بالىق شارۋاشىلىعىنا قاتىستى قۇزىرلى مەملەكەتتىك ورگاندار جانە اۋدان, قالا اكىمدىكتەرىنىڭ سالاعا جاۋاپتى ورىنباسارلارى مەن شارۋا قوجالىقتىڭ يەلەرى قاتىسقان جيىندا وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى جانۋارلار دۇنيەسىن قورعاۋ ءبولىمىنىڭ باسشىسى دانيار سەيىتوۆ وڭىردە 2030 جىلعا دەيىن تاۋارلى بالىق ءوسىرۋ كولەمىن 20 مىڭ تونناعا جەتكىزۋ جوسپارلانعانىن ءمالىم ەتتى. وبلىستا جەرگىلىكتى ماڭىزى بار 104 سۋ ايدىنى 88 تابيعات پايدالانۋشىعا بەكىتىلىپ بەرىلگەن. تاۋارلى بالىق وسىرۋمەن 146 كاسىپكەرلىك سۋبەكتىسى اينالىسادى.
بالىق شارۋاشىلىعىن دامىتۋعا مەملەكەتتىك قولداۋلار كورسەتىلەدى. مىسالى, اكۆاوسىرۋ بويىنشا بيىلعا جەرگىلىكتى بيۋدجەتتەن 500 ملن تەڭگە ءبولىنىپ, بۇگىندە 26 شارۋاشىلىققا سۋبسيديا بەرىلۋدە. بۇدان بولەك, ينۆەستيتسيالىق سالىمداردى سۋبسيديالاۋعا بيىلعا رەسپۋبليكالىق بيۋدجەتتەن 226 ملن تەڭگە قارالعان. بۇگىندە جوسپارعا سايكەس جاڭادان 20 توعاندى بالىق شارۋاشىلىعى, ونىڭ ىشىندە تورتەۋى ۇيىرگەلىك اۋلادا اشىلعان. الداعى ۋاقىتتا وسى باعىتتا جۇمىستاردى قارقىندى جۇرگىزىپ, نورماعا سايكەس وبلىس تۇرعىندارىنىڭ بالىق ءونىمىن تۇتىنۋىن تولىق قامتاماسىز ەتۋ جانە بالىق ونىمدەرىنىڭ ەكسپورتىن ارتتىرۋ جوسپارلانىپ وتىر. دەگەنمەن كونكۋرستىق نەگىزدە بالىق شارۋاشىلىعىن جۇرگىزۋ ءۇشىن تابيعات پايدالانۋشىلارعا بەكىتىلىپ بەرىلگەن جەرگىلىكتى ماڭىزى بار 21 سۋ ايدىنىندا تابيعات پايدالانۋشىلارمەن كەلىسىمشارت تالاپتارىنىڭ مەرزىمىندە ورىندالماۋىنا بايلانىستى, شارتتى بىرجاقتى بۇزۋ شارالارى جۇرگىزىلۋدە.
جيىندا بىرقاتار ۇسىنىستار دا ايتىلدى. مىسالى, سۋ ايدىندارى مەن توعانداردىڭ ايماعىنان شارۋاشىلىقتاردى دامىتۋ ءۇشىن جەر تەلىمدەرىن راسىمدەۋدى ۋاقتىلى, تەز ارادا زاڭداستىرۋ, بالىق شارۋاشىلىقتارىنىڭ كولەمى مەن سانىنىڭ كوبەيۋىنە بايلانىستى, اكۆاوسىرۋ بويىنشا كەتكەن شىعىنداردىڭ كولەمىن سۋبسيديالاۋعا قوسىمشا قارجى ءبولۋ قاجەتتىگى ايتىلدى. بۇل ورايدا وبلىس اكىمى بالىق شارۋاشىلىعىمەن اينالىساتىن كاسىپكەرلەرگە جان-جاقتى قولداۋ كورسەتۋ جانە جاڭادان بالىق شارۋاشىلىعى نىساندارىن اشۋ جوسپارىن ورىنداۋدى جۇكتەدى.
