سونداي وقيعالاردىڭ ءبىرى تاياۋ كۇندەرى ەلوردامىزدىڭ ق.رىسقۇلبەكوۆ كوشەسىندە تىركەلدى. 45 جاستاعى ەر ادام 6-قاباتتىڭ تەرەزەسىنەن سەكىرەمىن دەپ قوقان-لوقى جاسايدى. تۇرعىنداردىڭ شاقىرۋىنا دەر كەزىندە كەلگەن ءتارتىپ ساقشىلارى ادىلەت دالاباەۆ پەن نۇرعازى مارات جاعدايدىڭ جاي-جاپسارىن انىقتاپ, تۇرعىندى قۇتقارۋ شارالارىن قابىلدايدى. بىرەۋى تومەندە سۋيتسيد جاساماقشى بولعان ازاماتتى رايىنان قايتارۋعا تىرىسىپ اڭگىمەگە تارتادى, ەكىنشىسى اسا ساقتىقپەن ونىڭ پاتەرىنە ەنىپ, ارتىنان دىبىسسىز كەلىپ قاۋسىرا قۇشاقتاپ الادى. وسىلايشا, ءولىم اۋزىنان اراشالاپ قالدى. قۇتقارىلعان ەر ازاماتتىڭ مۇنداي قادامعا بارۋىنا نە يتەرمەلەگەنىن ماماندار انىقتاپ جاتىر.
تاعى ءبىر وقيعا پاۆلودار وبلىسىنىڭ ەكىباستۇز قالاسىنداعى كوپقاباتتى ۇيلەردىڭ بىرىندە بولدى. 13 مامىر كۇنى ساعات 13.40 شاماسىندى پوليتسيا باسقارماسىنىڭ كەزەكشى بولىمىنە س.تورايعىروۆ كوشەسىندە ورنالاسقان بەس قاباتتى ءۇيدىڭ توبەسىنەن ەر ادامنىڭ سەكىرگەلى تۇرعانى تۋرالى حابارلاما كەلىپ تۇسكەن. وقيعا ورنىنا دەرەۋ جەتكەن ۋچاسكەلىك پوليتسيا ينسپەكتورلارى نۇرسۇلتان سەرىكباەۆ پەن ماۋلەت قارىباەۆ «ماعان جاقىنداماڭدار! ايتپەسە قازىر سەكىرىپ كەتەمىن!» دەپ ايقايلاپ تۇرعان جىگىتتى كورەدى.
– توبەگە كوتەرىلىپ, ونىمەن سويلەسە باستادىم. ۋاقىت سوزۋ ءۇشىن سۇراقتار قويدىم. ول بۇگىن ءوزىنىڭ تۋعان كۇنى ەكەنىن جانە ونى ءبىر ادامدار رەنجىتكەنىن ايتتى. مەن سوعان بولا سەكىرمەي-اق, ەكەۋمىز بىرگە وسى ماسەلەنى شەشەيىك دەپ ۇسىنىس تاستادىم, – دەيدى نۇرسۇلتان سەرىكباەۆ. ەر ازاماتتى الداۋسىراتىپ كوڭىلىنە جول تابا بىلگەن ۋچاسكەلىك پوليتسەي ونى وزىنە تارتىپ, رايىنان قايتاردى. 28 جاستاعى تۇرعىن دارىگەرلەرگە تاپسىرىلدى.
بۇگىندە ەرەسەكتەردى بىلاي قوعاندا, ون ەكىدە ءبىر گ ۇلى اشىلماعان, ءالى ءومىر كورمەگەن بوزبالالار مەن بويجەتكەندەر اراسىندا دا سەكىرىپ ولۋگە تالپىنۋشىلار از ەمەس. ۇلكەن ادامداردى ءومىردىڭ قيىندىعىن كوردى دەپ اقتاۋعا بولاتىن شىعار, ال جاسوسپىرىمدەردىڭ مۇنداي قادامعا بارۋىنا نە سەبەپ؟ ماسەلەن, جاقىندا ورالدىق پوليتسەيلەر كوپقاباتتى ءۇيدىڭ شاتىرىنان سەكىرمەك بولعان جاستى قۇتقارىپ قالدى.
سۋيتسيد جاساعىسى كەلگەن كەيىپكەرىمىز – 15 جاستاعى جەتكىنشەك. 102 ارناسىنا كامەلەتكە تولماعان قىزدىڭ جوعالىپ كەتكەنى تۋرالى اقپارات 12 مامىر كۇنى كەشكە كەلىپ تۇسكەن. دەپارتامەنتتىڭ بارلىق جەكە قۇرامى ونى ىزدەۋگە جۇمىلدىرىلادى. قىز ەرتەڭىنە, ياعني 13 مامىر كۇنى تاڭەرتەڭ كوپقاباتتى ءۇيدىڭ توبەسىنەن سەكىرگەلى تۇرعان جەرىنەن تابىلعان. يۋۆەنالدى پوليتسيا ينسپەكتورلارى رامازان جادىگەروۆ پەن ءادىل ساقىپكەرەەۆ جەتكىنشەكتى ۋاقىتىندا رايىنان قايتارىپ, امان الىپ قالدى. قازىر ونىمەن پسيحولوگتەر جۇمىس ىستەپ جاتىر. وقيعانىڭ سەبەپتەرى بويىنشا تەرگەۋ ارەكەتتەرى جۇرگىزىلۋدە.
كوكشەتاۋ قالاسىندا دا 14 جاستاعى قىز شاتىردان سەكىرىپ ولمەك بولعان. بىراق ءتارتىپ ساقشىلارىنىڭ ساۋاتتى ءارى ۋاقتىلى ارەكەتى ارقاسىندا ورىمدەي جاس امان قالعان. جەدەل بايلانىس ورتالىعىنا قوڭىراۋ شالعان ادام ءوزىنىڭ تانىسى اباي كوشەسىندەگى كوپقاباتتى ءۇيدىڭ توبەسىنەن سەكىرۋگە كوتەرىلگەنىن حابارلايدى. وقيعا ورنىنا پاترۋلدىك پوليتسەيلەر بەيبىت سادىقوۆ پەن ءادىلحان قويباعار, سونداي-اق پوليتسيانىڭ تىرەك پۋنكتىندە بولعان قىزمەتكەر ناريمان نۇرجاقسين كەلەدى. جاعدايدى بىردەن باعالاعان ولار ويلانباستان جوعارىعا قاراي جۇگىرىپ, 12-قاباتتى ءۇيدىڭ شاتىرىندا تۇرعان 2009 جىلعى جاسوسپىرىممەن سويلەسىپ, رايىنان قايتارا الدى.
