سۋرەتتى تۇسىرگەن رۋسلان كادىروۆ
بيىل كوكتەرەك, المالى اۋىلدارىندا مادەنيەت ءۇيى, بىرلىك, توپولەۆكا اۋىلدارىندا جاڭا مەكتەپ بوي كوتەرەتىن بولادى. بۇل تۇرعىنداردىڭ كوپتەن ايتىپ جۇرگەن تىلەگى ەدى. قازىر ماماندار كۇن-ءتۇن دەمەي جۇمىس ىستەپ, نىسانداردى مەرزىمدى ۋاقىتىندا تاپسىرۋعا كۇش سالىپ جاتىر.
بىرلىك اۋىلىندا «قۇرىلىسشى تبس» جاۋاپكەرشىلىگى شەكتەۋلى سەرىكتەستىگى قولعا العان 25 ورىندىق شاعىن ورتالىعى بار 120 وقۋشىعا ارنالعان جاڭا مەكتەپتىڭ قۇرىلىسى جالعاسىپ جاتىر. قۇرىلىس جۇمىستارى الدىڭعى جىلدىڭ قاراشا ايىنان باستاۋ السا دا قىمباتشىلىققا وراي وتكەن جىلى نىساننىڭ جوبالىق-سمەتالىق قۇجاتتاماسىنا تۇزەتۋ ەنگىزىلگەن. سوعان قاراماستان بۇگىندە جوبالانعان اۋقىمدى جۇمىستىڭ دەنى رەتتەلىپ, جاڭا وقۋ جىلىنا دەيىن شاكىرتتەرگە مەكتەپ ەسىگى ايقارا اشىلاتىن بولادى.
«قازاندىق پەن ستاديوننىڭ سالىنۋى جانە اۋماقتىڭ اباتتاندىرىلۋىن قوسقاندا مەكتەپ قۇرىلىسىنىڭ جالپى قۇنى – 1 ملرد 389 ملن 520 مىڭ تەڭگە. بيىلعا دەيىن وسى قارجىنىڭ 749 ملن 451 مىڭى يگەرىلدى, جۇمىس جوسپارعا ساي ءجۇرىپ جاتىر», دەيدى قۇرىلىس, ارحيتەكتۋرا جانە قالا قۇرىلىسى ءبولىمىنىڭ باسشىسى مۇراتبەك رىمباەۆ.
بىرلىك ورتا مەكتەبىنىڭ قازىرگى بالالار وقىپ جۇرگەن ەكى قاباتتى عيماراتى 1971 جىلى سالىنعان. وندا اكت زالى مەن سپورت زالى جوق. ورىن جەتىسپەيدى, سوندىقتان مۇنداعى 123 وقۋشى ەكى اۋىسىمدا وقۋعا ءماجبۇر. ولاردىڭ كوز الدارىندا قابىرعالارى بيىكتەپ, كۇننەن-كۇنگە ارلەنگەن زاماناۋي مەكتەپتىڭ پايدالانۋعا بەرىلەر ءساتىن اسىعا توسىپ جۇرگەنى داۋسىز.
قابىرعالارى ارلەنىپ, شاتىرى قاعىلىپ, ەلەكترمەن جابدىقتالىپ, جىلۋ تراسساسى, كارىز جۇيەسى تولىقتاي ىسكە قوسىلىپ الىستان كوز تارتاتىن عيماراتتىڭ وڭدەۋ جۇمىستارى بەلگىلەنگەن مەرزىمدە جۇزەگە اسىرىلسا, تامىزدىڭ اياعىندا بەرىلمەيتىن نەسى قالدى؟
ۋچاسكە جەتەكشىسى مارات ءىلياسوۆتىڭ ايتۋىنشا قۇرىلىسقا 60 جۇمىسشى تارتىلىپ, 7 بلوكتان تۇراتىن نىساندا شاكىرتتەر ءۇشىن بارلىق جاعداي قاراستىرىلعان دەسەدى.
ەكىاشا اۋىلدىق وكرۋگىنە قاراستى توپولەۆكا اۋىلىنداعى 25 ورىندى شاعىن ورتالىعى بار 80 وقۋشىعا ارنالعان مەكتەپ قۇرىلىسىنا بيۋدجەت قورجىنىنان 1 ملرد 315 ملن 497 مىڭ تەڭگە ءبولىنىپتى. وسى قارجىنىڭ جارتىسىنا جۋىعى يگەرىلىپ, مەردىگەر تامىز ايىنىڭ باسىندا جاڭا نىساندى پايدالانۋعا بەرۋدى كوزدەپ وتىر.
مۇندا دا 48 ادام, 7 تەحنيكا جۇمىلدىرىلىپ, قاۋىرت جۇمىس قىزعان شاق. ءۇش قاباتتى مەكتەپتىڭ شاتىرى جابىلىپ, تەرەزە بلوكتارى ورناتىلىپ, ارلەۋ جۇمىستارى تالاپقا ساي جۇرگىزىلۋدە. سۋ قۇبىرى, كارىز جانە جىلۋ جۇيەلەرى جۇمىس ىستەپ تۇر. ىشكى ارلەۋ جۇمىستارى قارقىندى ءجۇرىپ, سپورت الاڭدارىنا اسفالتبەتون توسەلىپ, جوبا تالابىنا سايكەس سالىنىپ جاتقان ەڭسەلى جاڭا نىسان ءبىلىم تەڭىزىنە بويلاۋدى ماقسات تۇتقان جاس ورەندەردىڭ التىن ۇياسىنا اينالارى ءسوزسىز.
كەلەسى ايالداعان نىسان – المالى اۋىلىندا قۇرىلىسى ءجۇرىپ جاتقان مادەنيەت وشاعى. ۋچاسكە جەتەكشىسى قايرات راحىمبەرديەۆتىڭ ايتۋىنشا قازىنادان 503 ملن 710 مىڭ تەڭگە ءبولىنىپ, 30 شاقتى ازامات جۇمىسقا تارتىلىپ, 140 ورىنعا لايىقتالعان مادەني-تۇرمىستىق نىسان قۇرىلىسىنىڭ 40 پايىزى ورىندالعان. اعىمداعى جىلدىڭ شىلدە ايىنىڭ باسىندا مادەنيەت ءۇيىن قولدانىسقا بەرۋ جوسپارى تۇر.
ال اۋداندىق ىشكى ساياسات, مادەنيەت, تىلدەردى دامىتۋ جانە سپورت ءبولىمىنىڭ باسشىسى دامير كايپوۆتىڭ سوزىنشە اتالعان نىسانعا 23 ملن 159 مىڭ تەڭگەگە ماتەريالدىق-تەحنيكالىق بازانى جابدىقتاۋ جوسپارلانۋدا. اۋىلدىق مادەنيەت ءۇيى قىزمەتكەرلەرىنەن بولەك كىتاپحاناشىلار دا وسىندا ورنالاسادى. مادەنيەت نىسانىنا 14 شتات بىرلىگى قاراستىرىلىپ وتىر. جەرتولەسىنەن ترەناجەر زالى اشىلىپ, ول جەرگە تەننيس ۇستەلىن ورناتۋ دا جوسپاردا بار. وتكەن عاسىردىڭ 1967 جىلدارى سالىنعان عيماراتتى «گرادسترويسەرۆيس» جشس قازىرگى زامانعا ساي ورنەكتەپ, قالىپقا كەلتىرەتىن كۇن دە الىس ەمەستەي.
