جەڭىس كۇنى قارساڭىندا ورالدىڭ «التىن وردا» مادەنيەت ۇيىندە ەرەكشە سايىس ءوتتى. باتىس قازاقستان وبلىسىنىڭ ءار تۇكپىرىنەن كەلگەن ۆوكالدى توپتار اعا بۋىن انشىلەردەن – اق جاۋلىقتى اجەلەردەن, اق سامايلى اعالاردان قۇرالعان ەكەن. ولار وزدەرىنە ەتەنە تانىس مايدان اندەرىن شىرقاپ جارىستى. بۇل ءىس-شارانى باتىس قازاقستان وبلىستىق ارداگەرلەر ۇيىمى قولداپ, ورال قالاسىنىڭ مادەنيەت جانە تىلدەردى دامىتۋ بولىمىنە قاراستى «مادەني-اعارتۋ» بىرلەستىگىنىڭ «جۇلدىز» جانە «شۇعىلا» كوميۋنيتي ورتالىقتارى ۇيىمداستىردى.
– سۇراپىل سوعىس جىلدارى 76 635 باتىسقازاقستاندىق مايدانعا اتتانسا, ونىڭ 36 548-ءى ەلگە ورالمادى. اقجايىق وڭىرىنەن 40 ادام – كەڭەس وداعىنىڭ باتىرى, 6 ادام «داڭق» وردەنىنىڭ تولىق كاۆالەرى اتاندى. ورال قالاسىندا بىرنەشە اسكەري گوسپيتال اشىلىپ, ينستيتۋت, ونەركاسىپ ورىندارى كوشىپ كەلدى. وردا, جانىبەك اۋداندارى تىل ەمەس, مايداننىڭ ءبىر بولىگىنە اينالدى. سوندىقتان بۇل سوعىس باتىسقازاقستاندىقتار ءۇشىن ەتەنە جاقىن, ەرەكشە قاسيەتتى. ءار اۋلەتتى اينالىپ وتپەگەن بۇل قاسىرەت قايتالانباسىن! توي تويلاپ ەمەس, وي ويلايتىن, اتا-بابا رۋحىنا تاعزىم ەتەتىن بۇل كۇن بەيبىتشىلىك پەن اۋىزبىرشىلىكتىڭ قادىر-قاسيەتىن ەرەكشە تۇسىنەتىن ساباق بولسىن. قازاق قاشاندا ونەرىمەن, كۇيىمەن, انىمەن رۋحىن كوتەرگەن عوي, – دەدى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ بايقاۋدىڭ اشىلۋ سالتاناتىندا.
وبلىستىق قوعامدىق دامۋ باسقارماسىنىڭ باسشىسى ءنۇردىلدا وراز بەن وبلىستىق ارداگەرلەر ۇيىمىنىڭ توراعاسى ماقسوت بەرگەن دە قاتىسۋشىلارعا ساتتىلىك تىلەدى. مايدان اندەرى بايقاۋىنا قالالىق ىرىكتەۋ كەزەڭىنەن وتكەن جانە اقجايىق, سىرىم, قازتالوۆ, تاسقالا, تەرەكتى, بايتەرەك, جانىبەك اۋداندارىنان كەلگەن 18 ۆوكالدى توپ قاتىناستى. سايىس شارتى بويىنشا ولار ەكىنشى دۇنيەجۇزىلىك سوعىس تاقىرىبىنداعى ءبىر ءان جانە حالىق اندەرىنەن ءبىر ءان ورىندادى.
بايقاۋعا مادەنيەت سالاسىنىڭ ارداگەرى, «قۇرمەت» وردەنىنىڭ يەگەرى, قازاقستاندىق سالالىق مادەنيەت, سپورت, تۋريزم جانە اقپارات قىزمەتكەرلەرىنىڭ كاسىپتىك وداعىنىڭ باتىس قازاقستان وبلىستىق فيليالى توراعاسى ايدار باتىرحانوۆ, قازاقستان كومپوزيتورلار وداعىنىڭ مۇشەسى, كسرو-نىڭ ۇزدىك مادەنيەت قىزمەتكەرى, اقجايىق اۋدانىنىڭ قۇرمەتتى ازاماتى, سازگەر عۇبايدوللا حيباشەۆ, ع.قۇرمانعاليەۆ اتىنداعى فيلارمونيا ءانشىسى, قازاقستان كومپوزيتورلار وداعىنىڭ مۇشەسى, «ەرەن ەڭبەگى ءۇشىن» مەدالىنىڭ يەگەرى, مادەنيەت سالاسىنىڭ ۇزدىگى, سىرىم اۋدانىنىڭ قۇرمەتتى ازاماتى جاسكەلەڭ عايساعاليەۆ, ع.قۇرمانعاليەۆ اتىنداعى فيلارمونيا ءانشىسى, قازاقستاننىڭ ەڭبەك سىڭىرگەن قايراتكەرى مۇرات ءامىرحانوۆ, اۋعان سوعىسىنىڭ ارداگەرى, ينتەرناتسيوناليست جاۋىنگەر بەركىنعالي عابدەلوۆ, وبلىستىق حالىق شىعارماشىلىعى ورتالىعىنىڭ جەتەكشى مامانى, مادەنيەت قايراتكەرى ەسەنگەلدى مولداعاليەۆ, مادەني-اعارتۋ بىرلەستىگى ديرەكتورىنىڭ ورىنباسارى بەكەي قاناتوۆ قازىلىق ەتتى.
وتە تارتىستى وتكەن ءان بايقاۋىندا باس جۇلدە «ارداگەر» كلۋبىنىڭ «اعالار اۋەنى» حالىقتىق ۆوكالدىق توبىنا بۇيىردى. قازىلار القاسىنىڭ شەشىمىمەن تەرەكتى اۋدانىنان كەلگەن «ياپۋراي» اجەلەر ءانسامبلى – ءبىرىنشى ورىنعا, قازتالوۆ اۋدانى قاراوبا اۋىلىنىڭ «اجەلەر شۋاعى» ءانسامبلى ەكىنشى ورىنعا يە بولدى. جۇلدەلى ءۇشىنشى ورىندى «بايتەرەك» كوميۋنيتي ورتالىعىنىڭ «جايىق تولقىندارى» ۆوكالدى توبى جەڭىپ الدى.
بايقاۋدا جۇلدەرى ورىن الماسا دا ەرەكشە كوزگە تۇسكەن توپتار دا سىيلىقتان قۇر قالمادى. سىرىم اۋدانىنىڭ «اق تىلەۋ» ۆوكالدىق ءانسامبلى – كەڭەس وداعىنىڭ باتىرى ءاليا مولداعۇلوۆا اتىنداعى ارنايى جۇلدەگە, «ارداگەر» كلۋبىنىڭ حالىقتىق «اجە سالەمى» ۆوكالدىق توبى – كەڭەس وداعىنىڭ باتىرى مانشۇك مامەتوۆا اتىنداعى ارنايى جۇلدەگە, جانىبەك اۋدانىنان كەلگەن «اقنيەت» ءانسامبلى حالىق قاھارمانى حيۋاز دوسپانوۆا اتىنداعى ارنايى جۇلدەگە يە بولدى.
سونداي-اق ۆوكالدى توپتاردىڭ مۋزىكا سۇيەمەلدەۋشىلەرى, وزگە دە قاتىسۋشى ۆوكالدى توپتار العىسحاتتارمەن ماراپاتتالدى.
باتىس قازاقستان وبلىسى
