بايلانىس باسشىلارىنىڭ كەڭەسى

كەشە استانادا بايلانىس سالاسىنداعى وڭىرلىك ىنتىماقتاستىق (بوى) باسشىلارىنىڭ كەڭەسى جۇمىسىن باستادى. وعان قازاقستان رەسپۋبليكاسىنىڭ ءبىرىنشى  ۆيتسە-پرەمەرى باقىتجان ساعىنتاەۆ, بايلانىس جانە اقپارات اگەنتتىگىنىڭ توراعاسى اسقار جۇماعاليەۆ, رەسەي فەدەراتسياسىنىڭ بايلانىس جانە بۇقارالىق كوممۋنيكاتسيا ءمينيسترى نيكولاي نيكيفوروۆ, قىتاي, كورەيا, ۇلىبريتانيا, پولشا, تۇركيا جانە تمد ەلدەرىنىڭ بايلانىس ۇيىمدارىنىڭ باسشىلارى مەن وكىلدەرى قاتىسۋدا.  بايلانىس اكىمشىلىگى باسشىلارى كەڭەسىنىڭ 49-شى بىرلەسكەن وتىرىسى مەن بوى جانىنداعى اقپاراتتاندىرۋ بويىنشا تمد-عا قاتىسۋشى ەلدەردىڭ ۇيلەستىرۋ كەڭەسىنىڭ 20-شى بىرلەسكەن وتىرىسى قازاقستاندا العاش رەت ءوتىپ وتىر. كەڭەس جۇمىسىن ب.ساعىنتاەۆ اشتى. ول شاراعا كەلگەن قوناقتارعا العىسىن جەتكىزە وتىرىپ, قازاقستانداعى باي­لانىس سالاسىنىڭ جايىنا توقتالدى. «قازاقستان ءۇشىن ءتيىمدى اقپاراتتىق-كوممۋني­كا­تسيا­لىق سالانى دامىتۋ, جاھان­دىق جەلىگە بىرتە-بىرتە ىقپال­داسۋ ەكونوميكالىق ءوسىمدى ايقىندايتىن فاكتور بولىپ تابىلادى. بايلانىس سالاسىنىڭ ءىجو-دەگى ۇلەسى شامامەن 2,5 پايىزدى قۇرايدى. 2013 جىلى كورسەتىلگەن بايلانىس قىزمەتى 4,7 ملرد. اقش دوللارىنا دەيىن ءوستى», دەدى ول. ءبىرىنشى ۆيتسە-پرەمەردىڭ ايتۋىنشا, اق­پاراتتىق-كوممۋنيكاتسيالىق تەح­نولوگيالار سالاسىن دامىتۋ با­عىتىندا جۇرگىزىلگەن جۇيەلى شارالار الەمدىك رەيتينگتەگى قازاقستان ۇستانىمىنىڭ جاقسارا تۇسۋىنە سەپتىگىن تيگىزگەن. اتاپ ايتقاندا, بۇۇ-نىڭ «ەلەكتروندى ۇكىمەت ادامزات ءۇشىن» رەيتينگىسىندە قازاقستان 2013 جىلى 190 ەلدىڭ  ىشىندە 28-ورىنعا تۇراقتاعان. ال 2012 جىلى ەلىمىز 38-ورىندا بولعان ەكەن. دۇنيەجۇزىلىك ەكونوميكالىق فورۋمنىڭ اقپاراتتىق تەحنولوگيالار رەيتينگىسىندە «جەلىلىك دايىندىق» يندەكسى بويىنشا قازاقستان الەمنىڭ 140 ەلى ىشىنەن 38-ورىنعا كوتەرىلدى. «ەگەر ۇيالى بايلانىس تاريفىنە قاتىستى ايتسام, ءبىز قازىر  17-ورىندامىز. 2012 جىلى  42-ورىندا ەدىك. ال بەلگىلەنگەن ينتەرنەت جونىنەن 8-ورىندامىز», دەدى ب.ساعىنتاەۆ. ونىڭ ايتۋىنشا, «اقپاراتتىق قازاقستان» مەملەكەتتىك باع­دارلاماسى اياسىندا ەلىمىزدە يننو­ۆاتسيالىق كوممۋنيكاتسيالىق ينفراقۇرىلىمنىڭ قول­جە­تىم­دىلىگىن قامتاماسىز ەتۋ, اقپاراتتىق ورتا قۇرۋ, وتاندىق اقپارات كەڭىستىگىن دامىتۋ  ماقساتىندا جۇمىستار جۇرگىزىلۋدە. ۇيالى بايلانىس رىنوگىنداعى باسەكەلەستىكتى كۇشەيتۋ ماقساتىندا ءنومىردى اۋىستىرماي-اق ۇيالى بايلانىس جەلىلەرىن اۋىستىرۋ ءمۇم­كىن­دىگى بويىنشا جۇمىستار اتقا­رىلۋدا ەكەن. بۇل مۇمكىندىكتى قازاق­ستاندىق ابونەنتتەر 2015 جىلدان باستاپ قولدانا الماق. ەلىمىزدەگى ءار ەكىنشى تۇرعىن ساندىق تەلەارنامەن قامتىلىپ,  قامتىلۋ 51 پايىزدى قۇراپ وتىر. باعدارلامانى 2015 جىلى اياقتاپ, 95 پايىزعا دەيىن قامتۋ جوسپارلانۋدا ەكەن. ا.