استانا. 13 شىلدە. بۇگىن ءتۇن ورتاسى اۋا ريو-دە-جانەيرو قالاسىندا گەرمانيا جانە ارگەنتينا قۇراما كوماندالارى الەم چەمپيوناتىنىڭ ەڭ سوڭعى فينالدىق ويىنىن وينادى. ماتچتىڭ نەگىزگى ۋاقىتىندا ەسەپ اشىلمادى. ويىننان كەيىن بەلگىلەنگەن ەكسترا-تايمدا نەمىستەر 1:0 ەسەبىمەن جەڭىسكە جەتتى. بۇل تۋرالى egemen.kz حابارلادى.
جەڭىس دوبىن سوققان ماريو گيوتتسە كەزدەسۋدىڭ ۇزدىك ويىنشىسى اتاندى.
بۇعان دەيىن گەرمانيا – 3, ارگەنتينا 2 رەت الەم چەمپيونى اتاعىن جەڭىپ العان بولاتىن. ال سوڭعى ۇتىستىڭ ناتيجەسىندە نەمىستەر مۇنىڭ سانىن تاعى بىرەۋگە ارتتىرىپ, 5 دۇركىن جەڭىمپاز بولعان برازيلياعا جاقىنداي ءتۇستى.
ال گەرمانيا مەن ارگەنتينا تەكەتىرەسىنىڭ تاريحى باي ەدى. بۇل ءۇشىن بۇگىنگى كەزدەسۋدىڭ فينالدىق ويىننىڭ ءۇشىنشىسى بولىپ وتىرعانىن ايتساق تا جەتكىلىكتى. كوماندالار فينالدىق ماتچ دەڭگەيىندە 1:1 ەسەبىمەن تەڭ بولىپ كەلدى. ديەگو مارادونا باستاعان ارگەنتينالىقتار 1986 جىلى 3:2 ەسەبىمەن جەڭىسكە جەتسە, نەمىستەر 1990 جىلى 1:0 ەتىپ قارىمتا قايتاردى. جاساقتار بۇدان بولەك, 2006 جانە 2010 جىلدارعى مۋنديالدا ۇشىراستى. بۇلاردىڭ العاشقىسىندا بۋندەستيم نەگىزگى ۋاقىتتا 1:1 بولىپ تەڭ ويناپ, پەنالتيدەن 4:2 ەسەبىمەن باسىم تۇسكەن. كەلەسىسىندە «نەمىس ماشينەسى» 4:0 ەسەبىمەن كۇيرەتە جەڭگەن.
گەرمانيا - ارگەنتينا 1:0. نەگىزگى ۋاقىت - 0:0.
13 شىلدە. ريو-دە-جانەيرو. «ماراكانا» ستاديونى. تورەشى - نيكولا ريتستسولي (يتاليا).
گەرمانيا: مانۋەل نويەر, بەنەديكت حيوۆەدەس, ماتس حۋممەلس, جەروم بواتەنگ, فيليپپ لام, باستيان شۆاينشتايگەر, كريستوف كرامەر (اندرە شيۋررلە, 30), مەسۋت وزيل (پەر مەرتەزاكەر, 121), توني كرووس, توماس ميۋللەر, ميروسلاۆ كلوزە (ماريو گيوتتسە, 88).
ارگەنتينا: سەرحيو رومەرو, ەسەكەل گاراي, پابلو سابالەتا, مارتين دەميكەليس, ماركوس روحو, ەنتسو پەرەس (فەرناندو گاگو, 86), حاۆەر ماسكەرانو, لۋكاس بيليا, ەسەكەل لاۆەسسي (سەرحيو اگۋەرو, 46), ليونەل مەسسي, گونسالو يگۋاين (رودريگو پالاسيو, 77).
گول: ماريو گيوتتسە (113).
ەسكەرتۋلەر: باستيان شۆاينشتايگەر (28), بەنەديكت حيوۆەدەس (31), حاۆەر ماسكەرانو (63), سەرحيو اگۋەرو (64).
ءبىرىنشى تايم كوماندالاردىڭ بىردە-ءبىرىنىڭ باسىمدىلىعىن بايقاتپاعان تەڭ كۇرەس جاعدايىندا ءوتتى. كوپشىلىك كۇتكەندەي, ارگەنتينالىقتار بىردەن تاس ءتۇيىن قورعانىسقا كەتىپ قالماي, قارسىلاسىنا قارسى شابۋىل جاساپ تۇرۋعا كىرىستى. ال نەمىستەر ويىننىڭ العاشقى جارتى ساعاتىندا كريستوف كرامەردىڭ ورنىنا الاڭعا اندرە شيۋررلە شىققان كەزدەن شابۋىلدا بەلسەندىلىك كورسەتە باستادى. امەريكالىقتار داربازاسىنا جاسالعان ەڭ العاشقى ايرىقشا قاۋىپتى ءسات تايمعا قوسىلعان قوسىمشا ۋاقىتتا تىركەلدى.
