اسكەري انت قابىلدادى

وتان قورعاۋشىلار الاڭىنداعى «وتان-انا» مونۋمەنتى جانىندا ۇلتتىق ۇلاننىڭ استانا گارنيزونىنا قاراستى اسكەري بولىمدەرىنىڭ جاس ساربازدارى سالتاناتتى تۇردە اسكەري انت قابىلدادى. جاس جاۋىنگەر سىنىنان وتكەن ءۇش ءجۇز الپىستان استام سارباز وتان قور­عاۋشىلارمەن تەڭقۇقىلى ساپتا بوي تۇزەۋ ءۇشىن وتانعا ادال بولۋعا, قالت­قىسىز قىزمەت ەتۋگە, اسكەري ءومىردىڭ قيىن­دىقتارى مەن اۋىرتپالىقتارىنا توتەپ بەرۋگە سالتاناتتى تۇردە سەرت بەردى. حالىققا, ەل مەن ەلباسىنا, سونداي-اق, وزىڭە سەرت بەرۋ – تامىرى تەرەڭدە جات­قان ەرەكشە جاۋىنگەرلىك ءراسىم. قازاق­ستان رەسپۋبليكاسىنىڭ ءاربىر ازا­ماتى قارۋلى كۇشتەر قاتارىنا ەنەر الدىندا اسكەري انت قابىلداۋى ءتيىس. وسى ءبىر ماڭىزى زور قۇقىقتىق ءجا­نە مورالدىق-ساياسي قادام اسكەري قىز­مەت­تىڭ مەملەكەتتىك ماڭىزىن اڭعارتادى. قازاقستان رەسپۋبليكاسى قارۋلى كۇشتەرى اسكەري انتىنىڭ ءماتىنى 1992 جىلى 25 تامىزدا قازاقستان رەسپۋبليكاسى پرەزيدەنتىنىڭ جارلىعىمەن بەكىتىلگەن. بۇل انت مەملەكەتتىڭ ازاتتىعى مەن تاۋەلسىزدىگىن, ابىرويىن جانكەشتىلىكپەن قورعاۋدىڭ قۇقىقتىق جانە ادامگەرشىلىك سيپاتىن ايقىنداپ, جاۋىنگەردەن توزىمدىلىك پەن بىربەتكەيلىكتى, ۋادەگە بەرىكتىكتى تالاپ ەتەدى. سالتاناتتى شاراعا ۇلتتىق ۇلان باس قولباسشىلىعىنىڭ, مەملەكەتتىك ورگانداردىڭ, قوعامدىق ۇيىمداردىڭ وكىلدەرى, سونداي-اق, ۇلتتىق ۇلان جانە لوكالدى سوعىس ارداگەرلەرى, قالالىق №25 مەكتەپ وقۋشىلارى, قازاقستاننىڭ تۇكپىر-تۇكپىرىنەن كەلگەن ساربازداردىڭ اتا-انالارى قاتىستى. اسكەري انت قابىلداۋ ءراسىمى 1995 جىلدىڭ 17 ساۋىرىندە تاجىك-اۋعان شەكاراسىندا جاۋىنگەرلىك مىندەتىن اتقارۋ كەزىندە مەرت بولعان ىشكى اسكەردىڭ 17 جاۋىنگەرىنىڭ ەسكەرتكىشىنە گۇل شوقتارىن قويۋ داستۇرىمەن باستالدى. قۇرمەتتى قاراۋىل اسپانعا ءۇش دۇركىن ساليۋت بەرىپ, جينالعان جۇرتشىلىق جانقيارلىقپەن قازا تاپقان ەرلەردى 1 مينۋتتىق ۇنسىزدىكپەن ەسكە الىپ, تاعزىم ەتتى. اسكەري انت قابىلداۋ راسىمىنەن سوڭ گارنيزوننىڭ جاس جاۋىنگەرلەرى سالتاناتتى مارش جاسادى. وسى جىلى ازاماتتىق بورىشىن وتەپ, وتان قورعاۋ ءۇشىن قازاقستان رەسپۋبليكاسى ۇلتتىق ۇلانىنىڭ قاتارىنا بەس مىڭنان اسا اسكەري قىزمەتشى الىندى. ەندى ولاردىڭ الدىندا ازاماتتاردىڭ قۇقىقتارى مەن بوستاندىقتارىن قورعاۋ, حالىقتى قىلمىستىق جانە باسقا دا زاڭعا قايشى ارەكەتتەردەن قورعاۋ مىندەتى تۇر, دەپ حابارلادى قر ۇلتتىق ۇلانىنىڭ ءباسپاسوز قىزمەتى.