قۇقىق بۇزۋشىلىق ازايار ەمەس

قازىر وڭىردە قوعامدىق ءتار­تىپتى قاداعالاۋ, ادامداردىڭ تى­نىشتىعىن ساقتاۋ جايى وڭ ۇردىستەرمەن سيپاتالادى. جۇرت­شى­لىق ءجيى جۇرەتىن ورىنداردا جاسالاتىن اۋىر قىلمىستاردىڭ 2, اسا اۋىر قىلمىستاردىڭ 17, ۇرلىقتىڭ 8 پايىزعا كەمىگەنى, ال قىلمىستاردى اشۋدىڭ 2 پايىزعا جاقسارعانى بايقالادى. دەگەنمەن, ءتارتىپ ساقشىلارى مەن جەرگىلىكتى بيلىك ورىندارى اراسىندا تىعىز بايلانىستىڭ جوقتىعى سالدارىنان ورەسكەل ولقىلىقتاردىڭ جىبەرىلۋى كوزگە شىققان سۇيەلدەي كورىنەدى. وسى سالاعا قاتىستى وزەكتى ماسەلەلەر ايماق باسشىسى ەرىك سۇلتانوۆتىڭ جەتەكشىلىگىمەن وتكەن وبلىس اكىمدىگى جانىنداعى قۇقىق بۇزۋشىلىقتىڭ الدىن الۋ جونىندەگى ۆەدوموستۆوارالىق كوميسسيانىڭ ماجىلىسىندە جان-جاقتى تالقىلاندى. بىلتىرعا قاراعاندا بيىل اكىم­شىلىك قۇقىق بۇزۋشىلىقتىڭ 14 پايىزعا كوبەيۋى كوميسسيا مۇشەلەرىن كوبىرەك الاڭداتىپ, ونىڭ سەبەپ-سالدارى اكىمشىلىك پوليتسيا باسقارماسىنىڭ باسشىسى باۋىرجان راقىمجانوۆتان قاتال سۇرالدى. ول ءتۇرلى قىلمىس­تاردىڭ ۋاقتىلى اشىلۋىنا جەدەل باسقارۋ ورتالىعىندا ورناتىلعان 74 بەينە-باقىلاۋدىڭ ءتيىمدى ىقپالىن جەتكىزە كەلىپ, قانشا ايتىلسا دا شەشىلمەي كەلە جاتقان بىرقاتار جايتتاردى كولدەنەڭ تارتتى. جۇمىس ىستەپ تۇرعان 183 ۋچاسكەلىك پوليتسيا بەكەتتەرىنىڭ باسىم كوپشىلىگى تالاپقا ساي جابدىقتالماعان. 27 اكىمشىلىك ۋچاسكەلىك ۋچاسكەدە مۇنداي قوسىندار مۇلدەم جوق. تەلەفون جەلىسى تۇگەل تارتىل­ماعان, كومپيۋتەر تەحنيكالارى قويىلماعاندىقتان, ءتيىستى اقپا­راتتىق بازانى قالىپتاستىرۋ ءمۇم­كىندىگى جوق. قىزمەتتىك كولىك­تەر تاپشى. بۇگىندە ءۇي-كۇيسىز جۇرگەن ۋچاسكەلىك پوليتسەيلەردىڭ سانى – 71. ماجىلىستە وبلىس پرو­كۋرو­رىنىڭ كومەكشىسى ارمان قۇسانوۆ حابارلاما جاساپ, بىرقاتار زاڭسىزدىقتارعا جول بەرىلگەنىن تىلگە تيەك ەتتى. مىسالى, اقجار اۋدانى تالشىق اۋىلدىق وكرۋگىنە 780 مىڭ تەڭگەگە الىنعان 3 بەينە-باقىلاۋ قوندىرعىسى ورناتىلسا دا, جۇمىس ىستەمەيدى. اكىمدىك تە, ىشكى ىستەر ءبولىمى دە پروكۋرورلىق تەكسەرىستەن قورى­تىندى شىعارۋعا اسىعار ەمەس. وسى اۋداندا قوعامدىق ءتارتىپتى قاداعالاۋ شارالارىنا بەلسەنە قاتىسىپ جۇرگەن جەكە تۇلعالارعا سىياقىنى اسىرىپ جازۋ فاكتىلەرى تىركەلگەن. بيۋدجەت قارجىسىن ماق­ساتسىز پايدالانۋدىڭ مۇن­داي جاعىمسىز مىسالدارى باس­قا اۋدانداردا دا كەزدەسەدى. ءتار­تىپ ساقشىلارى تاراپىنان اتقارىلاتىن شارالاردىڭ ۇيلە­سىمسىزدىگىن وبلىس پروكۋرورى ستەپان زايتلەر دە وتكىر سىنعا الدى. ىشكى ىستەر دەپارتامەنتى التى مىڭنان استام ماسكۇنەمدى تىركەۋگە العان. ال ناركولوگيالىق ورتالىق ەسەبىندەگىلەردىڭ سانى – 8 مىڭ. مۇنداي كەرەعارلىقتى ءتۇسىنۋ قيىن. ىشىمدىككە بەيىم ادامدار مەن وتباسىلارمەن تاربيە ءىسى قاعاز جۇزىنەن اسپاي جاتادى. جاستار ءجيى باراتىن ويىن-ساۋىق وتاۋلارى مەن كوپشىلىك ورىنداردا قىلمىس كەمۋدىڭ ورنىنا ءورشىپ بارادى. بىلتىر «نوستالجي» ءدامحاناسىندا 18, بيىل 14 قىلمىس جاسالعان. 1 ادام قاساقانا ءولتىرىلىپ, 9 ۇرلىق تىركەلگەن. «پاۋتينا» تۇنگى كلۋبىندا ءبىر ادام كوز جۇمعان. ءومىر ەسقالي, «ەگەمەن قازاقستان». سولتۇستىك قازاقستان وبلىسى.