ەلىمىزدە وسىنداي ونعا جۋىق ۇلكەندى-كىشىلى گارنيزون بار دەسەك, جاۋىنگەرلىك تاپسىرماسى بويىنشا بەتكە تۇتار بريگادانىڭ ءبىرى – 12740 اسكەري ءبولىمى. گارنيزوندا بارلىق جاعداي جاسالعان, اسكەريلەر تۇرعىن ۇيمەن قامتاماسىز ەتىلەدى. جالاقىسى جوعارى. سوندىقتان ازاماتتاردى اسكەرگە كەلىسىمشارتپەن قىزمەت ەتۋگە شاقىرادى. اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى, پودپولكوۆنيك نۇرعالي اقىلباەۆتىڭ ايتۋىنشا, مۇندا قازىرگى تاڭدا 1500-دەن استام اسكەري قىزمەتكەر بار. ولاردىڭ 600-دەن استامى جىلىنا 2 رەت, جاز بەن كۇزدە شاقىرىلىپ, ازاماتتىق بورىشىن وتەپ جاتقان مەرزىمدى اسكەري قىزمەتكەر. قالعان مىڭعا جۋىق اسكەريدى وفيتسەر مەن كەلىسىمشارتپەن جۇمىس ىستەيتىن مامان قۇرايدى.
قازىر جوعارى سىنىپ وقۋشىلارىنا پاتريوتتىق تاربيە بەرۋ ءىسى جولعا قويىلعان. سوعان وراي اسكەري ءبولىمنىڭ ماماندارى كەربۇلاق اۋدانىنداعى ورتا مەكتەپتەرگە ارنايى بارىپ, كەزدەسۋلەر ۇيىمداستىرادى. وندا وتانشىلدىق پەن تۋعان جەردى قورعاۋدىڭ ماڭىزدىلىعى ءتۇسىندىرىلىپ, ازاماتتىق بورىشىن وتەپ, اسكەري قىزمەتتەن وتكەن جاستاردىڭ جوعارى وقۋ ورىندارىنا تۇسەتىنى ايتىلادى.
«بۇل شەشىم قورعانىس مينيسترلىگى مەن جوعارى وقۋ ورىندارىمەن جاسالعان مەموراندۋم نەگىزىندە قولعا الىنىپ كەلەدى. مىنە, وسىنداي جۇمىستاردىڭ ارقاسىندا ەلىمىزدى قورعاۋ ىسىنە قۇشتارلىق تانىتىپ وتىرعان جاستاردىڭ قاتارى كوبەيگەن, – دەگەن پودپولكوۆنيك نۇرعالي اقىلباەۆ گارنيزوننىڭ ەرەكشەلىگىن اتاپ ءوتتى. – سونىمەن قاتار اۋدان مەكتەپتەرىندەگى 10-11-سىنىپ وقۋشىلارى 12740 اسكەري بولىمىنە ارنايى كەلىپ, اسكەري ومىرمەن تانىسىپ تۇرادى. جاقىندا عانا «اشىق ەسىك كۇنىنە» كەلگەن «العاشقى اسكەري دايىندىق» ءپانىنىڭ وقۋشىلارى كازارماعا كىرىپ, جاۋىنگەرلەردىڭ جاتار ورنىن, اسحاناسىن, دايىندىق ساباقتارى وتەتىن كابينەتتەردى, قارۋ-جاراقتى, قۇرال-جابدىقتى, اسكەري تەحنيكا مەن ترانسپورتتى تاماشالادى. بىزگە كەلەتىن جاستاردىڭ باسىم بولىگىنىڭ بويىنان وتانسۇيگىشتىكتى, اسكەري ومىرگە دەگەن قۇلشىنىس پەن تالپىنىستى بايقاۋعا بولادى. ءتىپتى ازاماتتىق بورىشىن اتقارۋعا دەگەن ۇمتىلىستارى ەرەكشە».
ەلىمىزدە اسكەرگە شاقىرۋدىڭ كوكتەمگى ناۋقانى باستالعالى بەرى كەربۇلاق اۋداندىق قورعانىس ىستەرى جونىندەگى بولىمىندە ازاماتتاردى اسكەري قىزمەتكە شاقىرۋ جۇمىستارى قىزۋ ءجۇرىپ كەلەدى. بۇگىندە بىرقاتار ازاماتتى اسكەر قاتارىنا شىعارىپ سالدى. بۇعان دەيىن ءبىرتالاي بوزبالا ازاماتتىق بورىشىن ويداعىداي وتەپ, ءتىپتى العاشقى لەگى ۇلتتىق قاۋىپسىزدىك كوميتەتىنىڭ شەكارا قىزمەتى جانە ۇلتتىق ۇلان ساپىنا جولدانعان.
