قازتالوۆ اۋدانىنىڭ اكىمى اسىلانبەك سارقۇلوۆ قول قويعان ارنايى وكىم بويىنشا اۋىل اكىمدەرىنىڭ جىل بويعى جۇمىسى 35 ءتۇرلى باعىت بويىنشا باعالانباق. ونىڭ ىشىندە اۋىلدا جۇمىسسىزدار سانىن ازايتۋ, جاڭادان جۇمىس ورىندارىن اشۋ, جۇمىسسىزداردى كاسىپتىك وقۋعا جىبەرۋ, گرانت الۋشىلار سانىن ارتتىرۋ, جەرگىلىكتى جەرگە ينۆەستيتسيا تارتۋ, اۋىل شارۋاشىلىعى جەرلەرىن دۇرىس ماقساتتا پايدالانۋ, «اۋىل اماناتى» جوباسىنىڭ جۇزەگە اسىرىلۋى, ۇجىمدىق باۋ-باقشا ەگۋ جۇمىستارى, وكرۋگتىڭ سالىقتىق ءتۇسىمىن ۇلعايتۋ سەكىلدى باعىتتار بار.
– بۇل بايقاۋ اۋىلدىق وكرۋگ اكىمدەرىن جۇمىسقا ىنتالاندىرادى, ولاردىڭ تىكەلەي لاۋازىمدىق مىندەتتەرىن اتقارۋىن تۇرعىندار دا قاداعالاپ وتىرادى. وسى باعالاۋ قورىتىندىسى بويىنشا ۇزدىك دەپ تانىلعان اۋىلدارعا بيۋدجەتتەن قوسىمشا قارجى بەرىلەدى. سوندىقتان ءوز اۋىلىنىڭ جاعدايىنا نەمقۇرايدى قارامايتىن ءار تۇرعىن مەملەكەتتىك باعادارلامالاردىڭ جۇزەگە اسۋىنا ۇلەس قوسادى دەپ سەنەمىز, – دەيدى اسىلانبەك سارقۇلوۆ.
وكرۋگ اكىمدەرىن باعالاۋدىڭ ماقساتى – اۋىلدا ءومىر ءسۇرۋ ساپاسىن جاقسارتۋ, حالىقتىڭ ءال-اۋقاتىن ارتتىرۋ ەكەندىگى تۇسىنىكتى. قازىر بۇل بايقاۋ حالىق اراسىندا قىزۋ تالقىلانىپ جاتىر. جوعارىدا ايتىلعانداي, بايقاۋ ناتيجەسى ءوز قىزمەتىن ءمىنسىز اتقارعان اكىمگە عانا ەمەس, ۇيىمشىل, ءبىر جەڭنەن قول, ءبىر جاعادان باس شىعارعان اۋىل تۇرعىندارىنا دا بايلانىستى بولماق. ەڭ كوپ ۇپاي جيناعان العاشقى ءۇش اۋىلدىق وكرۋگكە اۋدان بيۋدجەتىنەن قوسىمشا قاراجات ءبولىنىپ, ءبىرىنشى ورىنعا – اۆتوكولىك, ەكىنشى ورىنعا – 10 ملن تەڭگە, ءۇشىنشى ورىنعا – 5 ملن تەڭگە بەرىلەدى. بۇل قاراجاتتى قانداي قاجەتتىلىككە جۇمساۋ ماسەلەسىن اۋىل تۇرعىندارى وزدەرى كەلىسىپ شەشەتىن بولادى.
بايقاۋ قورىتىندىسى 2023 جىلدىڭ سوڭىندا جاريالانباق. جەڭىمپازدى اۋداندىق ءماسليحات دەپۋتاتتارى, قوعامدىق كەڭەس جانە ارداگەرلەر ۇيىمى مۇشەلەرى كىرەتىن قازىلار القاسى انىقتايتىن بولادى.
ايتا كەتەيىك, قازتالوۆ اۋدانىندا 16 اۋىلدىق وكرۋگ بار, سولتۇستىگىندە رەسەي فەدەراتسياسىنىڭ ساراتوۆ وبلىسىمەن شەكتەسەدى. حالقىنىڭ 99 پايىزى – قازاقتار.
باتىس قازاقستان وبلىسى
