«قالادا 14 مەكتەپتىڭ قۇرىلىسى ءجۇرىپ جاتىر, ونىڭ 11-ءىن كەلەسى وقۋ جىلىندا اشۋدى جوسپارلاپ وتىرمىز. بىرقاتار مەكتەپتىڭ قۇرىلىس بارىسىمەن تانىستىم. ولار قاراساي باتىر مەن بۇلانتى كوشەلەرىنىڭ قيىلىسىندا, كوكسەڭگىر كوشەسىنىڭ بويىندا, ۇلى دالا داڭعىلى مەن ساۋران كوشەسىنىڭ قيىلىسىندا, تۇران داڭعىلىنىڭ بويىندا, تۇران داڭعىلى مەن №24 كوشەسىنىڭ قيىلىسىندا ورنالاسقان», دەدى قالا اكىمى.
ونىڭ ايتۋىنشا, قاراساي باتىر مەن بۇلانتى كوشەلەرىنىڭ قيىلىسىنداعى ءبىلىم ورداسى 87 جىل بۇرىن سالىنعان ەسكى مەكتەپتى الماستىرۋعا مۇمكىندىك بەرەدى. جاڭا وقۋ ورنى ەكى اۋىسىمدا 2 400 وقۋشى ورنىنا شاقتالادى.
سول سياقتى كوكسەڭگىر كوشەسىندەگى (كيرپيچنىي ەلدى مەكەنى) مەكتەپ تە وسىعان دەيىن اپاتتى جاعدايدا دەپ تانىلعان. قازىر بۇل مەكتەپتىڭ ورنىندا جاڭا وقۋ ورنىنىڭ قۇرىلىسى ءجۇرىپ جاتىر. بۇل ەلدى مەكەندە بۇدان باسقا مەكتەپ جوق. سول سەبەپتى وقۋشىلار وزگە اۋداندارعا قاتىناپ وقيدى.
ال تۇران داڭعىلى مەن №24 كوشەسىنىڭ قيىلىسىنداعى جانە ۇلى دالا داڭعىلى مەن ساۋران كوشەسىنىڭ قيىلىسىنداعى ءبىلىم وشاقتارى №85 مەكتەپ-ليتسەيىنىڭ جانە №89 مەكتەپ-ليتسەيىنىڭ ءۇش اۋىسىمدى پروبلەماسىن شەشۋگە مۇمكىندىك بەرەدى. بۇل مەكتەپتەردىڭ ارقايسىسى ەكى اۋىسىمدا 2 400 وقۋشىعا ارنالعان.
«بۇعان قوسا مەملەكەت باسشىسىنىڭ تاپسىرماسى بويىنشا الداعى ەكى جىلدا استانادا «جايلى مەكتەپ» جوباسى اياسىندا 24 مەكتەپ سالىنادى. بۇل نىسانداردىڭ بارلىعى قولايلى, قاۋىپسىز, «اقىلدى» قالانىڭ قاعيداتىنا سايكەس ءبىلىم بەرۋ ساپاسىن ارتتىرۋعا, ادام كاپيتالىن دامىتۋعا وڭ اسەر ەتەدى دەپ ويلايمىز», دەدى ج.قاسىمبەك.
