ءانۋار ءالىمجانوۆ كوشەسىندەگى 40 جانە 20 پاتەرلىك جالگەرلىك تۇرعىن ءۇيدىڭ كىلتىن وبلىس اكىمى بەيبىت يساباەۆ تابىس ەتتى. جەتىسۋلىقتارعا جۇرەكجاردى لەبىزىن جولداپ, كەشىگىپ بەرىلگەنىنە كەشىرىم دە سۇرادى.
«تۇرعىن ۇيمەن قامتاماسىز ەتۋ – حالىقتىڭ ءومىر ءسۇرۋ ساپاسىن كوتەرۋدەگى ەڭ باستى ماسەلەلەردىڭ ءبىرى. پرەزيدەنتتىڭ الدىمىزعا قويىپ وتىرعان ۇلكەن تالابى دا وسى. سوندىقتان مەملەكەتتىك باعدارلامالاردىڭ ارقاسىندا ءبىز قازىر وسى ماسەلەگە ەرەكشە نازار اۋدارىپ, قولعا الىپ وتىرمىز. قازىر تالدىقورعان قالاسىندا تۇرعىن ءۇي كەزەگىندە 15 مىڭداي ادام تۇر. ادىلدىكپەن, اشىقتىقپەن جۇمىس ىستەي وتىرىپ, ولاردى كەزەك رەتى بويىنشا الداعى بىرنەشە جىلدا باسپانامەن قامتۋ ءۇشىن قۇرىلىس قارقىنىن جىلدامداتىپ, تۇرعىن ءۇي سالۋ كولەمىن ارتتىراتىن بولامىز, دەدى ب.يساباەۆ.
سوڭعى ەكى جىلدا وڭىردە تۇرعىن ءۇي قۇرىلىسى باسەڭدەپ, ءۇي بەرۋ ءبىرشاما كەشەۋىلدەگەنى بەلگىلى. ايتسە دە ونىڭ ءوز سەبەبى بار. قۇرىلىس جۇرگىزگەن مەردىگەرلەردىڭ جاۋاپسىزدىعى, باستاعان قۇرىلىستى اياقسىز قالدىرۋى, كوروناۆيرۋس ىندەتى سياقتى تۇيتكىلدەر ءىستىڭ سوزىلىپ كەتۋىنە باستى سەبەپ بولدى. ونىڭ ۇستىنە كەزەكسىز ءۇي بەرۋدىڭ كوپتەگەن فاكتىسى ورىن العانى دا كوپكە ءمالىم. قازىر زاڭسىز بەرىلگەن ۇيلەردى سوت ارقىلى قايتارىپ الۋ جۇمىستارى ءجۇرىپ جاتىر
«نۇرلى جەر» باعدارلاماسىمەن تۇرعىزىلعان بۇل ۇيگە كەزەكتەگى 60 تۇرعىن قول جەتكىزدى. ولاردىڭ دەنى كوپبالالى جانە تولىق ەمەس وتباسىلار, مۇمكىندىگى شەكتەۋلى جاندار مەن وسىنداي بالا اسىراپ وتىرعان وتباسىلار, جەتىم بالالار, اۋعان سوعىسىنىڭ ارداگەرلەرى جانە باسقا دا الەۋەمەتتىك وسال توپقا جاتاتىن ازاماتتار.
جاڭا باسپاناعا كىرگەندەر اتىنان مۇگەدەك بالا اسىراۋشى وتباسىنان اقمارال الشىنباەۆا, تولىق ەمەس وتباسى ساناتىنداعى نازگۇل بەيسەنبەكوۆا, باسقا دا قونىستوي يەلەرى مەملەكەتتەن جاسالىپ وتىرعان قامقورلىق ءۇشىن ريزاشىلىقتارىن ءبىلدىرىپ, باسپاناعا يە بولعان كورشىلەرىنە ىزگى تىلەكتەرىن جەتكىزدى.
وبلىس اكىمى بەيبىت يساباەۆ زەينەتكەر شامشامانۋ ابەۋوۆا مەن كوپبالالى بەيىسبەكوۆتەر شاڭىراعىنا كىرىپ, ءدام تاتىپ, تەلەديدار سىيعا تارتتى.
