قازىردىڭ وزىندە دارىگەردىڭ قابىلداۋىنا جازىلۋعا, دارىگەردى ۇيگە شاقىرۋعا, تالداۋ ناتيجەلەرىن جانە باسقا دا دەربەس مەديتسينالىق دەرەكتەردى بىلۋگە مۇمكىندىك بەرەتىن تسيفرلىق قۇرال مۇمكىندىكتەرىن پايدالاناتىن پاتسيەنتتەر بار. وسى قىزمەتتەر قازىر ەلەكتروندىق ۇكىمەت پورتالىندا قولجەتىمدى. مەديتسينالىق كومەكتىڭ قولجەتىمدىلىگىن ارتتىرىپ, جۇمىستى ءبىراز شيراتا تۇسەتىن تسيفرلىق جۇيە جونىندە دەنساۋلىق ساقتاۋ ۆيتسە-ءمينيسترى بەيبىت ەسەنباەۆ ءباسپاسوز ءماسليحاتىندا ايتىپ بەردى.
– تۇرعىندار ەلەكتروندىق مەديتسينالىق قۇجاتتارعا قول جەتكىزسە, مەديتسينالىق ۇيىمدارعا قۇجات ءۇشىن باراتىن پاتسيەنتتەر ازايادى. وسى رەتتە دەنساۋلىق ساقتاۋ مينيسترلىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, بىلتىر eGov mobile ءموبيلدى قوسىمشاسىندا «eDensaulyq» سەرۆيسىن ىسكە قوستى. وندا پاتسيەنتتەر ءۇشىن دونورلىق مارتەبە, ەلەكتروندىق رەتسەپتىلەر, مەديتسينالىق قارسى كورسەتىلىمدەر, جۇكتى ايەلدەردى ەسەپكە الۋ جانە ديسپانسەرلەۋ, ەمدەۋگە جاتقىزۋ مەن زەرتحانالىق تالداۋ ناتيجەلەرىن بىلۋگە ارنالعان اقپارات كوپ قامتىلعان. مىسالى, جالپى اقپارات بولىمىندە تۇرعىندار قاي مەديتسينالىق ۇيىمعا تىركەلگەنىن, قاي ۋچاسكەگە قارايتىنىن, ۋچاسكەلىك دارىگەردىڭ دەرەكتەرىن, مىندەتتى الەۋمەتتىك مەديتسينالىق ساقتاندىرۋ شەڭبەرىندە مارتەبەسىن جانە قورعا اۋدارىلعان سوڭعى تولەمنىڭ سوماسى مەن كۇنىن دە كورۋگە بولادى, – دەيدى ب.ەسەنباەۆ.
وسىلايشا, «eDensaulyq» سەرۆيسىنىڭ قىزمەتى كەزەڭ-كەزەڭىمەن كەڭەيەدى. جاقىندا سەرۆيسكە ازاماتتاردىڭ قان توبى جانە باسقا دا اقپاراتتار قوسىلادى. سونىمەن قاتار مينيسترلىك eGov mobile ءموبيلدى قوسىمشاسىنىڭ دارىلىك زاتتاردى ۇلەستىرۋ بولىگىندە الەۋمەتتىك ءاميان جوباسىن ىسكە اسىرىپ جاتىر. مۇندا پاتسيەنت ەمحاناداعى دارىحاناعا بارىپ, QR-كودىن ۇسىنۋ ارقىلى رەتسەپت بويىنشا ءدارى-دارمەك السا بولادى. قاناتقاقتى جوبا قازىر استانا قالاسىنىڭ ەمحانالارىندا جۇزەگە اسۋدا. دەنساۋلىق ساقتاۋ مينيسترلىگى پاتسيەنتتەردى وسى سەرۆيستىڭ مۇمكىندىگىن مولىنان پايدالانۋعا شاقىرىپ جاتىر. جوبانى بيىل ەلىمىزدىڭ باسقا وڭىرلەرىنە ەنگىزۋ جوسپاردا بار ەكەن.
مەملەكەت باسشىسى قاسىم-جومارت توقاەۆ وسىعان دەيىن دەنساۋلىق ساقتاۋ سالاسىندا اقپاراتتاندىرۋ دەڭگەيى تومەن ەكەنىن ايتقان-دى. بۇل مەديتسينا قىزمەتكەرلەرىنە مىندەتتەلگەن جۇكتەمەنىڭ ارتۋىنا اكەپ تىرەۋى مۇمكىن. قازىردىڭ وزىندە دارىگەرلەر ءبىر ۋاقىتتا بىرنەشە جۇيەدە جۇمىس ىستەۋگە ءماجبۇر. ءارى پاتسيەنتتەر ءوزىنىڭ جەكە مەديتسينالىق دەرەكتەرىنە تولىق قول جەتكىزە المايدى. «eDensaulyq» سەرۆيسىندە پاتسيەنتكە قاتىستى بارلىق نەگىزگى دەرەك شوعىرلاندىرىلادى. بۇل دەنساۋلىق ساقتاۋ سالاسىنداعى اقپاراتتىق جۇيەلەردى ءبىر ارناعا توعىستىرۋعا ىقپالداسادى. بۇگىندە دەنساۋلىق ساقتاۋ جۇيەسىندە دارىگەرگە قارالاتىن ۋاقىتتى ناقتىلاۋعا سەپتەسەتىن كوپتەگەن بەيرەسمي كەزەك بار. الايدا پاتسيەنت ءوز كەزەگىنىڭ قاشان كەلەتىنىن ءاردايىم دالمە-ءدال بىلە بەرمەيدى. قازىر وسى بەيرەسمي كەزەكتەر تسيفرلاندىرىلىپ جاتىر. وسى رەتتە eGov mobile قوسىمشاسىنداعى «eDensaulyq» سەرۆيسى پاتسيەنتتەرگە ۇسىنىلاتىن قىزمەتتەردىڭ ءتىزىمىن كورۋگە جانە «كورسەتىلمەگەن قىزمەتتى قوسىپ جازۋ» سىندى فاكتىلەر انىقتالعان جاعدايدا الەۋمەتتىك مەديتسينالىق ساقتاندىرۋ قورىنا جۇگىنۋگە مۇمكىندىك بەرەدى. سونداي-اق مەديتسينالىق كومەك كورسەتۋدىڭ اشىقتىعىن ساقتاۋعا سەپتەسەدى.
