ورالدا كەدەن وداعىنا مۇشە مەملەكەتتەردىڭ كەدەنشىلەرى باس قوستى

استانا. 12 شىلدە. كەدەن وداعىنا قاتىسۋشى ەلدەردەگى كەدەن قىزمەتى بىرلەسكەن القاسى جانىنداعى جۇمىس توبىنىڭ ساراپشىلارى ورال قالاسىندا كەزدەستى. بۇل تۋرالى i-news.kz حابارلادى. باسقوسۋدا ەۋرازيالىق ەكونوميكالىق وداقتىڭ كەدەندىك كودەكسىن ازىرلەۋ كەزىندە تاۋەكەلدەردى باسقارۋ جۇيەسى تالقىلاندى. بۇدان بولەك, جيىنعا قاتىسۋشىلار اتالمىش ەكونوميكالىق قۇرىلىم اۋماعىندا تاۋارلاردى تاسىمالداۋ كەزىندەگى زاڭ بۇزۋشىلىقتارمەن كۇرەسۋ شارالارىن ءبىر ىزگە ءتۇسىرۋ جانە كەپىلدىك تەتىكتەرىن دامىتۋ جولدارىن قاراستىردى. بيىل قازاقستان مەن كەدەن وداعىنا مۇشە ەلدەر اراسىنداعى تاۋار اينالىمىنىڭ كولەمى 24 ميلليارد دوللارعا جەتكەن. بۇل سالادا ەكسپورتتىق تاۋارلاردىڭ ۇلەسى كوبەيە تۇسكەن. ەستەرىڭىزگە سالا كەتەيىك, 2011 جىلدىڭ 1 شىلدەسىنەن باستاپ قازاقستان, بەلارۋس جانە رەسەي فەدەراتسياسى اراسىندا كەدەندىك كودەكس ەنگىزىلگەن بولاتىن. جولدىباي بازار. دەرەككوز: i-news.kz. فوتو: i-news.kz.