وبلىستىق ادامي الەۋەتتى دامىتۋ باسقارماسىنىڭ مالىمەتىنشە, قالا سىرتىنداعى لاگەرلەر ماۋسىم ايىنىڭ ءبىرىنشى ونكۇندىگىندە اشىلىپ, جاز بويى 6-8 اۋىسىمدا قىزمەت كورسەتەدى. سونداي-اق مەكتەپ جانىنداعى ءبىر مەزگىل تاماقپەن قامتيتىن 330 لاگەر اشىلادى. وقۋشىلاردى ەڭبەككە باۋلۋ ماقساتىندا جاز مەزگىلىندە 110 مىڭعا جۋىق بالا كوركەيتۋ, كوگالداندىرۋ, قۇرىلىس بريگادالارى مەن مەكتەپ ورمانشىلىعىنىڭ جۇمىسىنا قاتىسادى. وڭىردە 17 جازعى ساۋىقتىرۋ لاگەرلەرى قىزمەت كورسەتەدى دەپ جوسپارلانۋدا. كەيىنگى 10 جىلدان استام ۋاقىت جوندەۋ جۇمىستارىنان وتكىزىلمەگەن مەملەكەتتىك جازعى ساۋىقتىرۋ لاگەرلەرى دە بارشىلىق. تالاپقا ساي كەلمەيتىن دەمالىس ايماقتارىن رەتكە كەلتىرۋگە وبلىستىق بيۋدجەت ەسەبىنەن ءتيىستى قارجى قارالماق. تاۋلى ايماقتاردا ورنالاسقان مەملەكەت مەنشىگىندەگى جازعى ساۋىقتىرۋ ورتالىقتارىن رەتكە كەلتىرۋ دە – كۇن تارتىبىندەگى ماسەلە. بۇل ورايدا وبلىس اكىمى ءتيىستى مەكەمەلەرگە مەملەكەتتىك جانە جەكەمەنشىك جازعى ساۋىقتىرۋ لاگەرلەرىندە قاۋىپسىزدىك شارالارىن قامتاماسىز ەتۋدى, سانيتارلىق تالاپقا سايكەس كەلتىرۋدى جانە بالالاردىڭ قاۋىپسىزدىگىن قامتاماسىز ەتۋ جۇمىستارىن قاتاڭ باقىلاۋعا الۋدى جۇكتەدى.
«جازعى ساۋىقتىرۋ لاگەرلەرىندە سپورت الاڭدارىن, بالالاردى دامىتۋ ورتالىقتارىن جابدىقتاۋ, سونداي-اق مادەني ءىس-شارالاردى ۇيىمداستىرۋ بويىنشا شارالاردى ارتتىرۋ كەرەك. الەۋمەتتىك وسال توپتاردان شىققان بالالاردى ساۋىقتىرۋمەن, جازعى دەمالىسپەن بارىنشا قامتۋدى قامتاماسىز ەتۋ قاجەت. بۇل جۇمىسقا ءىرى كاسىپورىنداردى, بيزنەس وكىلدەرىن تارتقان ءجون. بالالاردىڭ قاۋىپسىزدىگىن قامتاماسىز ەتۋ – ءبىزدىڭ باستى مىندەتىمىز. وسىعان وراي بارلىق لاگەرگە پوليتسيا قىزمەتكەرلەرىن بەكىتىپ, تاۋلىك بويى كەزەكشىلىك ۇيىمداستىرىپ, قاۋىپسىزدىك شارالارىن قاتاڭ جۇرگىزۋدى تاپسىرامىن. مەملەكەتتىك جانە جەكەمەنشىك جازعى ساۋىقتىرۋ لاگەرلەرىندە قاۋىپسىزدىك شارالارى قامتاماسىز ەتىلىپ, جازعى ساۋىقتىرۋ لاگەرلەرىن سانيتارلىق تالاپقا سايكەس كەلتىرۋ قاجەت», دەدى وبلىس اكىمى دارحان ساتىبالدى.
وبلىستىق پوليتسيا دەپارتامەنتى باسشىسىنىڭ ءبىرىنشى ورىنباسارى باعلانبەك ايتپاەۆتىڭ مالىمدەۋىنشە, وقۋشىلاردى تاسىمالدايتىن اۆتوبۋستار مىندەتتى تۇردە پاترۋلدىك پوليتسيانىڭ ارنايى اۆتوكولىكتەرىمەن ىلەسە جۇرەدى. بالالاردى پوليتسياسىز تاسىمالداۋعا تىيىم سالىنادى. بالالاردىڭ جازعى دەمالۋ كەزەڭىندە پوليتسيا قىزمەتكەرلەرى لاگەرلەرگە بەكىتىلىپ, قاۋىپسىزدىك شارالارىن قابىلداۋ ءۇشىن لاگەر اۋماعىندا تاۋلىك بويى كەزەكشىلىككە تۇسەدى.
سونداي-اق وڭىردە جازعى شومىلۋ ماۋسىمىندا وزەن-كولدەر مەن سۋ ايدىندارىندا, باسسەيندەردە قاۋىپسىزدىك شارالارى كۇشەيتىلەدى. تۇركىستان وبلىسى توتەنشە جاعدايلار دەپارتامەنتىنىڭ باستىعى نۇرعالي ءجۇنىسوۆتىڭ ايتۋىنشا, جىل باسىنان بەرى وبلىس اۋماعىندا 20 ادام سۋعا كەتكەن. ونىڭ 15-ءى – اتا-انا قاراۋىنسىز قالعان جاس بالالار. وبلىستا جالپى 4 334 سۋ نىسانى: 42 سۋ قويماسى, 149 ءىرى جانە كىشى وزەندەر, 25 كول, 2 870 كانال جانە 1 248 قاشىرتقى بار. وسىعان بايلانىستى سۋ ايدىندارىنداعى قاۋىپسىزدىكتى قامتاماسىز ەتۋ جوسپارى بەكىتىلىپ, باقىلاۋعا الىنعان. قازىرگى تاڭدا وڭىردە 11 كوممۋنالدىق جاعاجاي اشۋ ورىندارى بەلگىلەنگەن, 111 شومىلۋعا قاۋىپتى ۋچاسكە تىركەلىپ, وندا 370 دانا شومىلۋعا تىيىم سالۋ بەلگىلەرى ورناتىلعان. ماماندار ارنايى شومىلاتىن ورىندارى جوق اۋدانداردا ءمودۋلدى-كاركاستى باسسەيندەر ورنالاستىرىلىپ, بالالاردىڭ تەگىن جانە قاۋىپسىز شومىلۋىنا مۇمكىندىكتەر جاسالۋى دا سۋداعى قايعىلى جاعدايلاردى تومەندەتۋگە سەپتىگىن تيگىزگەنىن ايتۋدا. جالپى, 12 ملن تەڭگەدەن استام قارجىعا 43 كاركاستى باسسەين ساتىپ الىنعان. وبلىستاعى 85 باسسەيننىڭ 33-ءى جەكەمەنشىك. بىلتىر باسسەينى بار كاسىپكەرلەرمەن مەموراندۋم ءتۇزىلىپ, الەۋمەتتىك تۇرمىسى تومەن جانە كوپبالالى وتباسىلاردان 5 مىڭعا جۋىق بالا اقىسىز شومىلعان. سۋداعى قاۋىپسىزدىك بويىنشا ۇگىت-ناسيحات جۇمىستارى قارقىندى جۇرگىزىلىپ جاتىر.
تۇركىستان وبلىسى
