بيىل پرەزيدەنت قاسىم-جومارت توقاەۆتىڭ تاپسىرماسىمەن مەملەكەتتىك قىزمەتتى تۇبەگەيلى جاڭعىرتۋ بويىنشا بىرقاتار ءىس-شارا جۇزەگە اسىرىلدى. ونىڭ باسىم بولىگى ناۋرىزدا قابىلدانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدا كورىنىس تاپتى.
«بىلتىر جەلتوقسان ايىندا مەملەكەتتىك قىزمەتكە كىرۋدە ارتىق كەدەرگىلەردى جويۋ جانە مەملەكەتتىك قىزمەتتەن شىعۋ ءتارتىبىن جەڭىلدەتۋ بويىنشا قولدانىستاعى زاڭناماعا ءتيىستى وزگەرىستەر ەنگىزىلدى. ەندى مەملەكەتتىك گرانتپەن وقۋ ورىندارىن اياقتاعان تۇلەكتەر مەملەكەتتىك قىزمەتكە بىردەن تاعايىندالادى. زاڭدى ىسكە اسىرۋ ماقساتىندا اقپان ايىندا مەملەكەتتىك قىزمەت ىستەرى اگەنتتىگىنىڭ بۇيرىعىمەن جوعارى نەمەسە جوعارى وقۋ ورنىنان كەيىنگى ءبىلىم بەرۋ باعدارلامالارى بويىنشا مەملەكەتتىك تاپسىرىس شەڭبەرىندە پرەزيدەنت جانىنداعى ءبىلىم بەرۋ ۇيىمدارىندا جانە ءبىلىم بەرۋ ۇيىمدارىندا وقۋدى اياقتاعان ادامدارعا وقىتۋ ناتيجەسىنىڭ ماندەرى بەلگىلەندى. «ب» كورپۋسىنىڭ جوعارى لاۋازىمدارىنا تىكەلەي تاعايىنداۋدى جۇزەگە اسىرۋ مۇمكىن بولدى. وسىلايشا, ءتيىستى اكادەميالىق ناتيجە 3,33 GPA, ياعني ءداستۇرلى جۇيە بويىنشا «جاقسى» نەمەسە 100 بالدىق جۇيە بويىنشا 85-89 دەڭگەيىندە بولۋى كەرەك. وسى وزگەرىستەر ارقاسىندا ۋاكىلەتتى ورگانمەن كەلىسىم بويىنشا «ب» كورپۋسىنىڭ جوعارى لاۋازىمدارىنا تىكەلەي تاعايىنداۋدى جۇزەگە اسىرۋ مۇمكىن بولدى. جاستار ءارى قاراي جالعاستىرامىن دەسە, مەريتوكراتيا قاعيداتىمەن جۇمىس ىستەي بەرەدى. بۇل بىلىكتى جاستاردى مەملەكەتتىك قىزمەتكە ىنتالاندىرۋعا, جاس مامانداردىڭ اۋدان مەن اۋىلدىق ايماقتارعا ورالۋىنا, سونىمەن قاتار وڭىرلەردەگى كادر تاپشىلىعىن ازايتۋعا سەپتىگىن تيگىزىپ, مەملەكەتتىك قىزمەتكە كىرۋدى وڭتايلاندىرادى», دەدى د.جازىقباەۆ.
زاڭناماعا ەنگىزىلگەن وزگە دە تولىقتىرۋلارعا سايكەس بۇدان بىلاي ەكى توقسان بويى ءتيىمسىز دەپ باعالانعان قىزمەتشىلەردىڭ لاۋازىمى تومەندەتىلەدى. ال تومەنگى بوس لاۋازىم بولماعان جاعدايدا قىزمەتتەن شىعارىلادى. بۇل مەملەكەتتىك قىزمەتتەن شىعۋ ءتارتىبىن جەڭىلدەتەدى. سونداي-اق اگەنتتىك توراعاسى پرەزيدەنتتىك جاستار كادرلىق رەزەرۆى بيىل تاعى دا ماماندارمەن تولىعاتىنىن ايتتى.
«پرەزيدەنت رەزەرۆىندەگى جاستاردىڭ كوبى جەكە سەكتوردان كەلدى. ناقتى ايتار بولساق, 90 پايىزى. قازىر ءبىز 266 ادامدى ورنالاستىردىق. ولاردىڭ 34-ءى ساياسي جانە «ا» كورپۋسىندا قىزمەت ەتەدى. سونىمەن قوسا مەملەكەتتىك ورگانداردا باسشىلىق قىزمەتتەردە, ديرەكتوردىڭ ورىنباسارى, ديرەكتور دەپارتامەنتىنىڭ باسشىلىعى, باسقارما باسشىلارى سىندى قىزمەتتەر اتقارىپ جاتىر. جالپى, جىل سايىن بىلىكتى جاستاردىڭ مەملەكەتتىك قىزمەتكە ارالاسۋىنا مۇمكىندىك ۇسىنۋ قاجەت. بيىل ءبىز ءبىرىنشى رەت وڭىرلەردە پرەزيدەنتتىك جاستار كادرلىق رەزەرۆىن جاساقتايمىز. وعان اۋدان اكىمىنىڭ ورىنباسارلارى, اۋداندارداعى ءبولىم باسشىلارى نەمەسە وبلىستىق دەڭگەيدەگى ءبولىم باستىقتارى, باسقارما باسشىلارىنىڭ ورىنباسارلارى قابىلدانادى», دەدى ول.
