ستالينگراد شايقاسى كەزىندە فاشيست ۇشاقتارى قازاق جەرىندەگى جانىبەك, سايقىن, شوڭاي تەمىرجول ستانسالارىن بىرنەشە مارتە بومبالاپ, بەيبىت تۇرعىندار دا قازا تاپتى.
– ءبىزدىڭ ءوڭىر سوعىس كەزىندە مايدان شەبىندەگى ايماق رەتىندە جەڭىسكە زور ۇلەس قوستى. مايداندا اتالارىمىز جاۋمەن الىسسا, تىلدا انالارىمىز ايانباي ەڭبەك ەتتى. سول ءبىر قيىن كەزەڭدە ارىن – بايراق, نامىسىن – نايزا ەتكەن ەرلەردىڭ قاھارماندىعى اڭىزعا اينالدى. وسى قاسيەتتى جەڭىس كۇنى ادالدىق پەن ەلىنە دەگەن جانقيارلىقتىڭ ۇلگىسىن كورسەتكەن قاھارمانداردىڭ رۋحى الدىندا باس ءيىپ, تاعزىم ەتەمىز! – دەدى باتىس قازاقستان وبلىسىنىڭ اكىمى ناريمان تورەعاليەۆ سالتاناتتى ءىس-شارادا سويلەگەن سوزىندە.
مەرەكەلىك جيىن وبلىستىڭ بارلىق اۋدان-اۋىلدارىندا ءوتتى. وبلىس ورتالىعىنىڭ وزىندە ەكى اپتالىق ءىس-شارالار تىزبەگى جوسپارلانىپ, كەڭ كولەمدە اتقارىلدى. جيىلعان قاۋىم ماڭگىلىك الاۋعا گۇل شوقتارىن قويىپ, سوعىس جىلدارىندا قازا تاپقان جاۋىنگەرلەردىڭ رۋحىنا تاعزىم ەتتى.
جەڭىس كۇنى ورال قالاسىندا مانشۇك, ءاليا جانە حيۋاز بەينەلەنگەن «قازاق حالقىنىڭ داڭقتى قىزدارى» ەسكەرتكىشى الاڭىنا, كەڭەس وداعىنىڭ باتىرى تەمىر ماسين ەسكەرتكىشىنە جانە «ول كۇندەردىڭ داڭقى وشپەيدى» مونۋمەنتىنە گۇل شوقتارى قويىلدى. سونداي-اق سوعىس كەزىندە ورال قالاسىندا بولعان اسكەري گوسپيتالدا قايتىس بولعان جاۋىنگەرلەر جەرلەنگەن «باۋىرلاستار زيراتىنا» دا تاعزىم جاسالدى.
مەرەكەلىك ءىس-شارالار اياسىندا اتقارۋشى بيلىك وكىلدەرىنىڭ تىل ارداگەرلەرىمەن كەزدەسۋى, كوزى ءتىرى سوعىس ارداگەرلەرىن ءوز ۇيىنە بارىپ سالتاناتتى تۇردە قۇتتىقتاۋ ءىس-شارالارى ءوتتى. تاسقالا اۋدانىندا «ازالى انا» مونۋمەنتى كۇردەلى جوندەۋدەن كەيىن قايتا اشىلدى. ورال قالاسىندا باتىس قازاقستان وبلىسىنىڭ ارداگەرلەرى اراسىندا ۆوكالدى توپتاردىڭ «مايدان اندەرى» اتتى وبلىستىق ءان بايقاۋى ءوتتى. قازاق كۇرەسى, اۋدارىسپاق, تەڭگە ءىلۋ, ۇزاق قاشىقتىققا جۇگىرۋ, الامان بايگە, تاي جارىسى, توعىزقۇمالاق سەكىلدى ۇلتتىق ويىندار, جاسوسپىرىمدەر اراسىندا كوگالداعى حوككەي ءتۋرنيرى, كاراتەدەن (WKF) كەڭەس وداعىنىڭ باتىرى م.مامەتوۆانىڭ ەسكە الۋعا ارنالعان «Aqjaiyq Open» حالىقارالىق ءتۋرنيرى سەكىلدى كوپتەگەن سپورتتىق سايىستار دا ۇيىمداستىرىلدى.
ايتا كەتەيىك, بۇگىندە باتىس قازاقستان وبلىسىندا 16 سوعىس ارداگەرى قالدى. ولاردىڭ 13-ءى ورال قالاسىندا تۇرادى.
باتىس قازاقستان وبلىسى