«وتاعاسى تىلەۋلى ەكەۋمىز الپىس جىلدان استام بىرگە عۇمىر كەشىپ كەلەمىز. اقسۋ اۋدانىندا ۇزاق جىل پەداگوگيكا سالاسىندا جۇمىس ىستەدىم. ەڭبەگىم ەلەۋسىز قالعان جوق, شۇكىر. بەس ۇل, ءبىر قىز تاربيەلەپ وسىردىك. ەكى بالام ءوزىمنىڭ جولىمدى قۋىپ, مۇعالىم بولدى. بۇگىن ۇلكەن قۋانىشقا جەتىپ وتىرمىز. وسىنداي جاقسى جاڭالىقتار كوپ بولا بەرسىن. ەل ىرگەسى امان, ءوسىپ كەلە جاتقان بالا-شاعانىڭ ءومىرى جارقىن بولسىن دەپ تىلەيمىن, دەدى ءبىلىم سالاسىندا ۇزاق جىل ەڭبەك ەتكەن زەينەتكەر, ء«بىلىم سالاسىنىڭ ۇزدىگى» شامشامانۋ ابەۋوۆا.
ايتا كەتەيىك, بۇل ۇيلەردىڭ قۇرىلىسىن «قۇرىلىسشى تبس» جشس مەردىگەر كومپانياسى 2021 جىلدىڭ جەلتوقسانىندا سالىپ بىتىرگەن. بىراق اباتتاندىرۋمەن اينالىسۋعا ءتيىس باسقا كومپانيانىڭ جاۋاپسىزدىعىنان ءۇيدى پايدالانۋعا بەرۋ كەشەۋىلدەپ, جۇمىستاردىڭ اياقتالۋى كۇنى بۇگىنگە دەيىن سوزىلعان.
«بۇل ۇيلەردىڭ قۇرىلىسىن 2021 جىلعى مامىردا باستاپ, سول جىلدىڭ سوڭىندا اياقتادىق. قۇرىلىس ساپاسى وتە جاقسى دەپ سەنىممەن ايتا الامىن. جوبادا مۇمكىندىگى شەكتەۋلى ازاماتتارعا ارنالعان جينالمالى ەلەكتروندى پاندۋس قاراستىرىلماعان بولاتىن. بىراق وبلىس اكىمىنىڭ تاپسىرۋىمەن ءبىز ون كۇننىڭ ىشىندە ءوز قاراجاتىمىزعا سول پاندۋستى قويىپ بەرەمىز», دەدى قۇرىلىس كومپانياسىنىڭ وكىلى مارات ءىلياسوۆ.
وبلىس اكىمنىڭ ءباسپاسوز قىزمەتىنىڭ مالىمەتىنشە, قولدانىسقا بەرىلگەن 20 پاتەرلىك ۇيدە 5 ەكى بولمەلى, 15 ءۇش بولمەلى پاتەر بولسا, 40 پاتەرلىك ۇيدە 10-ى – ءبىر بولمەلىك, 10-ى ەكى بولمەلىك, 20-سى – ءۇش بولمەلىك پاتەرلەر. بۇل ۇيلەردى سالۋعا «نۇرلى جەر» باعدارلاماسى بويىنشا 722 ملن تەڭگە ءبولىنىپ, يگەرىلگەن.
جالپى, ءوڭىر كولەمىندە بيىل 321,9 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. سول قاتاردا جىل سوڭىنا دەيىن تالدىقورعان قالاسىندا 51 تۇرعىن ءۇي قولدانىسقا بەرىلەدى. سونىڭ 42-ءسى جەرگىلىكتى بيۋدجەتتەن سالىنسا, قالعانىن جەكە كاسىپكەرلەر مەن مەتسەناتتار ءوز قاراجاتتارىنا تۇرعىزىپ جاتىر. ءسويتىپ, ءبىر جىلدا 2 مىڭعا جۋىق تالدىقورعاندىق وتباسى باسپانالى بولادى.
جەتىسۋ وبلىسى
