استانا. 12 شىلدە. بۇگىن, ەرتەڭگە قاراعان ءتۇنى برازيليانىڭ استاناسى – برازيليا قالاسىنداعى ۇلتتىق ستاديوندا برازيليا جانە گوللانديا قۇرامالارى الەم چەمپيوناتىنىڭ قولا مەدالى ءۇشىن تالاسادى. استانا ۋاقىتى بويىنشا 2:00 ساعاتتا باستالاتىن ماتچقا الجيرلىك اربيتر دجامەل حايمۋدي قازىلىق ەتەدى.
قازىر ماماندار مەن جانكۇيەرلەر اراسىندا وسى ويىنعا قاتىستى ويلار مەن بولجامدار كوپ. برازيليا جارتىلاي فينالداعى ماسقارا جەڭىلىستەن كەيىن قايتا سەرپىلە الا ما؟ پەنالتيدەن ەسە جىبەرگەنى بولماسا, ءالى ەشكىمنەن ويىندا ۇتىلىپ كورمەگەن گوللانديانىڭ بۇل جولعى باعى قانداي بولماق؟ جەرگىلىكتى جانكۇيەرلەر پەنتاكامپيوندارعا قىزۋ قولداۋ كورسەتە الا ما؟ «قىزعالداقتار ەلىنىڭ» داڭقىن كوتەرۋگە روببەن مەن ۆان پەرسيدىڭ شامالارى جەتە مە؟ بۇل «جۇباتۋ فينالى» قارساڭىندا تۋىنداپ جاتقان مىڭداعان سۇراقتاردىڭ ءبىر مىسقالى عانا.
كەزدەسۋگە قىزمەت كورسەتەتىن 43 جاسار حايمۋدي مۋنديالدىڭ توپتىق ءتۋرنيرى كەزىندە اۆستراليا – گوللانديا جانە كوستا-ريكا – انگليا, ال ءبىرىنشى پلەي-وفف راۋندىندا بەلگيا مەن اقش كەزدەسۋلەرىنە تورەشىلىك ەتتى.
وزدەرىنىڭ تاريحىندا برازيليا مەن گوللانديا ءبىر-بىرىمەن 11 رەت كەزدەسكەن. قارسىلاستار 3 رەتتەن جەڭىسكە جەتىپ, 5 رەت تەڭ تۇسكەن. سوققان جانە وتكىزگەن دوپتاردىڭ ارا سالماعى دا تەڭ – 15:15. مۇنىڭ الدىندا وار-دا وتكەن 2010 جىلعى الەم چەمپيوناتىندا ولار شيرەك فينال دەڭگەيىندە ۇشىراستى. وندا گوللانديا 2:1 ەسەبىمەن جەڭىسكە جەتتى. ەسەپتى ءبىرىنشى تايمدا برازيليالىقتار اشتى. گولدى روبينو سالدى. ال ۋەسلي سنايدەردىڭ ەكىنشى تايمداعى ەكى گولى گوللانديالىقتارعا جەڭىس اپەردى. ءبىر قىزىعى, سول ماتچقا قاتىسقانداردان قازىرگى برازيليا قۇراماسى ساپىندا 3 ويىنشى بولسا, گوللانديا كومانداسىندا 6 فۋتبولشى بار. جالپى, چەمپيوناتتىڭ فينالدىق كەزەڭىندە ولار ءبىر-بىرلەرىمەن 4 رەت ۇشىراسقان. 1974 جىلى گوللانديالىقتار 2:0 ەتىپ ۇتسا, 1994 جىلى برازيليالىقتار 3:2 ەسەبىمەن باسىم تۇسكەن. بۇلاردىڭ سوڭعىسىندا كوماندالار جارتىلاي فينالدا شايقاستى.
ادەتتە قۇرامالار «جۇباتۋ فينالىنا» ونشالىقتى ءبىر ىنتامەن قاراي قويمايدى. قالاي دەگەندە دە, سەن ءۇشىنشى ورىن الدىڭ نە, ءتورتىنشى بولدىڭ نە – ايىرماشىلىق ونشاما كوپ ەمەس. سەبەبى, جارتىلاي فينالدا جولدان شىعىپ قالدىڭ. ال ەۋروپا چەمپيوناتىندا ءتىپتى ءۇشىنشى ورىن ءۇشىن ويىن دا وينالمايدى. بىراق بۇل جولعى كوڭىل كۇي بولەك سياقتى. وسىنىڭ الدىندا 1:7 بولىپ ويسىراي ۇتىلعان برازيليالىقتارعا ەندى وزدەرىن از دا بولسا اقتاۋ ءۇشىن قالايدا جەڭىس كەرەك. بۇعان قوسا, گوللانديالىقتار دا وڭايلىقپەن جەڭىلە سالايىن دەپ وتىرعان جوق. ونىڭ ۇستىنە «قىزعالداقتار ەلى» كومانداسى ءۇشىن چەمپيوناتتى جەڭىلىسسىز اياقتاۋدىڭ بىردەن-ءبىر مۇمكىندىگى تۋىپ تۇر.
