قازاقستان حالقىنىڭ بىرلىگى كۇنى اياسىندا ترياتلون ساياباعىندا ءتۇرلى ەتنوس وكىلدەرىنىڭ قاتىسۋىمەن ءداستۇرلى تۇردە اعاش وتىرعىزىلىپ, سالاۋاتتى ءومىر سالتى ناسيحاتتالىپ, جۇگىرۋدەن ەستافەتا ءوتتى.
«مەملەكەت باسشىسى قاسىم-جومارت توقاەۆ قازاقستان حالقى اسسامبلەياسى ءحححىى سەسسياسىنىڭ وتىرىسىندا ساياسي مودەرنيزاتسيالاۋ جانە ەتنوسارالىق كەلىسىمىنىڭ ءرولىن ايرىقشا اتاپ وتكەن ەدى. مىنە بۇگىن سول ءىس-شارا جالعاسىن تاۋىپ جاتىر. بۇگىنگى مەرەكەگە وراي بۇل جارىس العاش رەت ۇيىمداستىرىلىپ جاتىر», دەدى استانا قالاسى اكىمىنىڭ ورىنباسارى ەسەت بايكەن.
جارىسقا 300-دەن استام اۋەسقوي سپورتشى جينالىپ, 500 مەتر, 2,5 كم جانە 5 شاقىرىم بويىنشا جۇگىردى. سالتاناتتى ءىس-شارانىڭ سوڭىندا قاتىسۋشىلاردىڭ ءبارى ارنايى مەدالدارمەن ماراپاتتالدى.
«بۇگىن ءبىز قازاقستان حالقىنىڭ بىرلىگى كۇنىن اتاپ ءوتىپ جاتىرمىز. ەلىمىزدە قوعامدىق كەلىسىمدى ساقتاۋ, ۇلتتىق بىرلىكتى نىعايتۋ ەل بولاشاعىنىڭ تابىستى كەپىلى بولىپ قالا بەرەتىنى انىق. مەرەكە كۇنى سىزدەرگە جانە وتباسىلارىڭىزعا زور دەنساۋلىق, تابىس جانە كوكتەمگى كوڭىل-كۇي تىلەيمىن!», دەدى «ۆايناح» شەشەن-ينگۋش ەتنومادەني بىرلەستىگى» قوعامدىق بىرلەستىگىنىڭ توراعاسى باشير سولسانوۆ.
ايتا كەتەيىك, قازاقستان حالقىنىڭ بىرلىگى كۇنىنە وراي اپتا باسىنان بەرى استانا قالاسىندا 70-كە جۋىق ءىس-شارا ۇيىمداستىرىلدى, ولاردىڭ كوپشىلىگى ەلوردا تۇرعىندارى مەن قوناقتارىنا مەرەكەلىك كوڭىل-كۇي سىيلاۋ ءۇشىن اشىق الاڭداردا وتكىزىلدى.
بۇگىن ەلوردانىڭ ءتورت الاڭىندا شىعارماشىلىق ۇجىمدار مەن قالا ارتىستەرىنىڭ قاتىسۋىمەن كونتسەرتتىك باعدارلامالار ءوتىپ جاتىر. مەرەكەلىك كونتسەرت, تەاترلاندىرىلعان كورىنىستەر, تسيرك كورسەتىلىمدەرى, بالالارعا ارنالعان ءىس-شارالار, سپورتتىق شارالار جانە ساۋدا جارمەڭكەسى سارىارقا اۋدانىنداعى قالالىق الاڭدا, ەسىل جانە نۇرا اۋداندارى تۇرعىندارى ءۇشىن بايتەرەك مونۋمەنتى ماڭىندا, الماتى اۋدانىندا بەيبىتشىلىك جانە كەلىسىم سارايى جانىنداعى امفيتەاتردا, بايقوڭىر اۋدانى تۇرعىندارى ءۇشىن جازۋشىلار اللەياسى الاڭىندا ءوتىپ جاتىر.