«بۇل ءراسىم ءبىز ءۇشىن ەرەكشە ءسات. مەديتسينالىق زەرتتەۋلەردەن ءوتىپ, ىرىكتەلىپ الىنعان جاستار اسكەرگە اتتاندى. ەندى قازاقستان قارۋلى كۇشتەرىنىڭ اسكەري قۇرىلىم بولىمدەرىندە مەرزىمدىك اسكەري بورىشىن وتەيدى. بولاشاق ساربازداردى شىعارىپ سالۋعا ولاردىڭ اتا-انالارى مەن تۋىسقاندارى قاتىسىپ, وتان قورعاۋشى ۇلدارىنا ءوز لەبىزدەرىن ءبىلدىرىپ, ءسات-ساپار تىلەدى», دەيدى سارىوزەك گارنيزونى ءباسپاسوز قىزمەتىنىڭ باستىعى, مايور ابزال سارتاەۆ.
ونىڭ ايتۋىنشا, بۇگىنگى تاڭدا اتالعان اسكەري ءبولىمنىڭ جەكە قۇرامى جاۋىنگەرلىك ءداستۇردى ۇستانا وتىرىپ, جاۋىنگەرلىك ازىرلىكتى ۇدايى شىڭداپ, قىراعىلىقپەن جاۋىنگەرلىك مىندەتتەرىن اتقارىپ, بەيبىت ەلدىڭ تىنىشتىعىن كۇزەتۋدە. سونداي-اق اۋدانداعى ورتا مەكتەپتەردىڭ «جاس سارباز» اسكەري-پاتريوتتىق قوزعالىسىنىڭ جۇمىستارىنا ارالاسىپ, «ەرلىك ساباقتار» مەن «اشىق ەسىك» كۇنى سياقتى كوپتەگەن ءىس-شارا وتكىزىپ, اسكەردىڭ تاريحىن, جاۋىنگەرلىك داستۇرلەرىن ناسيحاتتاۋ ارقىلى جاستارعا پاتريوتتىق تاربيە بەرىپ كەلەدى.
«قازىر اسكەرگە بارۋعا نيەت بىلدىرگەن جاستاردىڭ قاتارى جىلدان-جىلعا ارتىپ كەلەدى. بۇل دەگەن جاقسى جەتىستىك. قازىر اسكەرگە بارعان ازاماتتارعا ءبىرشاما جەڭىلدىك بار. ويتكەنى اسكەرگە بارعاندار وتان الدىنداعى بورىشىن وتەپ قانا قويماي, جوعارى وقۋ ورىندارىنا تۇسۋگە مول مۇمكىندىك الادى. اسكەر قاتارىندا قىزمەت ەتىپ, وتان الدىنداعى پارىزىن وتەۋگە ءاربىر ازامات مىندەتتى, سەبەبى تۋعان جەردى, ەلدى, اتامەكەندى قورعاۋ – قاسيەتتى بورىش», دەدى كەربۇلاق اۋداندىق قورعانىس ىستەرى جونىندەگى ءبولىم باستىعى, پودپولكوۆنيك بولات وماروۆ.
جالپى, گارنيزون جىل سايىن ءبىر توپ ساربازبەن قوشتاسىپ جاتسا, ارتىنان تاعى ءبىر توپ جاسپەن تولىعىپ جاتادى. بۇل – مۇنداعى ماماندار ءۇشىن ۇيرەنشىكتى وقيعا. كۇنى كەشە ءداستۇر بويىنشا شابۋىلداۋ بريگاداسىندا بەلگىلەنگەن قىزمەتىن ابىرويمەن وتەگەن 200-دەن اسا ساربازدى شىعارىپ سالۋ ءراسىمى ءوتتى. ءبىز دە اتالعان ءىس-شاراعا ارنايى بارىپ قاتىسىپ, ساربازدارمەن تىلدەسىپ قايتتىق.
