اقپاراتتار اعىنى

● ۇستىمىزدەگى جىلى مونو­قالالاردى دامىتۋعا 1,4 ملرد. تەڭگە قارجى جۇمسالادى. ونى «قازاگرو» ۇلتتىق باسقارۋشى حولدينگى» اق ەنشىلەس كومپانياسى – «اۋىل شارۋاشىلىعىن قارجىلاي قولداۋ قورى» اق ءبولىپ وتىر. ال باعدارلامانىڭ وسى ەلدى مەكەندەر تۇرعىندارىن جۇمىسپەن قامتۋعا باعىتتالعان باسىمدىعى بويىنشا رەس­پۋب­ليكالىق بيۋدجەتتەن 1,9 ملرد. تەڭگە ءبولۋ جوسپارلانعان. ● ەگىستىكتەردى شەگىرتكەدەن قورعاۋ ماقساتىندا 440 مىڭ گەكتاردى قوسىمشا ءوڭ­دەۋ ءۇشىن پرەپاراتتار ءبو­لىن­دى. اۋىل شارۋاشىلىعى مي­نيسترلىگى اگروونەركاسىپتىك كە­شەندەگى مەملەكەتتىك ينسپەك­تسيا كوميتەتىنىڭ توراعاسى ساق­تاش حاسەنوۆتىڭ ايتۋىنشا, جاب­دىقتار شەگىرتكەلەردىڭ رەسەيدەن قازاقستانعا ترانسشەكارالىق اۋىسۋىنا بايلانىستى قوستاناي وبلىسىندا – 400 مىڭ, اقتوبە وبلىسىندا 40 مىڭ گەكتار القاپتى وڭدەۋ ءۇشىن الىنادى. ● وڭتۇستىكتە 2,3 ملن. تۇر­عىن اۋىز سۋمەن قامتاماسىز ەتىلدى. «اق بۇلاق» باعدارلاماسى اياسىندا 929 ەلدى مەكەننىڭ 665-ءى, ياعني 71,5 پايىز بولىگى ورتالىقتاندىرىلعان اۋىز سۋ قۇبىرىنا قوسىلدى. بيىلعى جىلى باعدارلاما بويىنشا 8,6 ملرد. تەڭگە قارجى ءبولىنىپ, تاعى 29 نىساننىڭ قۇرىلىس جۇمىستارى جۇرگىزىلۋدە. ● استانالىق وقۋشىلار كەشە «بايتەرەك» مونۋمەنتى­نىڭ الدىندا ولەڭ وقىدى. شا­رانى ۇيىمداستىرۋشىلار حابار­لاعانداي, مۇنىڭ «جاس كوشباسشى مەكتەبى» باعدار­لا­ماسىنىڭ وزىندىك شەشۋشى ەمتيحانى بولىپ تابىلاتىنىن ايتتى. ونىڭ ماقساتى بالالاردى ءومىر سىندارىنان وتۋگە جانە تاۋەلسىز قالىپ ۇستاۋعا ۇيرەتۋ بولىپ تابىلادى. ● ورالدا «قاراعاندى» اتتى كەمە سۋعا ءتۇسىرىلدى. كە­شە قالاداعى شاعان وزەنىنىڭ جاعا­سىندا «ايبار» جوباسى بويىنشا شەكارا قىزمەتىنىڭ تاپسىرىسى بويىنشا جاسالعان جىلدام جۇرەتىن «قاراعاندى» كۇزەت كاتەرىن سۋعا ءتۇسىرۋ ءراسىمى بولدى. وندا وبلىس اكىمى نۇرلان نوعاەۆ اتاپ وتكەندەي, بۇل – «ورال «زەنيت» زاۋىتى» اق مەملەكەتتىك تاپسىرىسقا سايكەس جاساپ شىعارعان 22-ءشى كەمە. ● قىزىلوردا قالاسىندا ايتىسكەر اقىن مۇحتار نيا­زوۆقا ءۇش بولمەلى پاتەر بەرىلدى. «التىن دومبىرا» يەگە­رى اتانعان شىعارماشىلىق يەسى­نە جاڭا قونىستىڭ كىلتىن تابىس ەتكەن وبلىس اكىمى قىرىم­بەك كوشەرباەۆ رۋحاني قۇن­دى­لىقتاردى بيىككە كوتەرۋشى تۇلعالارعا ۇدايى قامقورلىق جاسالىپ تۇراتىنىن جەتكىزدى. ● استانا كوشەسىندە شەكىل­دەۋىك شاققاندار 10 تاۋلىك­كە قامالدى. ەلوردانىڭ قا­لا­لىق سوتى مۇنداي شەشىمدى تارتىپكە باعىنباعان 60-تان اس­تام ادامعا قاتىستى شىعاردى. «تاربيەلىك ءمانى بار وسىنداي اشىق سوت پروتسەستەرىن ەندى جوعارى وقۋ ورىندارىندا ءجيى وتكىزىپ تۇراتىن بولامىز», – دەدى مامانداندىرىلعان اۋدانارالىق سوت سۋدياسى قانات يماناليەۆ وسىعان وراي. حابارلار «قازاقپارات», Egemen.kz اگەنتتىكتەرى مەن وبلىستىق اكىمدىكتەر سايتتارىنىڭ دەرەكتەرى بويىنشا دايىندالدى.