فوتو: qazaqtimes.com
ءماجىلىس وتىرىسى بارىسىندا ۆەدومستۆو باسشىسى 2022 جىلعى رەسپۋبليكالىق بيۋدجەتتىڭ اتقارىلۋى تۋرالى اقپارات ۇسىندى.
«جوعارى اۋديتورلىق پالاتانىڭ جانە تەكسەرۋ كوميسسيالارىنىڭ اۋديتورلىق ءىس-شارالارىن ەسەپكە الماعاندا 2022 جىلى بيۋدجەت قاراجاتىن ءتيىمسىز پايدالانۋ سوماسى 217 ملرد تەڭگەنى نەمەسە شىعىستاردىڭ جالپى كولەمىنىڭ 1,2%-ىن قۇرادى. بيۋدجەت قاراجاتىن ءتيىمدى جانە تولىق يگەرۋ ءۇشىن اكىمشىلەردىڭ جاۋاپكەرشىلىگىن ارتتىرۋ ءۇشىن شارالار قابىلداندى. 2022 جىلدىڭ قورىتىندىسى بويىنشا ورتالىق جانە اكىمدىكتەردىڭ 113 قىزمەتكەرى تارتىپتىك جاۋاپكەرشىلىككە تارتىلدى, ونىڭ ىشىندە 82 ادام باسشىلىق قىزمەتتەردى اتقارادى», دەدى ول.
جالپى, ونىڭ ايتۋىنشا, بيۋدجەت تۇسىمدەرى 102,1%-عا ورىندالىپ, 16 ترلن 142 ملرد تەڭگەنى قۇرادى. بۇل رەتتە شىعىستار 18 ترلن 532 ملرد تەڭگەگە نەمەسە 98,6%-عا ورىندالدى. ال بيۋدجەت تاپشىلىعى 2 ترلن 391 ملرد تەڭگەنى نەمەسە ءىجو-گە 2,4%-دى قۇرادى.
«بيىلعى جىلدىڭ 1 قاڭتارىنداعى جاعداي بويىنشا قازاقستاننىڭ مەملەكەتتىك قارىزى 25,3 ترلن تەڭگەنى نەمەسە ءىجو-گە 24,9%-دى قۇرادى. ونىڭ ىشىندە ۇكىمەتتىك بورىش ءىجو-گە 21,7% نەمەسە 22 ترلن تەڭگەنى قۇرادى», دەپ قوستى ەرۇلان جاماۋباەۆ.
