پوليتسەي پارامەن ۇستالدى

تارازدا پاراقور اسكەري پوليتسەي ۇستالدى. جامبىل وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنە س. دەگەن ازاماتتان ارىز ءتۇسىپتى. ول ىشكى ىستەر مي­نيسترلىگىنىڭ №5513 اسكەري ءبولىمى اسكەري پولي­تسيا بولىمشەسىنىڭ اعا انىقتاۋشىسى, پوليتسيا كاپي­تانى ر. دەگەن ازاماتتىڭ ءوزىن قىلمىستىق جاۋاپ­كەر­شىلىككە تارتپاۋ ءۇشىن اقشا تالاپ ەتكەنىن ايت­قان. اقشا بەرسە, ءىستى بولۋدان قۇتقارامىن دەگەن ءاس­كە­­ري پوليتسەي قىزمەتى ءۇشىن الاتىن اقشاسىنىڭ دا كولە­مىن ناقتى ايتىپ, ەكى جاق 50 مىڭ تەڭگەگە كەلىسىپتى. بىراق, ءىستى بولۋشى قارجىنىڭ  بارلىعىن بىردەن بەرە المايتىنىن جەتكىزگەن. الدىن الا جۇرگىزىلگەن جەدەل-ىزدەستىرۋ شارالارى كەزىندە قارجى پوليتسياسىنىڭ قىزمەتكەرلەرى اسكەري پوليتسەيدىڭ 20 مىڭ تەڭگە اقشا العان ءساتىن تىركەگەن. ەرتەڭىنە قالعان 30 مىڭ تەڭگەنى الىپ جاتقان كەزىندە ءوزى دە قولعا ءتۇستى. كىناسىن بىردەن مويىنداعاندىقتان, سوتقا دەيىنگى جەڭىلدەتىلگەن ءىس جۇرگىزۋ ءوندىرىسى بويىنشا قىلمىستىق ءىس قوزعالدى. جامبىل وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ باسقارما باسشىسى كامال قالىبەكوۆتىڭ ايتۋىنا قاراعاندا,  كۇدىكتىنىڭ ۇستىنەن  قىلمىستىق كودەكستىڭ 311-بابى, 2-ءبولىمى بويىنشا قىلمىستىق ءىس قوزعالدى. ول بويىنشا 3 جىلدان 7 جىلعا دەيىن باس بوستاندىعىنان ايىرۋ جازاسى قاراستىرىلعان. ورالحان ءداۋىت, «ەگەمەن قازاقستان». جامبىل وبلىسى.