قاراعاندى وبلىسىندا ونكوگەماتولوگيالىق اۋرۋلارى بار ناۋقاستاردى تەكسەرۋگە جانە ەمدەۋگە 2,9 ملرد تەڭگە ءبولىندى. مەديتسينالىق ساقتاندىرۋ قورى تەگىن مەديتسينالىق كومەك كورسەتۋ ارقىلى 2,7 ملرد تەڭگە جانە ءمامس پاكەتىنەن 200 ملن تەڭگەدەن اسا قاراجات ءبولۋدى جوسپارلاپ وتىر.
قان اۋرۋلارى بار ناۋقاستاردى ەمدەۋ گەماتولوگيا ورتالىعىندا وتەدى. ورتالىق قاراعاندىدا 2018 جىلدىڭ تامىز ايىنان باستاپ جۇمىس ىستەيدى. بيىل قاراعاندى قالاسى مەن قاراعاندى وبلىسىنىڭ گەماتولوگيا سالاسىنداعى قۇزىرەتتىلىك ورتالىعى رەتىندە جەكە عيماراتقا كوشكەنىن اتاپ وتكەن ءجون. بۇل ورتالىقتا قان اۋرۋىمەن سىرقاتتانعان ناۋقاستاردىڭ ديسپانسەرلىك ەسەپكە دەيىنگى بارلىق كەزەڭدى وتۋىنە مۇمكىندىك جاسالعان. مۇندا كۇندىزگى جانە سىرتتاي كەڭەس بەرەتىن امبۋلاتوريالىق ەمدەۋ, تەكسەرۋ كەزەڭى جانە تاۋلىك بويى نەمەسە كۇندىزگى ستاتسيوناردا ەمدەۋ توپتاستىرىلعان. ورتالىق دەرەگىنە سۇيەنسەك, ورتالىقتىڭ تاۋلىك بويعى جانە كۇندىزگى ستاتسيونارلارىندا قاراعاندى, سونىمەن قاتار باسقا وبلىستاردان 2 مىڭنان اسا ادام ەم الىپتى. ونىڭ 73-76 %-ى قان قاتەرلى ىسىگى بار ناۋقاستار ەكەن.
– ستاتسيوناردى الماستىراتىن كومەككە باستى نازار اۋدارىلدى. كۇندىزگى ستاتسيوناردا بىزدە 16 توسەكتىك ورىن بار. بۇل دياگنوستيكالىق جانە ەمدىك شارالاردى جۇرگىزۋگە مۇمكىندىك بەرەدى. ناۋقاس ەمدەلىپ ورالادى, وسىلايشا ءبىز اۋرۋحاناىشىلىك ينفەكتسيالار قاۋپىن ازايتامىز. قازىر تاۋلىك بويى اۋرۋحاناعا تەك اۋىر ناۋقاستار – جەدەل لەيكوزبەن اۋىراتىندار جاتقىزىلادى. حيميا جانە جوعارى دوزالى تەراپيا جۇرگىزىلەدى, – دەيدى گەماتولوگيا سالاسىنداعى قۇزىرەتتىلىك ورتالىعىنىڭ ديرەكتورى يرينا بالاندينسكايا.
تاۋلىك بويعى ستاتسيونارداعى ناۋقاستار ءبىر ورىندى پالاتادا ەمدەلەدى. ونىڭ اربىرىندە جەلدەتۋ جۇيەسى بار. ءار پالاتادا قاجەتتىلىك تۋىنداعان كەزدە جەدەل جان ساقتاۋ بولمەسى ەتىپ جابدىقتاۋعا بارلىق جاعداي قاراستىرىلعان.
قاراعاندى وبلىسى
