ۇلتتىق مۋزەيدەگى بىرەگەي كورمە

استاناداعى ۇلتتىق مۋزەيدە «ورتالىق ازيا مەن كاۆكازداعى ءداستۇرلى توقىما ونەرى – ۇلى جىبەك جولىنىڭ مۇراسى» اتتى كورمە اشىلدى. وعان  رەسەيدىڭ ەتنوگرافيالىق مۋزەيىندەگى (سانكت-پەتەربۋرگ) قۇندىلىقتار توپتاماسى قويىلعان.  400-دەن استام جادىگەر اراسىندا: قۇرال-سايماندار مەن ستانوكتار, كيىم-كەشەكتەر, ءۇي بۇيىمدارى, كولىك جابدىقتارى, ماتا ۇلگىلەرى, كىلەمدەر مەن كەستەلەر, ۇيلەنۋ تويىنا, يسلام دىنىنە قاتىستى زاتتار, وزگە دە دۇنيەلەر بار. بىرەگەي كورمەنىڭ اشىلۋ ساتىندە قازاقستان رەسپۋبليكاسىنىڭ ۇلتتىق مۋزەيىنىڭ ديرەكتورى دارحان مىڭباي: « ۇلى جىبەك جولى تاقى­رىبىنىڭ ءمانى زور, ونىڭ ماڭىزدى تاريحي ءرولى ءبىزدىڭ زامانىمىز ءۇشىن دە وتكىنشى نارسە ەمەس. بۇگىنگى تاڭدا جاڭارعان ۇلى جىبەك جولى تىرشىلىكتىڭ بارلىق سالاسىندا, ونىڭ ىشىندە مادەنيەت سالاسى بويىنشا دا حالىقارالىق قاتىناستاردىڭ دامۋىنا مىقتى سەرپىن بەرىپ وتىر. ءبىزدىڭ مەملەكەتتەرىمىزدىڭ اراسىندا بەرىك دوستىق ەرتەدەن-اق ور­ناعان. بۇگىنگى ارىپتەستەرىمىز ۇيىم­­داستىرىپ وتىرعان وسى كور­مە جاقسى قارىم-قاتىناستىڭ, اشىق­­تىقتىڭ, ورتاق ماقسات پەن ءمىن­دەتتەردىڭ ماڭىزدىلىعىن ءتۇسى­نۋدە ىنتىماقتاستىقتىڭ بار ەكەنىن تاعى دا دالەلدەپ وتىر. رەسەي ەتنو­گرافيالىق مۇراجايى – رەسەيدىڭ ءىرى مۋزەيلەرىنىڭ قاتارىنا جاتادى, ونىڭ قورىندا قازاقستان تاريحىنا قاتىستى دۇنيەلەر بارشىلىق. بۇل ءوز كەزەگىندە قۇرمەت پەن سەنىم تۋدىرادى. ءبىزدىڭ ۇزاق مەرزىمدى قارىم-قاتىناسىمىزدىڭ باستاۋى بولعالى تۇرعان كورمە ۇلتتىق مۋزەيگە كەلۋشىلەردىڭ قىزىعۋشىلىعىن تۋدىراتىنىنا سەنىمدىمىن», دەدى. ال رەسەي ەتنوگرافيالىق مۋزەيىنىڭ ديرەكتورى ۆلاديمير گرۋسمان: «ءبىز وسى كورمەنىڭ قازاق ەلىنىڭ جاڭا مۋزەيىن ەرەكشە قۇرمەتتىڭ بەلگىسى دەپ بىلەمىز. ەۋرازيا قۇرلىعىندا ورنالاسقان حالىقتاردىڭ ءبىر-بىرىمەن وسىنداي ۇزدىكسىز قارىم-قاتىناستا بولۋىن قولدايمىن. بۇل ارقىلى ادامزاتتىڭ باستى ماق­سات­تارىنىڭ ءبىر ەكەنىن جانە ءاربىر ۇلت­تىڭ مادەنيەتىنىڭ وزىندىك قۇن­دىلىعى بارىن كورسەتەمىز. كورمە ورتالىق ازيا مەن كاۆكاز­دىڭ مادە­ني مۇراسىنا قالىڭ كوپشىلىكتىڭ قىزىعۋشىلىعىن ارتتىرادى, دەپ سەنەمىز. سان ءتۇرلى جادىگەرلەر ورتالىق ازيا مەن كاۆكاز تۇرعىندارىنىڭ كۇندە­لىكتى تۇرمىس-تىرشىلىگىن كوز الدى­مىزعا ەلەستەتەدى. ءبىز قازاق­ستان رەس­پۋبليكاسىنىڭ ۇلت­تىق مۋزەيى­مەن ارىپتەس بولىپ, باي­لانىس ورناتا بەرۋگە ءازىرمىز. ويتكەنى, بۇل كورمە – ەكى تاراپتىڭ دا جوعارى دەڭگەيدەگى ماماندارى ەڭبەكتەرىنىڭ جەمىسى» دەپ ءسوز اياعىن ءتۇيدى. وسى ارادا قازاقستان رەسپۋبلي­كاسىنىڭ ۇلتتىق مۋزەيى مەن رەسەي ەتنوگرافيالىق مۋزەيى باسشىلارى ارىپتەستىك تۋرالى مەموراندۋمعا قول قويعانىن ەسكە سالا كەتسەك دەيمىز. تاعى ءبىر نارسە «ورتالىق ازيا مەن كاۆكازداعى ءداستۇرلى توقىما ونەرى – ۇلى جىبەك جولى­نىڭ مۇراسى» اتتى بۇل كورمە – قازاقستان مەن رەسەيدىڭ ەكى ءىرى مۋزەيىنىڭ اراسىنداعى العاشقى بىرلەسكەن جوبا بولىپ سانالادى. كورمە وسى جىلدىڭ 1 قىركۇيە­گىنە دەيىن جالعاسىن تابادى. ءجۇز جىلدىق تاريحى بار رەسەي ەتنو­گرافيالىق مۋزەيى ەۋروپاداعى ءىرى ەتنوگرافيالىق مۋزەيلەردىڭ بىرىنەن سانالادى. ونىڭ قورىنا ەۋرازياداعى 157 حالىقتىڭ مادەني مۇراسى شوعىرلانعان. مۋزەي 1991 جىلى رەسەي فەدەراتسياسى حالىقتارى مادەني مۇراسىنىڭ اسا قۇندى نىسانى رەتىندە مەملەكەتتىڭ قورعاۋىنا الىنعان. سۇلەيمەن مامەت, «ەگەمەن قازاقستان».