وزىپ شىققانعا ءورىس كەڭ

ەلورداداعى ورتالىق كوممۋنيكاتسيالار قىزمەتىندە ۇيىمداستىرىلعان بريفينگ فيزيكا پانىنەن 45-ءشى حالىقارالىق وليمپيادانى (IPHO-2014) وتكىزۋ بارىسىنا ارنالدى. كەشە فيزيكا ءپانى بويىن­شا 45-ءشى حالىقارالىق وليمپيا­دانىڭ رەسمي اشىلۋىنان سوڭ ور­تالىق كوممۋنيكاتسيالار قىزمە­تىندە ءبىلىم جانە عىلىم مينيس­ترى­نىڭ قاتىسۋىمەن كىشىگى­رىم جيىن وتكىزىلدى. وندا وليمپياداعا ەلىمىزدىڭ اتىنان كىمدەر قاتىساتىنى, جەڭىمپاز اتانسا قانداي جەڭىلدىكتەرگە يە بولاتىنى, سونداي-اق, حالىقارالىق وليمپيادانى وتكىزۋدەگى ماقسات جايىندا بىرقاتار مالىمەتتەر بەرىلدى. ءمينيستردىڭ ايتۋىنشا, ەلورداداعى نازارباەۆ ۋنيۆەرسيتەتىندە 13-21 شىلدە ارالىعىندا وتكىزىلەتىن ءبىلىم سايىسىنا الەمنىڭ 85 ەلىنەن 700 قاتىسۋشى كەلىپ وتىر. «وليمپياداعا ۇلتتىق فيزيكالىق وليمپيادالاردىڭ  جەڭىمپازدارى, ونىڭ ىشىندە مەكتەپ بىتىرۋشىلەر مەن جوعارى سىنىپتاردىڭ وقۋشىلارى قاتىسا الادى. قاتىسۋشى ەلدەردىڭ كوماندا قۇرامىنىڭ سانى كۆوتامەن انىقتالادى. مىسالى ءبىزدىڭ ەلىمىزدەن بۇل ايتۋلى سايىسقا بەس وقۋشى قاتىسادى. ولاردىڭ بارلىعى دا فيزيكا ءپانى بويىنشا ءتۇرلى وليمپيادالاردان جوعارى دەڭگەي كورسەتكەندەر. ەگەر دە ولار وليمپيادادان جەڭىمپاز اتانار بولسا, ەلىمىزدەگى جوعارى وقۋ ورىندارىنا ۇبت تاپسىرماي قابىلدانا الادى. سونداي-اق, نازارباەۆ ۋنيۆەرسيتەتىنە دە ەمتيحانسىز قابىلدانادى. بىراق, اعىلشىن ءتىلىن بىلەتىنى تۋرالى قۇجات قاجەت بولادى», دەدى مينيستر ا.ءسارىنجىپوۆ. بريفينگ بارىسىندا حالىقارالىق وليمپياداعا ەلىمىزدىڭ وسىمەن ون جەتىنشى رەت قاتىسىپ وتىرعانى, وسى جىلدار ىشىندە 45 مەدال يەلەنگەنى, ونىڭ 8-ءى التىن, 20-سى كۇمىس جانە 17-ءسى قولا ەكەنى ايتىلدى. ال, باق سىناۋعا كەلگەن 85 مەملەكەتتىڭ ىشىندە كىم مىقتى دەگەن ساۋالعا جاپونيا مەن قىتايدىڭ كوماندالارى مىقتى دەگەن جاۋاپ بەرىلدى. سونداي-اق, ءبىزدىڭ كوماندانىڭ ەڭ ۇزدىك دەگەن وندىققا ىلىنبەسە دە, ەڭ مىقتى 20 كوماندانىڭ اراسىنان تابىلىپ, جۇلدەلى ورىندارعا تالاساتىنى  دا ءمينيستردىڭ اۋزىمەن باياندالدى. ءبىلىم جانە عىلىم ءمينيسترى قازىرگى ۋاقىتتا عىلىمدى قولداۋ جانە قارجىلاندىرۋ  باعىتىنداعى جاعداي 90-شى جىلدارعا قاراعاندا تۇبەگەيلi وزگەرگەنىن, بۇگىندە عىلىم تۋرالى زاڭ ەنگiزiلىپ, ونىڭ اياسىندا قارجىلاندىرۋ ۇلعايىپ وتىرعانىن مالىمدەدى. اتاپ ايتقاندا, بازالىق, گرانتتىق جانە ماقساتتىق قارجىلاندىرۋ شەڭبەرىندە جىل سايىن قۇيىلاتىن قاراجاتتىڭ سانى ارتىپ, بىلتىر سالاعا 10 ملرد. تەڭگە بولىنگەن. ونىڭ ايتۋىنشا, اعىمداعى جىلى قازاقستاندىق عالىمداردىڭ 2000-نان استام حالىقارالىق عىلىمي جاريالانىمدارى جارىققا شىعادى دەپ جوسپارلانۋدا. بۇل وتكەن جىلمەن سالىستىرعاندا, 10-20 پايىزعا جوعارى. سونداي-اق, ەلىمىز وقۋشىلاردىڭ عىلىمي-زەرتتەۋ جۇمىستارىنا قىزىعۋشىلىعىن ارتتىرۋ, دارىندى بالالاردى قولداۋ ءۇشىن عىلىم مەن ءبىلىمدى ناسيحاتتاۋ بارىسىندا ءتۇرلى وليمپيادالارعا دا باسىم تۇردە ماڭىز بەرەدى. بيىل ەل ورداسى استانادا وتكىزىلىپ وتىرعان حالىقارالىق وليمپيادا سونىڭ ناتيجەسى. ايتا كەتەيىك, فيزيكا ءپانى بويىنشا وتكىزىلەتىن وسىناۋ حالىقارالىق ءبىلىم سايىسىندا ەلىمىزدىڭ اتىنان شىعاتىن كوماندادا رەسپۋبليكالىق ءپان وليمپياداسىنىڭ, حالىقارالىق جاۋتىكوۆ وليمپياداسىنىڭ, سون­داي-اق, باسقا دا حالىقارالىق وليم­پيا­دالاردىڭ التىن, كۇمىس, قولا مەدالدارىنا يە بولعان بەس وقۋشى بار. ولار – ءامىر ءبىرالين, دانات يسا, دىنمۇحاممەد نۇربەك, نۇريسلام تۇرسىنبەك جانە داۋلەت قۇرمانتاەۆ ەسىمدى ەلىمىزدىڭ ءتۇرلى وڭىرلەرىنەن جينالعان ءبىلىمى اسقان ورەندەر. ايگۇل سەيىلوۆا, «ەگەمەن قازاقستان».