گيلەن تسوي «استانا» مەديتسينا ۋنيۆەرسيتەتى اشىلعان تۇستان بەرىگە دەيىن 42 جىل سول شاڭىراقتا جۇمىس ىستەگەن. وبلىستىڭ باس حيرۋرگى بولعان تۇستا دا پروفەسسور گيلەن ۆاسيلەۆيچ دوتسەنت, كەيىن كافەدرا مەڭگەرۋشىسى بولىپ, ەڭبەك جولىن پەداگوگيكامەن ۇشتاستىرعان. گ.تسويدىڭ تاربيەسىن كورگەن شاكىرتتەرى قازىر ەلدە جانە شەتەلدە تابىستى ەڭبەك ەتىپ ءجۇر. ماماندىعىنا جاناشىر ۇستاز جولىن جالعاعان كەيىنگى تولقىن, سالانىڭ شىن شەبەرى بولۋعا تالپىنۋدان تانبايدى. مۇنى ءبىز كونفەرەنتسياعا كەلگەن قاۋىمنىڭ قاراسىنا قاراپ بىلە بەرسەك بولاتىنداي.
وسى كۇنى قوناقتار حيرۋرگ گ.تسويعا ارنالعان ەسكەرتكىش تاقتانىڭ اشىلۋ سالتاناتىنا قاتىستى. كوپشىلىكتىڭ ورتاسىندا گيلەن تسويدىڭ تۋىستارى, دوستارى مەن شاكىرتتەرى, اكادەميك, عالىمدار, قوعام قايراتكەرلەرى بولدى. سونىمەن قاتار گەرمانيا, ازەربايجان, قىرعىزستان, وزبەكستان جانە باسقا دا الىس-جاقىن شەتەلدەردىڭ حيرۋرگ عالىمدارى توبە كورسەتتى. كەيىن كونفەرەنتسيا زالىندا كوپشىلىكتىڭ الدىندا ءبىرىنشى بولىپ ءسوز سويلەگەن «استانا» مەديتسينا ۋنيۆەرسيتەتىنىڭ رەكتورى كامالجان نادىروۆ كونفەرەنتسيانىڭ ماقسات-مىندەتى جايىندا تارقاتىپ ايتىپ بەردى.
«ۋنيۆەرسيتەتتە شەتەلدىك ارىپتەستەرىمىزبەن تاجىريبە الماسۋ, حيرۋرگيا سالاسىنىڭ دامۋىن تالقىلاۋ – ءبىز ءۇشىن مارتەبە. گ.تسوي وسى وقۋ ورنىندا 40 جىلدان اسا ۋاقىت ەڭبەك ەتتى. بىلىكتى دارىگەرلەر توبىن تاربيەلەدى. كونفەرەنتسيا قورىتىندىسى بۇدان كەيىنگى عىلىمي جۇمىستارعا نەگىز بولاتىنىنا, حيرۋرگيالىق قىزمەتتى ودان ءارى دامىتۋ ءۇشىن تۇجىرىمداما ايقىندايتىنىنا جانە سالادا ءبىلىم بەرۋ ۇدەرىسىن جەتىلدىرۋگە ىقپال ەتەتىنىنە سەنىمدىمىن», دەدى ول.
كونفەرەنتسيادا دەنساۋلىق ساقتاۋ مينيسترلىگىنىڭ حيرۋرگيالىق كومەك كورسەتۋ سالاسىن دامىتۋعا ەرەكشە دەن قويىپ وتىرعانىن اڭعاردىق. مىسالى, بيىل ساۋىردە دەنساۋلىق ساقتاۋ مينيسترلىگىنىڭ بۇيرىعىمەن حيرۋرگيالىق كومەك كورسەتۋدى ۇيىمداستىرۋدىڭ جاڭارتىلعان ستاندارتى بەكىتىلدى. بۇل جونىندە مينيسترلىكتىڭ مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى ازامات دۇيسەنوۆ حابارلادى.
