ەل كولەمىندە ۇيىمداستىرىلىپ وتىرعان اكتسيانىڭ ماقساتى ايقىن. اتالعان ءىس-شارا ارقىلى قارۋلى قىلمىستاردىڭ سانىن مۇمكىنگىنشە ازايتۋعا ۆەدومستۆو تاراپىنان ايرىقشا نازار اۋدارىلىپ وتىر. ءتارتىپ ساقشىلارى كەلتىرگەن دەرەكتەرگە سەنسەك, بەس جىلدىڭ بەدەرىندە ەلىمىزدەگى قارۋلى قىلمىستاردىڭ سانى 50 پايىزعا تومەندەگەن. اكتسياعا قاتىسۋشىلاردىڭ قاراسى بيىل دا قالىڭ. وڭىردەگى زاڭسىز ساقتالعان قارۋ-جاراقتى ساتىپ الۋعا بيىل 10 ملن 404 مىڭ تەڭگە قارجى قاراستىرىلىپ وتىر.
ء«ىس-شارا باستالعاننان بەرى ءوڭىر تۇرعىندارىنان پوليتسيا قىزمەتكەرلەرىنە 9 ءوتىنىش كەلىپ ءتۇستى. جالپى سوماسى 900 مىڭ تەڭگەدەن استام قاراجاتقا 12 اتىس قارۋى مەن 3 پاترون تاپسىرىلدى. ونىڭ ىشىندە 2 قارۋ – 6,5 مم كاليبرلى تاپانشا جانە 5,6 مم كاليبرلى مىلتىق. ودان بولەك 10 تەگىس ۇڭعىلى مىلتىق جانە 6,5 مم كاليبرلى 3 پاترون بار», دەيدى جامبىل وبلىسى پوليتسيا دەپارتامەنتى اكىمشىلىك پوليتسيا باسقارماسىنىڭ ەرەكشە تاپسىرمالار جونىندەگى اعا ينسپەكتورى, پوليتسيا پودپولكوۆنيگى شۋحراتجون يۋلداشەۆ.
كەيىنگى جىلدارى تۇراقتى تۇردە ۇيىمداستىرىلىپ كەلە جاتقان اكتسياعا بەلسەندى قاتىسۋشىلاردىڭ سانى ۋاقىت وتكەن سايىن سيرەيتىنگە ۇقسامايدى. قۇقىق بۇزۋشىلىقتىڭ الدىن الۋعا ارنالعان ءىس-شارا جەمىسىن بەرىپ وتىر. ءبىر بەلگىلىسى, تىركەلمەگەن قارۋدى پوليتسيا قىزمەتكەرلەرىنە تاپسىرعان ازاماتتار 34 مىڭ تەڭگەدەن 345 مىڭ تەڭگەگە دەيىنگى ارالىقتا تولەماقى الماق.
ىشكى ىستەر مينيسترلىگى ءباسپاسوز قىزمەتىنىڭ حابارلاۋىنشا, وتكەن جىلى ەل تۇرعىندارىنان 1400 اتىس قارۋى مەن 10 مىڭنان استام وق-ءدارى ساتىپ الىنىپتى. زاڭسىز ساقتالعان قارۋدى وتكىزگەن ازاماتتارعا جالپى سوماسى 89 ملن تەڭگە كولەمىندە تولەماقى تولەنگەن. ال بيىل قازاقستان ازاماتتارى قانشا قارۋ-جاراق وتكىزەتىنى جىل سوڭىندا ناقتىلانباق.
«زاڭسىز ساقتالعان اتىس قارۋىن, وق-دارىلەردى, جارىلعىش زاتتاردى اقشالاي سىياقى ءۇشىن تاپسىرۋعا نيەت بىلدىرگەن ازامات تۇرعىلىقتى جەرى بويىنشا پوليتسيا بولىمىنە ءوتىنىش بەرە الادى. سىياقىلاردىڭ مولشەرىن قۇرىلعان كوميسسيالار ايقىندايدى. ەرىكتى تۇردە تاپسىرعانى ءۇشىن تولەم كولەمى قارۋدىڭ تۇرىنە, ونىڭ تەحنيكالىق جاي-كۇيىنە بايلانىستى جانە ءار دانا ءۇشىن دەربەس ەسەپتەلەدى. ءوڭىر تۇرعىندارى وسىنى قاپەردەن شىعارماسا ەكەن», دەيدى ش.يۋلداشەۆ.
جامبىل وبلىسى
