسيپتەرى جانە پاراديگمالىق مۇمكىندىكتەرى, ەرتەدەگى كوشپەلىلەر ونەرى سينتەزىنىڭ ەرەكشەلىكتەرى تالداندى. كەيىنگى ءۇش تاراۋدا ورتا عاسىر داۋىرىندەگى قازاق ونەرىنىڭ ءوزارا بايلانىسۋ پاراديگماسى, جاڭا داۋىردەگى ءتول ونەردىڭ ترانسلياتسيالىق تۇيىندىلىگى مەن ينتەگراتسياسى, سونداي-اق ۇلتتىق ونەردىڭ ءوزارا بايلانىسىنىڭ جاڭا تيپتەرى قامتىلدى, – دەيدى اۆتور.
كۇننۇر بولاتبەك,
ل.ن.گۋميلەۆ اتىنداعى ەۇۋ-دىڭ
2-كۋرس ستۋدەنتى