وسىدان ءبىر جىل اسكەر قاتارىنا ەلىمىزدىڭ ءار وڭىرىنەن شاقىرىلعان جاۋىنگەرلەر ءبىر مىندەتتەن قۇتتىلعانداي كەۋدەلەرىن ەركىن كوتەرىپ, وتانعا دەگەن سەزىمدەرىن ەسەلەي تۇسكەندەي جايدارى كوڭىل-كۇيدە. ولار ءبىر جىل بويى اسكەري ماماندىقتى مەڭگەرىپ, جاۋىنگەرلىك دايارلىقتا ەلەۋلى ناتيجەلەرگە قول جەتكىزگەن. سونداي-اق مىنەزدەرىن شىڭداپ, اسكەري ءتارتىپتى ۇيرەنىپ, كوماندادا جۇمىس ىستەۋدى ىسكە اسىردى. زاپاسقا شىعارىلعان ساربازدارعا قۇرمەت كورسەتۋ ءىس-شاراسى اسكەري ءبولىمنىڭ ساپتىق الاڭىندا ۇيىمداستىرىلدى. وعان باق وكىلدەرىنەن بولەك, اسكەري قىزمەتشىلەر مەن قارۋلى كۇشتەردىڭ ارداگەرلەرى قاتىستى.
سالتاناتتى جيىندا بريگادا كومانديرى, پودپولكوۆنيك داۋلەت سەكەنوۆ جەكە قۇرامدى ماڭىزدى ءىس-شارامەن قۇتتىقتاپ, ءسوز سويلەدى. ونىڭ ايتۋىنشا, زاپاسقا شىعارىلعان ساربازدار ءبىر جىل ىشىندە ەگەمەن ەلىمىزدىڭ تىنىشتىعى مەن قورعانىسىن قامتاماسىز ەتىپ, تۇتاستىعىن ساقتاۋعا ءوز ۇلەستەرىن قوسقان. وسى ءۇشىن ارنايى العىسىن دا ءبىلدىردى. سونىمەن قاتار جاۋىنگەرلىك دايارلىق كەزىندە جوعارى كورسەتكىشتەرگە قول جەتكىزگەن ەڭ ۇزدىك ساربازدار ماقتاۋ قاعازدارى جانە العىسحاتتارمەن ماراپاتتالدى. ءتىپتى جاۋىنگەرلەردىڭ اتا-انالارىنا دا العىس حاتتار جولداندى. ءىس-شارا بارىسىندا ساربازدار ساپتىق ادىممەن ورتاعا شىعىپ, ءبولىمنىڭ جاۋىنگەرلىك تۋىمەن قوشتاستى. ولارعا ءبىر جىلدىڭ كولەمىندەگى اسكەري ءىس-شارالار مەن وقۋ-جاتتىعۋلارىنان ەستەلىك رەتىندە فوتوالبومدار تاراتىلدى. بىرقاتار ۇزدىك ساربازعا ارنايى دايىندالعان تۋ استىنداعى فوتوسۋرەتتەر سالتاناتتى تۇردە تابىس ەتىلدى.
«مىنە بۇگىن ءبىر جىلدىق اسكەري قىزمەتىمىز اياقتالدى. ءبىز وتان الدىنداعى بورىشىمىزدى ابىرويمەن اتقاردىق دەپ سانايمىن. ءبىزدى جوعارى جاۋىنگەرلىك دايارلىق پەن اسكەري تارتىپكە ۇيرەتىپ, ارقاشان قولداۋ كورسەتكەن وفيتسەرلەر مەن سەرجانتتارعا ايتار العىسىم مول. بولاشاق جاستاردى وتان الدىنداعى مىندەتتەرىن وتەپ, ايبىندى اسكەرىمىزدە قىزمەت ەتۋگە شاقىرامىن», دەدى اسكەري بورىشىن اياقتاعان سارباز ەفرەيتور جاندوس الماسوۆ.
وتان قورعاۋ – ءاربىر قازاقستان ازاماتىنىڭ قاسيەتتى پارىزى. ءوزىن ازاماتپىن دەپ سانايتىن, كەۋدەسىندە ار-نامىسى, بويىندا جىگەرى, جۇرەگىندە وتى بار ءاربىر جان ءۇشىن بۇل ەڭ باستى مىندەت ەكەنىن ۇمىتپاعان ءجون.
جەتىسۋ وبلىسى