جۇماعاليەۆ ءبىرىنشى ۆيتسە-پرەمەردىڭ سوزدەرىن قۋاتتاي كەلە, ەلىمىزدەگى ينتەرنەتتەنۋدىڭ 70%-عا جەتكەندىگىن, ال ۇيالى بايلانىسپەن قامتۋ 160 پايىزدىق مەجەدەن اسقاندىعىن اتاپ ءوتتى. قازاقستان اۋىل تۇرعىندارىن تەلەفونمەن قامتۋ بويىنشا, الىس ەلدى مەكەندەردى ينتەرنەتكە قوسۋ ءۇشىن تالشىقتى-وپتيكالىق ينفراقۇرىلىمدى ودان ءارى دامىتۋدى قولعا الدى. بۇل الداعى 3 جىل بويى جالعاسىپ, جۇزەگە اسىرىلادى, دەي كەلە, وتكىزىلىپ وتىرعان شارانىڭ اۋقىمى كەڭ, ماڭىزى جوعارى ەكەندىگىنە توقتالدى. «قامتىلاتىن, ايتىلاتىن تاقىرىپ اۋقىمى كەڭ»,  دەگەن بايلانىس جانە اقپارات اگەنتتىگىنىڭ توراعاسى قازاقستاندا جاڭا تەلەكوممۋنيكاتسيالىق تەحنولوگيالار مەن قىزمەتتەردى ەنگىزۋ بويىنشا اتقارىلىپ جاتقان ءىس-شارالارمەن جانە ودان ءارى دامۋ جوسپارىمەن ءبولىستى. سونىمەن قاتار, كەڭەس قوناقتارىن بيىلعى جىلدىڭ 6-7 قازانىندا استانادا وتەتىن «ەلەكتروندى ۇكىمەتتىڭ عالامدىق فورۋمى-2014» شاراسىنا قاتىسۋعا شاقىردى. كەڭەس وتىرىسى بارىسىندا حالىقارالىق ەلەكتربايلانىس وداعىنىڭ ەلەكتربايلانىستى دامىتۋ جونىندەگى بۇكىلالەمدىك كونفەرەنتسياسىنىڭ جۇمىسىنداعى بوى بايلانىس باسشىلارىنىڭ قىزمەتى قورىتىندىلانىپ, تمد-عا مۇشە-مەملەكەتتەردىڭ 2015 جىلعا دەيىنگى اقپاراتتىق قوعامدى قۇرۋ جانە دامىتۋداعى ىنتىماقتاستىق ستراتەگياسىنىڭ ورىندالۋ بارىسى تالقىلاندى. بۇدان وزگە, راديوجيىلىك سپەكترىن ءتيىمدى پايدالانۋ جانە ءوزارا كەدەرگىلەردى جويۋعا قاتىستى قۇجاتتار قارالدى. كەڭەستە تاعى ءبىر ماڭىزدى كەلىسىم جوباسى, اتاپ ايتقاندا, حالىقارالىق ەلەكتربايلانىس قىزمەتتەرىن كورسەتۋ بارىسىندا, اسىرەسە, روۋمينگ قىزمەتىن ۇسىنۋدا وپەراتورارالىق ەسەپ ايىرىسۋ قاعيدالارى تۋرالى كەلىسىم جوباسى تالقىلاندى. كەلىسىم جۇزەگە اسسا, بوى قاتىسۋشى ەلدەر اراسىندا روۋمينگ قىزمەتىنە باعا تومەندەمەك. كەڭەس وتىرىسىنىڭ اشىلۋىنان كەيىن ا.جۇماعاليەۆ پەن ن.نيكيفوروۆ بريفينگ وتكىزدى. ولار جۋرناليستەردىڭ كەدەن وداعى اياسىندا روۋمينگ ماسەلەسى قالاي شەشىلمەك دەگەن سۇراعىنا جاۋاپ بەردى. ا.جۇماعاليەۆ تمد مەملەكەتتەرىنىڭ اراسىندا روۋ­مينگ تاريفتەرىن تومەندەتۋ ماسەلەلەرى قارالاتىن كەلىسىمنىڭ بارلىعىن, ونىڭ جوباسى تالقىلاناتىندىعىن العا تارتتى. «بايلانىس وپەراتورلارىنىڭ ءبىر-بىرىمەن جۇمىس جاساۋى جونىندەگى كەلىسىم تالقىلانادى. بۇل كەلىسىمدە روۋمينگ ماسەلەسىنە ارنالعان ءبولىم بار. بۇل تۇتىنۋشىلارعا وتە ماڭىزدى بولعاندىقتان, بولاشاقتا ونىڭ دۇرىس شەشىلۋىنە كۇش-جىگەر جۇمسايمىز», دەدى ول. ءوز كەزەگىندە ن. نيكيفوروۆ: «مەن ارىپتەسىممەن اتالعان تەرريتوريادا روۋمينگتىڭ مۇلدەم الىنىپ تاستالعاندىعىن قالايتى­نى­مىزعا سەنىمدىمىن. ويتكەنى, بۇل كورشى ەلدەر اراسىن­داعى ەكونوميكالىق قارىم-قاتى­ناستاردىڭ دامۋىنا ءتيىمدى اسەر ەتەتىنى ءسوزسىز. ءبىز بۇل ءۇشىن قولدان كەلگەننىڭ بارلىعىن ىستەۋگە دايارمىز. الايدا روۋمينگتى جويۋ تىكەلەي بايلانىس وپەراتورلارىنا بايلانىستى, ءبىزدىڭ جۇمىسىمىز ساياسي تۇرعىدان بولعاندىقتان, قولىمىزدان بايلانىس وپەراتورلارىنىڭ ءبىر-بىرىمەن كەلىسىپ, كەدەرگىلەردى جويۋ­ىنا كومەكتەسۋ عانا كەلەدى», دەدى ن.نيكيفوروۆ. بۇل تالقىلاۋلاردىڭ ناتيجەسى جىل سوڭىندا نەمەسە كەلەسى جىلدىڭ باسىندا بەلگىلى بولادى. ۆەنەرا تۇگەلباي, «ەگەمەن قازاقستان».