الەحاندرو سابەليانىڭ شاكىرتتەرى ەكىنشى تايمنىڭ باسىندا شابۋىل شەبىن كۇشەيتۋگە باعىت ۇستادى. سول بويدا ولار ەسەپتە اشىپ كەتە جازدادى. بىراق قاقپاشى مانۋەل نويەرمەن بەتپە-بەت شىققان ليونەل مەسسي دوپتى قاقپا باعانىنىڭ جانىنان جىبەردى. بۇدان كەيىن ويىن شابۋىلدىڭ ەكپىنى ءبىرشاما باسىلدى. الايدا, كەسكىلەسكەن كۇرەس الاڭنىڭ ءار مۇيىسىندە ءجۇرىپ جاتتى. سونداي قالىپتاعى اعىمداردىڭ بىرىندە گونسالو يگۋاين نەمىس قاقپاشىسىمەن سوقتىعىسىپ قالدى. ناتيجەسىندە باسىنان قاتتى سوققى الدى. بۇل بىرنەشە مينۋتتان كەيىن ونىڭ ورنىنا رودريگو پالاسيونى شىعارۋعا اپارىپ جەتكىزدى.
وسىنداي ايقاسپەن كەزدەسۋدىڭ نەگىزگى ۋاقىتى دا اياقتالدى.
وۆەرتايمنىڭ باس جاعى الدىڭعى كەزەڭدەگى ويىنداردان كوپ وزگەرە قويعان جوق. ەكى جاق ءبىر-بىرلەرىنىڭ قادامدارىن تۇساۋلاي وتىرىپ, قارسى شابۋىل جاساۋعا كوبىرەك سۇيەندى. ەكىنشى ەكسترا-تايمدا نەمىس باستيان شۆاينشتايگەر كەزەكتى دوپقا تالاس تۇسىندا قاباعىن جارىپ الدى. سوعان قاراماستان, ول الاڭنان كەتپەي, ورشەلەنە وينادى. ونىڭ مۇنىسى كومانداعا قاتتى اسەر ەتتى. وسىدان جىگەر العان اندرە شيۋررلە مەن ماريو گيوتتسە قارسى قاپتالعا قاراي قۇيىنداي قۇلدىرادى. بۇلاردىڭ سوڭعىسى قارسى قاقپا الاڭى ىشىندە جۇگىرىپ كەلە جاتىپ, ارىپتەسىنەن العان دوبىن كەۋدەسىمەن تومەن قاراي تۇسىرە بەرىپ, قاقپاعا قاراي اتتى جىبەردى. اۋەلەي ۇشقان دوپ قاقپاعا قيالاپ بارىپ, كىردى دە كەتتى. ويىننىڭ 113-مينۋتىندا ەسەپ وسىلاي اشىلدى. ارگەنتينالىقتار قالعان ۋاقىت ىشىندە جانتالاسقان شابۋىلعا كوشتى. بىراق ولاردىڭ بارلىق قيمىلدارىن مانۋەل نويەر قيىپ تاستاپ تۇردى.
ءسويتىپ, نەمىستەر ءوزىنىڭ تاريحىندا ءتورتىنشى مارتە چەمپيون اتاندى. ولار مۇنداي اتاققا 1954 جىلى قول جەتكىزسە, كەيىنگىلەرىن 1974 جانە 1990 جىلدارى قول جەتكىزدى. سونىمەن بىرگە, بۋندەستيم امەريكا قۇرلىعىندا وتكەن چەمپيوندىقتى جەڭىپ العان ءبىرىنشى ەۋروپا قۇراماسى بولدى. امەريكا كونتينەنتىنىڭ كوماندالارى دا ەۋروپا قۇرلىعىندا وتكەن جاھان جارىسىندا ءبىر-اق رەت چەمپيون بولعان ەكەن. ونى 1958 جىلى ستوكگولمدە بىرىنشىلىكتە برازيليا جاساعان ەدى.
ءۇشىنشى ورىن ءۇشىن تالاس بۇدان ءبىر كۇن بۇرىن وينالدى. وندا برازيديانى 3:0 ەتىپ جەڭگەن گوللانديا قولا جۇلدەگەر اتاندى.
دامير قوجامقۇل.
دەرەككوز: egemen.kz.
فوتو: يتار-تاسس.
