21 مامىردا 38 جاسقا تولعان ماركتىڭ ءجۇرىپ وتكەن جولى جارقىن جەڭىستەرگە تولى. ول سپرينتتە وتە مىقتى. كەزىندە باسەكەنىڭ وسى تۇرىندە ۇلىبريتانيالىق ساڭلاقپەن تەڭەسە الاتىندار كەمدە-كەم ەدى. 2005, 2008 جانە 2016 جىلدارى كاۆەنديش ترەكتەگى مەديسوننان ءۇش دۇركىن الەم چەمپيونى اتانىپ, تاس جولدا ءبىر التىن مەن ءبىر كۇمىس مەدال ولجالادى. 2016 جىلى ريو وليمپياداسىندا تەك يتاليالىق ەليا ۆيۆيانيدەن عانا قالىپ قويىپ, ەكىنشى ورىندى يەلەندى. ءتۇرلى جارىستاردا ۇلىبريتانيانىڭ ۆەلوشاباندوزى 161 مارتە جەڭىس تويىن تويلادى. ەڭ ايگىلى «تۋر دە فرانس» كوپكۇندىگىنىڭ 34 كەزەڭىندە توپ جاردى. وسى كورسەتكىش جاعىنان ول وتكەن عاسىردىڭ 60-70-جىلدارى اتوي سالعان بەلگيانىڭ بەتكەۇستارى ەددي مەركسپەن تەڭەستى. قازىرگى كەزدە رەكوردتىق كورسەتكىش ءدال وسى ەكى سپورتشىعا تيەسىلى. سونداي-اق مارك «دجيرو د’يتاليانىڭ» 16, «ۆۋەلتانىڭ» ءۇش كەزەڭىندە الدىنا جان سالمادى.
ءار جىلدارى اقش-تىڭ «T-Mobile-Team», ۇلىبريتانيانىڭ «Sky Procycling», بەلگيانىڭ «Quick-Step Alpha Vinyl», وار-دىڭ «Qhubeka Assos» جانە باحرەيننىڭ «Bahrain Victorious» كلۋبتارى ساپىندا ونەر كورسەتكەن مارك كاۆەنديش بيىل «استانانىڭ» جەيدەسىن كيگەن ەدى.