«گ.تسوي ۋنيۆەرسيتەتتە 40 جىلدان اسا تابان اۋدارماي ەڭبەك ەتىپ, بىلىكتى حيرۋرگتەردىڭ شوعىرىن قالىپتاستىردى. عىلىم ءبىر ورنىندا تۇرمايدى. كونفەرەنتسيا زاماناۋي مەديتسينانىڭ وزەكتى ماسەلەلەرىنە ارنالىپ وتىر. بۇگىن سالاعا ەنگىزىلەتىن جاڭا تەحنولوگيالارمەن قوسا مەديتسينادا ءبىلىم-عىلىمدى دامىتۋ جايى كەڭىنەن ايتىلادى. وزدەرىڭىز بىلەتىندەي, كەيىنگى 10 جىلدىڭ شەڭبەرىندە دەنساۋلىق ساقتاۋ جۇيەسىندە حيرۋرگيالىق كومەكتى دامىتۋعا باسىمدىق بەرىلدى. ونىڭ ىشىندە كارديوحيرۋرگيا مەن نەيروحيرۋرگيانى ىلگەرىلەتۋگە ەرەكشە كوڭىل ءبولىندى. وسى كول-كوسىر قولداۋلار ناتيجەسىن بەرىپ, قازىر ەلىمىز كارديوحيرۋرگيا مەن نەيروحيرۋرگيالىق كومەك كورسەتۋ بويىنشا جەتەكشى 30 ەلدىڭ قاتارىنا كىرىپ وتىر. ەلدە حيرۋرگيالىق كومەكتىڭ باسقا دا باعىتتارى قاتار دامىپ جاتىر. ارينە, وسىنىڭ بارلىعى حيرۋرگياعا ەسەلى ۇلەس قوسقان پروفەسسور-عالىمداردىڭ ەڭبەگىنىڭ جەمىسى دەپ ايتامىز. ەندى بۇگىنگى كونفەرەنتسيادا دا مەديتسينالىق كومەكتىڭ ساپاسىن ارتتىرۋ ماقساتىندا تاجىريبە الماسقالى وتىرمىز», دەپ ا.دۇيسەنوۆ كونفەرەنتسياعا كەلگەن قاۋىمعا تابىس تىلەدى.
گيلەن تسويدىڭ ەڭبەك جولى اقمولا وبلىسىنىڭ تاريحىمەن دە تىعىز بايلانىستى. تىڭ يگەرۋ جىلدارى ول باس حيرۋرگ رەتىندە اقمولا وبلىسى مەن سولتۇستىك قازاقستاننىڭ حيرۋرگيالىق جانە تراۆماتولوگيالىق قىزمەتىن ۇيىمداستىرۋعا سەپتەسكەن. وتكەن عاسىردىڭ 60-جىلدارىنا دەيىن ورتوپەديا, حيرۋرگيا جانە تراۆماتولوگيا مەديتسينادا ءبىر ماماندىق رەتىندە قاراستىرىلدى. ياعني گ.تسوي – تەك حيرۋرگيانىڭ ەمەس, سونىمەن قاتار تىڭ يگەرۋ ايماعىنداعى ورتوپەديا-تراۆماتولوگيالىق قىزمەتتىڭ نەگىزىن قالاۋشى. ول تسەلينوگراد مەملەكەتتىك مەديتسينا ينستيتۋتى قۇرىلعان كۇننەن باستاپ وبلىستىڭ باس حيرۋرگى قىزمەتىن پەداگوگيكالىق قىزمەتپەن قاتار الىپ جۇرگەن. قولى التىن حيرۋرگ ەڭبەك ەتۋدەن جالىقپاي, 77 جاسقا دەيىن وپەراتسيا جاساعان. راسىندا, حيرۋرگ, پروفەسسوردىڭ ماماندىققا ادالدىعى كەيىنگى جاس بۋىن دارىگەرلەرگە ۇلگى بولارلىق. كونفەرەنتسياعا الىس-جاقىن شەتەلدەن كەلگەن قوناقتار دا گ.تسويدىڭ ەڭبەگىن بىرىنەن سوڭ ءبىرى تىزبەكتەپ بەردى. ءار ەلدىڭ پروفەسسور عالىمدارى, ۇسىنىستارىن ورتاعا سالدى. مىسالى, تاشكەنت مەديتسينا اكادەمياسى ۇرگەنىش فيليالىنىڭ ديرەكتورى راشيد رۋزيباەۆ مەديتسينا ماماندارىن دايارلاۋ ىسىندە استانا مەديتسينا ۋنيۆەرسيتەتىمەن بەرىك بايلانىس ورناتۋ ءۇشىن ەكىجاقتى مەموراندۋم جاساۋدى ۇسىندى. ءىزىن الا قوس تاراپ مەموراندۋمعا قول قويىپ, بەرىك بايلانىس ورناتۋعا ۋاعدالاستى.
