MADFA Madrid Film Awards – 2023 جىل سايىن تانىمال رەجيسسەرلار ەڭ ۇزدىك تۋىندىلاردىڭ باسىن قوساتىن حالىقارالىق بايقاۋ. مادريد كينوجۇلدەسى بيىل 20-مارتە وتكىزىلىپ وتىر. بۇل بايقاۋعا 1500 انيماتسيالىق جۇمىس ۇمىتكەر رەتىندە ۇسىنىلعان. سولاردىڭ ىشىنەن «بەسىك جىرى» قىسقامەتراجدى انيماتسيالىق ءفيلمى توپ جارىپ, «ەڭ ۇزدىك قىسقامەتراجدى انيماتسيالىق فيلم» جۇلدەسىن جەڭىپ الدى.
ايتا كەتسەك, انيماتسيالىق فيلم مادەنيەت جانە سپورت مينيسترلىگىنىڭ قولداۋىمەن تۇسىرىلگەن.
«قازاقستاندىق انيماتسيالىق ءفيلمنىڭ بەدەلدى حالىقارالىق بايقاۋدىڭ باس جۇلدەسىن يەلەنگەنى – وتاندىق انيماتسيا سالاسىنىڭ وڭ باعىتتا دامىپ كەلە جاتقانىنىڭ كورسەتكىشى دەپ ساناۋعا بولادى. مادەنيەت جانە سپورت مينيسترلىگى 2030 جىلعا دەيىن جالپى پروكاتتاعى قازاقستاندىق فيلمدەردىڭ, ونىڭ ىشىندە انيماتسيالىق فيلمدەردىڭ ۇلەسىن 35%-عا دەيىن ارتتىرۋدى جوسپارلاپ وتىر. ول ءۇشىن جىل سايىن كەمىندە 10 انيماتسيالىق جوبا جاسالاتىن بولادى. وتكەن جىلى ەلىمىزدە العاش رەت «قازاقانيماتسيا» شىعارماشىلىق بىرلەستىگى قۇرىلدى. اتالعان ۇيىم وتاندىق انيماتسيا ماماندارىنىڭ شەبەرلىگىن شىڭداپ, انيماتسيالىق جوبالاردى شىعارۋعا قولداۋ كورسەتەدى», دەدى مادەنيەت جانە سپورت ءمينيسترى اسحات ورالوۆ.
