132 جىلدىق تاريحى بار ءداستۇرلى ءتۋرنيردىڭ تۇساۋى سوناۋ 1891 جىلى كەسىلدى. ەرلەر اراسىندا وتكەن العاشقى جارىستا ۇلىبريتانيانىڭ وكىلى ح.بريگگستىڭ باعى جاندى. ودان كەيىن 40 جىلعا جۋىق ۋاقىت بويى جەرگىلىكتى تەننيسشىلەر ەشكىمگە دەس بەرمەدى. سول ارالىقتا ماكس دەكيۋجي 8 رەت دارا شىقسا, انري كوشە 5 مەن اندرە ۆاشەرو 4 مارتە توپ جاردى. كەيىننەن جەڭىمپازداردىڭ قاتارى وزگە مەملەكەتتەردىڭ ورەندەرىمەن تولىقتى. سولاردىڭ قاتارىندا تەننيس ونەرى كەنجە دامىعان مىسىردىڭ دا وكىلى بار. ول – ياروسلاۆ دروبنىي. نەگىزى ياروسلاۆ چەحوسلوۆاكيادا دۇنيەگە كەلگەن. بالاۋسا كەزىنەن سپورتتىڭ سان الۋان تۇرىمەن اينالىسقان بولاشاق جۇلدىز ۋاقىت وزا شايبالى حوككەيدىڭ حاس شەبەرىنە اينالدى. دروبنىي ءوز ەلىنىڭ ۇلتتىق قۇراماسى ساپىندا 1948 جىلى شۆەيتساريانىڭ سانكت-موريتس قالاسىندا الاۋى تۇتانعان قىسقى وليمپيا ويىندارىندا كۇمىس مەدال ولجالادى. كەيىننەن تەننيسكە مىقتاپ دەن قويدى. 1951 جانە 1952 جىلدارى مىسىردىڭ نامىسىن قورعاعان ويىنشى رولان گارروستىڭ ەكى دۇركىن جەڭىمپازى اتاندى. سپورتتىق مانسابىن اياقتاعاننان كەيىن ياروسلاۆ ۇلىبريتانيانىڭ ازاماتتىعىن الدى.
ءىى دۇنيەجۇزىلىك سوعىس اياقتالعاننان كەيىن 30 جىلعا جۋىق ۋاقىت بويى بىردە-ءبىر تەننيسشى پاريجدەگى ءتۋرنيردى ەكى رەتتەن ارتىق ۇتا العان جوق. سول سەڭدى بورن بورگ بۇزدى. شۆەتسيانىڭ داڭقتى تەننيسشىسى التى جارىستا (1974-75, 1978-81 جىلدارى) شاشاسىنا شاڭ جۇقتىرمادى. ۇزاققا دەيىن ەشكىم بۇل كورسەتكىشتى قايتالاي المادى. ءوز ءداۋرىنىڭ مىقتى ويىنشىلارى سانالعان شۆەتسيالىق ۆاتس ۆيلاندەر (1982, 1985, 1988), چەحوسلوۆاكيالىق يۆان لەندل (1984, 1986-87) جانە برازيليالىق گۋستاۆو كۋەرتەن (1997, 2000-01) سىندى ساڭلاقتار باس جۇلدەنىڭ ۇشەۋىن ەنشىلەۋمەن شەكتەلدى.
ءححى عاسىر تابالدىرىقتان اتتاعاننان كەيىن رافاەل ءنادالدىڭ ءداۋىرى باستالدى. يسپانيانىڭ بالەار ارالىنداعى مالوركا قالاسىندا دۇنيەگە كەلگەن دارا تۇلعا 2005-2022 جىلدار ارالىعىندا رولان گارروستا 14 رەت تەڭدەسسىز دەپ تانىلدى. سول جارىستاردىڭ فينالىندا ول رودجەر فەدەرەردى – ءتورت, نوۆاك دجوكوۆيچتى – ءۇش, دومينيك ءتيمدى – ەكى, روبين سەدەرلينگ, داۆيد فەررەر, ەندي ماررەي, ستەن ۆاۆرينكا جانە كاسپەر رۋدتى ءبىر-ءبىر رەتتەن ۇتتى. وسى عالامات كورسەتكىشىنىڭ ارقاسىندا ول «گرۋنت كورولى» دەگەن اتاققا يە بولدى. نادال ۇستەمدىك قۇرعان كەزدە رولان گارروستىڭ كۇمىس كۋبوگىن جەڭىپ الۋعا شۆەيتساريالىق رودجەر فەدەرەر (2009) مەن ستەن ۆاۆرينكا (2015) جانە سەربيالىق نوۆاك دجوكوۆيچتىڭ (2016, 2021) عانا كۇش-جىگەرى جەتتى.
ايەلدەر اراسىنداعى جارىس 1897 جىلدان بەرى ۇيىمداستىرىلا باستادى. ءحىح بەن حح عاسىلاردىڭ توعىسىندا ادين ماسسوننىڭ (1897-99, 1902-03) مەرەيى ۇستەم بولدى. ودان كەيىن كەيت جيلۋ-فەنۆيك (1904-06, 1908) پەن جاننا ماتتە (2009-12) بىرنەشە مارتە چەمپيوندىق اتاققا قول جەتكىزدى. جيىرماسىنشى جىلدارى سيۋزانن لەنگلەن (1920-23, 1925-26) قارسىلاس شىداتپادى. ولاردىڭ بارلىعى دا فرانتسۋز قىزدارى ەدى. الپىسىنشى جانە جەتپىسىنشى جىلدارى مارگارەت كورت-ءسميتتىڭ (1962, 1964, 1969-70, 1973) قارقىنى قاتتى بولدى. اۋستراليانىڭ ارۋى بەس تۋرنيردە توپ جاردى. كوپ ۇزاماي كريس ەۆەرت (1974-75, 1979-80, 1983, 1985-86) ەسىمدى اسقان دارىن يەسى سۋىرىلىپ شىقتى. اقش-تىڭ فلوريدا شتاتىندا دۇنيەگە كەلگەن سپورتشى ءدۇبىرلى دودادا جەتى مارتە دارالاندى. كۇنى بۇگىنگە دەيىن بۇل كورسەتكىشتى ەشكىم جاقسارتا العان جوق.
