استانا. 12 شىلدە. الماتىدا AllurAuto كومپانياسى تاعى ءبىر جول تالعامايتىن كولىكتىڭ تۇساۋىن رەسمي تۇردە كەستى. بۇل تۋرالى «قازاقپارات» حابارلادى.
جانارماي قوزعالتقىشىنىڭ كولەمى 2.3, قۋاتى 150 ات كۇشىنە تەڭ جاڭا كولىكتىڭ قۇنى 23 700 اقش دوللارىنان, 28 300 اقش دوللارى ارالىعىندا.
SsangYong Nomad دەپ اتالاتىن اۆتوكولىك ليتسەنزيالى مەرسەدەس-بەنس قوزعالتقىشىمەن, زاماناۋي قاۋىپسىزدىك جۇيەسىمەن جابدىقتالعان.
قازاقستان اۆتوبيزنەس قاۋىمداستىعىنىڭ توراعاسى اندرەي لاۆرەنتەۆتىڭ ايتۋىنشا, بيىل وسى كولىكتىڭ 2400 داناسىن جاساپ شىعارۋ كوزدەلىپ وتىر. بۇل سان نارىقتاعى احۋال مەن سۇرانىسقا نەگىزدەلگەن.
اندرەي لاۆرەنتەۆ: «قازىرگى تاڭدا زاۋىتتا وسى جەلى بويىنشا 600 مامان جۇمىس ىستەيدى. ال 2017 جىلعا دەيىن قىزمەتكەرلەر سانى 2000 ادامعا دەيىن ارتادى دەپ جوسپارلانۋدا», – دەدى.
SsangYong Nomad – ەلىمىزدە ۇساق توراپتى تاسىلمەن ءارى 30 پايىزدىق تۇيىقتاۋ ارقىلى وندىرىلگەن العاشقى جوبا.
قوستاناي زاۋىتىنىڭ باسقارما توراعاسى الەكسەي سيدورەنكو: «2018 جىلعا قاراي كەدەن وداعى شەڭبەرىندە بولشەك ءوندىرىسىنىڭ ارتۋىنا بايلانىستى تۇيىقتاۋدى 50 پايىزعا جەتكىزۋدى جوسپارلاپ وتىرمىز», – دەدى.
AllurAuto كومپانياسى اتالعان كولىكتەردى 2015 جىلى رەسەي, ازەربايجان, بەلارۋس ەلدەرىنە ەكسپورتتاۋدى جوسپارلاپ وتىر.
ا.لاۆرەنتەۆ: «وسىدان ءتورت جىل بۇرىن ەلىمىزدە الەمدىك برەندتەردى تارتۋعا مۇمكىندىك بەرەتىن اۆتوكولىك يندۋسترياسىنىڭ دامۋىنا ەكىنىڭ ءبىرى سەنە بەرمەيتىن. بۇگىندە قازاقستاننىڭ جاڭا يندۋستريالدى دامۋ كوشىنىڭ قارساڭىندا تۇرعاندىعىنا ءوزىمىز كۋا بولىپ وتىرمىز. SsangYong Nomad – بۇل تەك العاشقى قادام. الدا ءبىزدى جارقىن بولاشاق كۇتىپ تۇر», – دەدى.
جولدىباي بازار.
دەرەككوز: «قازاقپارات».
فوتو: «قازاقپارات».
