جوبا ەل پرەزيدەنتى قاسىم-جومارت توقاەۆتىڭ جاڭا وبلىستار قۇرۋ تۋرالى جارلىعىن ىسكە اسىرۋ شەڭبەرىندە جۇزەگە اسىرىلدى. ەستەرىڭىزگە سالا كەتەيىك, وتكەن جىلدىڭ 3 مامىرىندا رەسپۋبليكادا اباي, جەتىسۋ, ۇلىتاۋ وبلىستارى قۇرىلعان بولاتىن. وسىلايشا, قازاقستاننىڭ ساياسي-اكىمشىلىك كارتاسى الماتى, شىعىس قازاقستان, قاراعاندى وبلىستارىنىڭ جاڭا شەكارالارىن, سونداي-اق جاڭادان قۇرىلعان وبلىستاردىڭ قالاي ورنالاسقانىن كورسەتەدى. سونىمەن قاتار ۆەدومستۆو اباي, جەتىسۋ, ۇلىتاۋ, الماتى, شىعىس قازاقستان, قاراعاندى وبلىستارىنىڭ تاقىرىپتىق كارتالارىن, سونىمەن بىرگە ولاردىڭ وبلىس ورتالىقتارىنىڭ جوسپار-سحەمالارىن تانىستىردى.
وسىلايشا, مينيسترلىك ماسشتابى 1:1 500 000 بولاتىن ەلىمىزدىڭ ساياسي-اكىمشىلىك كارتاسىن, ماسشتابى 1:1 000 000 بولاتىن قاراعاندى, شىعىس قازاقستان, الماتى وبلىستارىنىڭ كارتالارىن جاڭارتتى, ال ۇلىتاۋ, اباي, جەتىسۋ وبلىستارىنىڭ كارتالارىن جاسادى. سونىمەن قاتار ماسشتابى 1:25 000 بولاتىن قاراعاندى, سەمەي, وسكەمەن قالالارىنىڭ جوسپار-سحەمالارىن, ماسشتابى 1:10 000 بولاتىن جەزقازعان, قوناەۆ, تالدىقورعان قالالارىنىڭ جوسپار-سحەمالارىن ازىرلەدى.
«وسىدان تۋرا ءبىر جىل بۇرىن ەل پرەزيدەنتىنىڭ جاڭا وبلىستاردى قۇرۋ تۋرالى جارلىعى شىقتى. بۇل اتالعان وڭىرلەردىڭ ەكونوميكالىق وسۋىنە سەرپىن بەرگەنى ءسوزسىز. كارتالاردى ازىرلەۋ – پرەزيدەنتتىڭ وسى شەشىمىن ىسكە اسىرۋ جولىنداعى كەزەكتى ءبىر قادام. وندىرىلگەن كارتوگرافيالىق جانە گەودەزيالىق ماتەريالدار مەن دەرەكتەر مەملەكەتتىك باسقارۋدا, ەلدىڭ ينفراقۇرىلىمىن دامىتۋدا, مەملەكەتتىڭ قورعانىسى مەن قاۋىپسىزدىگىن قامتاماسىز ەتۋدە, ناۆيگاتسيالىق قىزمەتتەر سالاسىندا جانە ادام قىزمەتىنىڭ باسقا دا سالالارىندا شەشىمدەر قابىلداۋ كەزىندە اسا ماڭىزدى ءارى قاجەتتى گەوكەڭىستىك نەگىزى بولىپ سانالادى», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ.
جاڭا كارتالار بارلىق مۇددەلى مەملەكەتتىك ورگانعا بەرىلدى. سونىمەن قاتار كارتالارعا جەكە جانە زاڭدى تۇلعالار دا قول جەتكىزە الادى. ول ءۇشىن «گەودەزيالىق جانە كارتوگرافيالىق قىزمەت سۋبەكتىلەرىنە جوسپارلانىپ وتىرعان جۇمىس ۋچاسكەلەرىندە جەرگىلىكتى جەرلەردىڭ گەودەزيالىق جانە كارتوگرافيالىق جاعىنان زەردەلەنگەندىگى تۋرالى ءتيىستى مالىمەتتەر بەرۋ» مەملەكەتتىك قىزمەتىن تاڭداپ, ۇلتتىق گەودەزيا جانە كەڭىستىكتىك اقپارات ورتالىعىنا ءوتىنىم بەرۋ قاجەت. بارلىق كارتانى ۆيزۋالدى تۇردە جانە تاڭداۋ ءۇشىن nkgf.kz. سايتىنان كورۋگە بولادى.
ايتا كەتەيىك, بۇگىنگى تاڭدا مەملەكەتتىك ورگانداردىڭ سۇراۋى بويىنشا 49, جەكە جانە زاڭدى تۇلعالاردىڭ وتىنىمدەرى بويىنشا 225 تاقىرىپتىق كارتا ۇسىنىلعان.