1987 جىلى رولان گارروستا شتەففي گرافتىڭ شوقتىعى بيىك بولدى. سول كەزدە 18 جاستاعى نەمىس قىزىنىڭ اسقان شەبەرلىگىنە بارشا جانكۇيەر تامساندى. سودان كەيىن شتەففي تاعى التى جارىستا (1987-88, 1993, 1995-96, 1999) ەشكىمگە ەسە جىبەرمەدى. بىراق ول ءبارىبىر كريس ەۆەرتتىڭ رەكوردىن جاڭارتا العان جوق. سوڭعى جارىسىن گرافف 30 جاسىندا ۇتتى. ال ءححى عاسىردىڭ ەڭ ۇزدىك ناتيجەلەرى بەلگيالىق جيۋستين ەنەن-اردەنن (2003, 2005-07) مەن امەريكالىق سەرەنا ۋيليامسكە (2002, 2013, 2015) تيەسىلى.
اتالعان جارىستاعى كەيبىر قىزىقتى مالىمەتتەر جايىندا باياندايتىن بولساق, 2004 جىلعى ءتۋرنيردىڭ ءبىرىنشى اينالىمىندا كورت قوجايىندارى – فابريس سانتورو مەن ارنو كلەمانن اراسىنداعى باسەكە 6 ساعات 33 مينۋتكە سوزىلدى. بۇل تارتىس العاشقىسىنىڭ پايداسىنا شەشىلدى. 2010 جىلى جاپونيالىق كۋرۋمي ناراعا رۋمىنيالىق مونيكا نيكولەسكۋدى جەڭۋ ءۇشىن 4 ساعات 42 مينۋت قاجەت بولدى. 1988 جىلى شتەففي گراف 34 مينۋتتىڭ ىشىندە كسرو-نىڭ ۇزدىگى ناتاليا زۆەرەۆانى 6:0, 6:0 ەسەبىمەن تاس-تالقان ەتىپ ۇتتى. «رولان گارروس» تاريحىنداعى ەڭ جاس چەمپيونى – مونيكا سەلەش. يۋگوسلاۆيانىڭ دارىندى ويىنشىسى 1990 جىلى نەبارى 16 جاسىندا جەڭىمپاز اتاندى. ال اقش-تا تۋىپ-وسكەن قىتاي جىگىتى مايكل چانگ 1989 جىلى پاريدجەگى دودادا دارالاندى. ول كەزدە مايكل 17 جاستا ەدى.
بىلتىرعى تۋرنيردە ەرلەر سايىسىندا رافاەل نادالعا تەڭ كەلەر ەشكىم تابىلمادى. شيرەك فينالدا نوۆاك دجوكوۆيچ (6:2, 4:6, 6:2, 7:6) پەن جارتىلاي فينالدا الەكساندر زۆەرەۆتى (7:6, 7:6) جەڭگەن 35 جاستاعى پيرەنەي تۇبەگىنىڭ تارلانى اقتىق ايقاستا رۋد كاسپەردى (6:3, 6:3, 6:0) قاپى قالدىردى. ايەلدەر اراسىنداعى باسەكە يگا سۆەنتەكتىڭ پايداسىنا شەشىلدى. 20 جاستاعى پولشا تەننيسشىسى شەشۋشى تۇستا دجەسسيكا پەگۋلا (6:3, 6:2), داريا كاساتكينا (6:2, 6:1) جانە كوري گاۋففتى (6:1, 6:3) ويسىراتا ۇتتى. ەرلەردىڭ جۇپتىق ويىنىندا سالۆادورلىق مارسەلو الەۆارو مەن نيدەرلاندتىق جان جيۋلەن-رويەرگە ەشكىم توتەپ بەرە المادى. ايەلدەردىڭ تارتىسىندا جەرگىلىكتى ويىنشىلار – كارولين گارسيا مەن كريستينا ملادەنوۆيچتىڭ مەرەيى ۇستەم بولدى. ميكستە جاپونيالىق ەنا سيباحارا مەن نيدەرلاندتىڭ وكىلى ۋەسلي كولحوۆ بارلىق باسەكەلەسىنەن باسىم ءتۇستى.
قازاقستاننىڭ تەننيسشىلەرى اراسىندا رولان گارروستا ەڭ جاقسى ناتيجە كورسەتكەندەر ياروسلاۆا شۆەدوۆا (2010, 2012), يۋليا پۋتينتسەۆا (2016, 2018) جانە ەلەنا رىباكينا (2021). ءار جىلدارى ولار اتالعان دودانىڭ شيرەك فينالىنا دەيىن جەتتى. بيىلعى جارىستا سول كورسەتكىش جاقسارادى دەپ ۇمىتتەنەمىز. شۆەدوۆا 2010 جىلى جۇپتىق سايىستىڭ فينالىندا ونەر كورسەتسە, 2021 جىلى اندرەي گولۋبەۆ پەن الەكساندر بۋبليك جۇبى دا ءدال سول مەجەدەن كورىندى.
