رۋحاني ءىس-شارا ەكىنشى دۇنيەجۇزىلىك سوعىسقا قاتىسقان قاھارماندار ەسىمىن ناسيحاتتاۋ, جاس ۇرپاققا بەيبىتشىلىكتىڭ قادىرىن ءتۇسىندىرۋ, ولاردى ادامگەرشىلىككە, وتانىن سۇيۋگە, پاتريوتيزمگە تاربيەلەۋدى ماقسات تۇتتى. زيالى قاۋىم وكىلدەرى مەن كىتاپحانا وقىرماندارى قاتىسقان پاتريوتتار كەشى «قالامگەردىڭ شوقتىعى بيىك شىعارمالارى» كىتاپ كورمەسىمەن باستالدى. كورمە سوعىس ارداگەرى, قازاق ادەبيەتىندەگى دەتەكتيۆ جانرىنىڭ نەگىزىن قالاعان بەلگىلى جازۋشى كەمەل توقاەۆتىڭ 100 جىلدىق مەرەيتويىنا ارنالدى.
كىتاپ كورمەسىندە وقىرمان نازارىنا كورنەكتى قالامگەردىڭ كىتاپتارى جانە كىتاپحانا قورىنا بيىل تۇسكەن 5 تومدىق جانە 2 تومدىق شىعارمالار جيناعى ۇسىنىلدى. كىتاپحانا قىزمەتكەرلەرى جينالعاندارعا كەمەل توقاەۆتىڭ ەڭبەك جولىنا, سونىڭ ىشىندە جامبىل وبلىسىندا اتقارعان قىزمەتىنە, سۇراپىل سوعىس جىلدارىنداعى ومىرىنە, قازاق ءباسپاسوز سالاسىنداعى جەمىستى جۇمىسىنا, ادەبيەت كوكجيەگىن كەڭەيتكەن شىعارماشىلىق شارتارابىنا كەڭىنەن توقتالىپ, كورمەنىڭ ءبىر اي بويى وقىرمان نازارىنا ۇسىنىلاتىنىن ايتتى. سونىمەن قاتار مۇنداي كىتاپ كورمەلەرى كورنەكتى جازۋشى قىزمەت ەتكەن شىمكەنتتەگى ءال-فارابي كىتاپحاناسىندا, قىزىلورداداعى ءا.تاجىباەۆ اتىنداعى وبلىستىق كىتاپحانادا جانە جەتىسۋ وبلىسىنداعى س.سەيفۋللين اتىنداعى ورتالىق كىتاپحاناسىندا ءوتىپ جاتقاندىعىن جەتكىزدى.
پاتريوتتار كەشىندە ءسوز العان زيالى قاۋىم وكىلدەرى عاسىرلار قويناۋىنان باستاۋ الاتىن ۇلتتىق بولمىس, قانعا سىڭگەن باتىلدىق پەن باتىرلىق, تىلداعى جانقيارلىق قاجىر-قايرات ەكىنشى دۇنيەجۇزىلىك سوعىس جىلدارىندا جەڭىس تۋىن جەلبىرەتۋگە سەپتىگىن تيگىزگەندىگىن اتاپ وتسە, جاس ورەندەر بەيبىتشىلىكتىڭ اق تاڭىن, تاۋەلسىزدىكتىڭ ءتاۋ ەتەر قادىرىن جىرعا قوستى.
كىتاپحانادا وتكەن پاتريوتتار كەشى ءار وقىرمانعا وي تاستاعان يگىلىكتى ءىس-شارا رەتىندە ۇزاق ەستە قالاتىنى انىق.
جامبىل وبلىسى
