سامميتتە مەملەكەت باسشىسى ورتاق مۇددەگە ساي كەلەتىن ىنتىماقتاستىقتىڭ ماڭىزدى باعىتتارىنا توقتالدى. ول ەڭ ءبىرىنشى باعىت رەتىندە تاۋار اينالىمىن ارتتىرۋدى اتادى.
«سوڭعى جىلدارى ورتالىق ازيا ەلدەرىنىڭ ەكونوميكالىق قارىم-قاتىناسى جاڭا دەڭگەيگە كوتەرىلدى. بىلتىر قازاقستاننىڭ وسى ايماقتاعى مەملەكەتتەرمەن الىس-بەرىسى 19 پايىزعا ءوستى. ياعني, 8 ميلليارد دوللار بولدى. الداعى ۋاقىتتا بۇل كورسەتكىشتى 15 ميللياردقا دەيىن جەتكىزۋدى كوزدەپ وتىرمىز.
ايماقتىڭ قىتايمەن ساۋدا-ساتتىعى دا قارقىندى دامىپ كەلەدى. بىلتىر بۇل كورسەتكىش 70 ميلليارد دوللارعا جەتتى. ونىڭ 45 پايىزى قازاقستانعا تيەسىلى. قىتاي مەن ورتالىق ازيا اراسىنداعى تاۋار اينالىمىن 2030 جىلعا قاراي 100 ميلليارد دوللارعا جەتكىزۋگە بارلىق مۇمكىندىك بار», دەدى قاسىم-جومارت كەمەل ۇلى.
