بىرەر كۇن بۇرىن پايدالانۋعا بەرىلگەن ويىن الاڭقايى ورتالىقتاعى كوشە بالالارىنىڭ يگىلىگىنە اينالدى. مۇنداي نىساندار وبلىس ورتالىعىندا الداعى ۋاقىتتا دا تولاسسىز سالىنا بەرمەك. ويتكەنى يگى ىسكە جاناشىر دەمەۋشىلەر جەتكىلىكتى.
«بالالاردىڭ قۋانىشىن كورگەننەن اسقان باقىت جوق شىعار. «تارازستروي-2004» جاۋاپكەرشىلىگى شەكتەۋلى سەرىكتەستىگى بالالارىمىزعا ارناپ, سپورتتىق جانە ويىن الاڭقايىن تارتۋ ەتىپ وتىر. بۇل ءبىزدىڭ سۇيىكتى قالامىزدىڭ كىشكەنتاي تۇرعىندارى ءۇشىن ۇلكەن سىي بولدى. قالا اكىمدىگىنىڭ ۇسىنىسىنا قولداۋ ءبىلدىرىپ, العاش بولىپ ىسكە كىرىسكەن «تارازستروي-2004» جشس باسشىلارىنا مىڭ العىس. وسى ورايدا قالامىزداعى ءىرى كاسىپكەرلەر, اتىمتاي جومارت ازاماتتار «تارازستروي-2004» سەرىكتەستىگىنەن ۇلگى الىپ, شاھار تۇرعىندارىنىڭ يگىلىگىنە جارايتىن نىساندار سالسا دەگەن تىلەك بار», دەيدى تاراز قالاسىنىڭ اكىمى باقىتجان ورىنبەكوۆ.
جاڭادان پايدالانۋعا بەرىلگەن الاڭقايدا شاعىن اتراكتسيوندار, اتكەنشەكتەر بار. سونداي-اق بالالاردىڭ جاراقات الماۋى ءۇشىن ارنايى جۇمساق ماتەريال توسەلگەن. قىسقاسى بۇلدىرشىندەردىڭ الاڭسىز ويناۋى ءۇشىن بارلىق مۇمكىندىك قاراستىرىلعان.
«قازاق حالقى «ۋادە – قۇداي ءسوزى» دەگەندى تەككە ايتپاعان عوي. ءبىز ءوز مىندەتىمىزگە العان بالالارعا ارنالعان ويىن الاڭقايىن مەجەلەنگەن ۋاقىتتا تاپسىرىپ وتىرمىز. ەڭ باستىسى سوزىمىزدە تۇردىق», دەيدى «تارازستروي-2004» جشس باسشىسىنىڭ ورىنباسارى ءمادي يزەنباەۆ.
تاراز