كۇتىلىپ وتىرعانداي, برازيليا نەگىزىنەن وسى تۋرنيردە ويناپ جاتقان قۇرامىمەن الاڭعا شىعاتىن ءتۇرى بار. كولۋمبيامەن ويىندا اۋىر جاراقات الىپ قالعان نەيمار عانا الاڭعا شىعا المايدى. مۇنىڭ ەسەسىنە, ەسكەرتۋلەرى كوپتىگىنەن وتكەن جولى الاڭنان قاعىلعان كوماندا كاپيتانى تياگو سيلۆانىڭ جولى اشىق.
وسىنىڭ الدىندا ءتۋرنيردىڭ ەڭ ۇزدىك ويىنشىسى اتاعىنا ۇمىتكەرلەردىڭ ءتىزىمى جاريالاندى. بۇل قاتاردان برازيليا مەن گوللانديانىڭ ءبىر-بىردەن ويىنشىلارى كورىندى. اڭگىمە نەيمار مەن ارەن روببەن تۋرالى بولىپ وتىر. قازىر نەيماردىڭ ويناي المايتىنى ايان, ال روببەن ءوزىنىڭ جاعدايىن جاقسارتۋعا زور مۇمكىندىك العالى تۇر. دەگەنمەن, «التىن دوپتىڭ» ءوزىن فينالدىق ويىندا جاقسى قىرىنان كورسەتە بىلگەن باسقا ءبىر فۋتبولشىنىڭ الىپ كەتۋ ىقتيمالدىلىعى باسىمداۋ ەكەنى دە راس. سونىمەن قاتار, «ءتۋرنيردىڭ ەڭ ۇزدىك جاس ويىنشىسى» اتاعى نوميناتسياسىنا ءمۇدۋارلار قاتارىنا گوللانديالىق مەمفيس دەپاي دا ەنگەن. ەندى «قىزعىلت-سارىلاردىڭ» جاتتىقتىرۋشىلار شتابى جاس ويىنشىنىڭ ستارتتىق قۇرامنان الاڭعا شىعۋىنا جول بەرەدى دەگەن دە پىكىر ايتىلىپ جاتىر. جالپى, گوللانديا قۇراماسى بۇل تۋرنيردە ءوزىن كوماندالىق ءىس-قيمىلدا كۇشتى كوماندا رەتىندە تانىتتى. مۇندا ءوزىنىڭ ليدەرلەرى مەن جاس تالانتتارى دا بار. ال برازيليادا نەيماردىڭ ورنىن باساتىن ليدەر تابىلماي وتىر. بۇل تۇرعىدا سەلەساوعا تۋرنيردە رونالدينو مەن كاكا كومەككە كەلە الاتىن ەدى. الايدا, لۋيس فيليپە سكولاري ولاردى كومانداعا الۋدان ءۇزىلدى-كەسىلدى باس تارتتى. قازىر برازيليالىقتاردىڭ باس باپكەرىن جۇرت بۇلاردىڭ ورنىنا كومانداعا چەمپيوناتتا ءوزىن ەشقانداي قىرىنان تانىتا الماعان فرەدتى العانى ءۇشىن سىنعا الۋدا. بالكىم, سكولاري ءۇشىنشى ورىن ءۇشىن ويىندا جو اتتى شابۋىلشىنىڭ ءوزىن كورسەتۋىنە مۇمكىندىك جاسايتىن شىعار. ايتكەنمەن, برازيليالىقتار باس جاتتىقتىرۋشىسىنىڭ كۇرت وزگەرىس جاساۋعا اسا قۇشتار مامان ەمەس ەكەنىن ەسكەرسەك, ستارتتىق قۇرامنىڭ دىڭگەگى ساقتالىپ قالاتىنىن پايىمداۋعا بولاتىن سياقتى. بۇل ماتچتىڭ سكولاري ءۇشىن قۇراماداعى ەڭ سوڭعى ماتچ بولۋى تا ىقتيمال. بىراق, كىم نە دەسە دە, ويىنشىلار سكولاريدى وتە جاقسى كورىپ, قۇرمەت تۇتادى. سوندىقتان ولار ۇستازدارىن ۇياتقا قالدىرماۋ ءۇشىن بارىن سالۋعا ءتيىس. ەگەر لۋيس فيليپەنىڭ تاعدىرى ءالى تۇپكىلىكتى شەشىلمەگەن بولسا, لۋي ۆان گال ءۇشىن بۇل گوللانديا قۇراماسى تىزگىنىندەگى سوڭعى ماتچ بولماق. سەبەبى, تاجىريبەلى مامان وسىدان كەيىن بىردەن «مانچەستەر يۋنايتەد» كومانداسىنا باس جاتتىقتىرۋشى بولىپ بارادى.
سونىمەن, ءۇشىنشى ورىن ءۇشىن تالاستىڭ باستالاتىن شاعىنا تىم كوپ قالعان جوق.
ال ەرتەڭ, 13 شىلدە كۇنى تۇندە, ساعات 01:00-دە ريو-دە-جانەيروداعى «ماراكانا» ستاديونىندا چەمپيوناتتىڭ جابىلۋ ءراسىمى باستالادى. ول بىتكەننەن كەيىن گەرمانيا – ارگەنتينا اراسىنداعى فينالدىق ماتچ وينالادى. كەزدەسۋگە يتاليان اربيترى نيكولا ريتستسولي تورەشىلىك ەتەدى.
دامير قوجامقۇل.