سونداي-اق وبلىس اكىمى دارحان ساتىبالدى بالىق شارۋاشىلىعىن جۇرگىزۋ ءۇشىن بەكىتىلگەن 91 سۋ ايدىنىن قايتادان تالداپ, زەردەلەۋدى, ەكسپورتقا دەن قويۋدى تاپسىردى. بالىق شارۋاشىلىعى سالاسىنا ينۆەستيتسيالار تارتۋ جۇمىسىن كۇشەيتۋ قاجەت ەكەنى ايتىلدى.
«بالىق شارۋاشىلىعىمەن اينالىساتىن كاسىپكەرلەرگە جان-جاقتى قولداۋ كورسەتىلۋى كەرەك. ينۆەستورلار تارتۋ ماڭىزدى. بالىق ازىقتارى مەن بالىق ونىمدەرىن وڭدەيتىن زاۋىت, كاسىپورىن اشۋعا نيەت بىلدىرگەن تۇلعالارعا جاڭادان جانە تابيعات پايدالانۋشىلارعا كونكۋرستىق نەگىزدە بەكىتىلگەن سۋ ايدىندارى مەن جۇمىس ىستەپ تۇرعان توعاندى بالىق شارۋاشىلىقتارىن ودان ءارى دامىتۋ ماقساتىندا اينالاسىنان جەر ۋچاسكەلەرىن بەرۋدى قاراستىرۋ قاجەت. بالىق شارۋاشىلىعىن دامىتۋ ماقساتىندا 2023-2025 جىلدارعا ارنالعان جاڭادان بالىق شارۋاشىلىعى نىساندارىن اشۋ جوسپارىنىڭ ورىندالۋى قامتاماسىز ەتىلىپ, اتقارىلعان جۇمىستار بويىنشا ءار توقسان سايىن تابيعي رەسۋرستار جانە تابيعات پايدالانۋدى رەتتەۋ باسقارماسىنا ەسەبى بەرىلۋى كەرەك. بالىق شارۋاشىلىعىمەن اينالىسۋشىلارعا كاسىپتەرىن دامىتۋ ءۇشىن جەڭىلدەتىلگەن نەسيە بەرۋ قامتاماسىز ەتىلسىن. كونكۋرستىق نەگىزدە بالىق شارۋاشىلىعىن جۇرگىزۋ ءۇشىن بەكىتىلىپ بەرىلگەن جەرگىلىكتى ماڭىزى بار سۋ ايدىندارىندا تابيعات پايدالانۋشىلارىمەن اتقارىلعان جۇمىستارىنا تالداۋ جۇرگىزىلىپ, شارت تالاپتارىن ورىنداماعان تابيعات پايدالانۋشىلارمەن شارتتى بىرجاقتى بۇزۋ شارالارى اتقارىلۋى ءتيىس. زاڭعا سايكەس رەزەرۆتەگى سۋ ايدىندارىن كونكۋرستىق نەگىزدە تابيعات پايدالانۋشىلارعا بەكىتىپ بەرۋ جۇمىستارى جالعاسادى», دەدى وبلىس اكىمىنىڭ ورىنباسارى ەرمەك كەنجەحان ۇلى.
ايتا كەتەيىك, بالىق شارۋاشىلىعىمەن اينالىساتىن 14 كاسىپكەر «تۇركىستان اكك» اكتسيونەرلىك قوعامى ارقىلى 5,4 ملرد تەڭگە كولەمىندە جەڭىلدەتىلگەن نەسيە الۋ بويىنشا قۇجاتتارىن جيناقتاپ, وتكىزۋدە. وبلىستا جالپى قۋاتتىلىعى جىلىنا 15 مىڭ توننا بولاتىن 7 بالىق وڭدەۋ زاۋىتى جۇمىس ىستەيدى. وعان قوسىمشا 2023-2024 جىلدارى جەكە ينۆەستورلارمەن 1 ملرد 700 ملن تەڭگەگە بالىق ازىقتارىن شىعاراتىن, قۋاتتىلىعى جىلىنا 10 مىڭ توننالىق 2 زاۋىت اشۋ جوسپارلانىپ, جۇمىس جۇرگىزىلىپ جاتىر.
تۇركىستان وبلىسى
