دۇنيەجۇزىلىك ەڭبەكتى قورعاۋ كۇنى قارساڭىندا باتىس قازاقستان وبلىستىق ەڭبەك ينسپەكتسياسى بويىنشا باسقارما باسشىسى اسىلۇلان دوسجانوۆ وسىنداي دەرەكتەردى جاريا ەتتى.
«ەلدىڭ ورنىقتى دامۋى كوبىنەسە ەڭبەك رەسۋرستارىنىڭ جاي-كۇيىنە بايلانىستى. سوندىقتان جازاتايىم وقيعالاردىڭ الدىن الۋ جانە قىزمەتكەرلەردىڭ ەڭبەك جاعدايى قاۋىپسىز بولۋىن ۇنەمى قاداعالايمىز», دەيدى اسىلۇلان تۇرسىن ۇلى.
ماسەلەن, 2022 جىلى ەڭبەك ينسپەكتورلارى «قاۋىپسىز ەڭبەك» اكتسياسى اياسىندا 50-دەن استام ونەركاسىپتىك جانە قۇرىلىس نىسانىن تەكسەرگەن. بايقالعان كەمشىلىكتەر بويىنشا جۇمىس بەرۋشىلەرگە ەسكەرتۋ بەرىلگەن. ەسەپتەرى بويىنشا ءبىرشاما ادامعا ەڭبەك قاۋىپسىزدىگى جانە ەڭبەكتى قورعاۋ ماسەلەسى بويىنشا ءتۇسىندىرۋ جۇمىسى ءجۇرىپتى.
بۇگىندە باتىس قازاقستان وبلىسى كاسىپورىندارىندا 428 وندىرىستىك كەڭەس بار ەكەن. ولار وندىرىستىك جاراقاتتانۋدىڭ الدىن الۋ ماقساتىندا جۇمىس ورنىنداعى ەڭبەك جاعدايىنا تەكسەرۋ جۇرگىزە الادى.
سونداي-اق وبلىستاعى بەلگىلى «ورال تازا سەرۆيس», «كۇبىلەي», ورال «زەنيت» زاۋىتى, «قازارماپروم», «كاما تسەنتر», «№1 نان زاۋىتى», «يسكون», «ستەكلو-سەرۆيس», «اگران», «ورال ترانسفورماتور زاۋىتى» سىندى 10 كاسىپورىن «حالىقتىق باقىلاۋ» جوباسىن ەنگىزدى. ال 183 كاسىپورىندا ەڭبەك قاۋىپسىزدىگى جانە ەڭبەكتى قورعاۋ بويىنشا OHSAS 18001, موت-سۋوت ستاندارتتارى ەنگىزىلدى. 35 كاسىپورىن ەڭبەك جاعدايى بويىنشا اتتەستاتتاۋدان وتسە, «Vizion Zero» تۇجىرىمداماسىن قولداۋ ماقساتىندا وبلىستىڭ 85 ۇيىمى رەسمي سايتتا «كومپانيا» رەتىندە تىركەلدى.
«جۇرگىزىلىپ جاتقان پروفيلاكتيكالىق ءىس-شارالارعا قاراماستان, وتكەن جىلى وبلىستا وندىرىستىك جاراقات سانى ءوستى», دەيدى ەڭبەك ينسپەكتسياسىنىڭ باسشىسى. جازاتايىم وقيعالار سانى 10 پايىزعا كوبەيگەن. سونىڭ ىشىندە 7 وقيعا كەزىندە 20 قىزمەتكەر زارداپ شەككەن. بۇل توپتىق جازاتايىم وقيعا سانى دا ارتقانىن كورسەتەدى.
ساراپتاپ قاراساق, 18 جازاتايىم وقيعا بيۋدجەتتىك ۇيىمداردا بولىپتى, 26 ادام زارداپ شەككەن. مۇناي ونەركاسىبىندە بولعان 9 وقيعادان 10 ادام ءتۇرلى جاراقات العان. ەنەرگەتيكا سالاسىندا – 9 ادام, قۇرىلىس سالاسىندا – 7 ادام, ماشينا جاساۋ سالاسىندا – 5 ادام, اۋىل شارۋاشىلىعىندا – 4 ادام, شاعىن كاسىپ ۇيىمدارىندا – 3 ادام, كوممۋنالدىق شارۋاشىلىق كاسىپورىندارىندا – 3 ادام, اۆتوكولىك سالاسىندا – 1 ادام, باسقا دا سالالاردا 3 ادام زارداپ شەگىپتى. جازاتايىم وقيعالار مۇناي-گاز, ەنەرگەتيكا جانە قۇرىلىس سالاسىندا كوبەيىپ كەتكەن.
باتىسقازاقستاندىقتار كوبىنە جول كولىك وقيعالارىنان, بيىكتەن قۇلاپ نەمەسە ەلەكتر توعىنا سوعىلىپ زارداپ شەگەدى ەكەن.
ا.دوسجانوۆتىڭ ايتۋىنشا, قۇرىلىس سالاسىنداعى وقىس وقيعالاردىڭ دەنى جۇمىستى دۇرىس ۇيىمداستىرماۋدان, اقاۋلى تەحنيكانى پايدالانۋدان, ەڭبەك قاۋىپسىزدىگىن ناشار وقىتۋدان جانە زارداپ شەگۋشىلەردىڭ ءوز بەيقامدىعىنان بولادى ەكەن.
ارينە, ءاربىر جازاتايىم وقيعا جان-جاقتى تەكسەرىلىپ, جۇمىس بەرۋشىنىڭ نەمەسە زارداپ شەگۋشىنىڭ كىناسى انىقتالادى. سوعان سايكەس ءتيىستى شەشىم شىعارىلادى.
وسىنداي ساراپتاما ناتيجەسىندە باتىس قازاقستان وبلىسىندا بولعان جازاتايىم وقيعالاردىڭ سەبەپ-سالدارى انىقتالدى. كوز سالايىق: 21 ادام جۇمىس ءوندىرىسى وتە ناشار ۇيىمداستىرىلعاندىقتان وقىس وقيعاعا ۇشىرادى. جول ەرەجەسى بۇزىلعاننان – 18 ادام, جابىرلەنۋشىنىڭ ورەسكەل ابايسىزدىعىنان – 16 ادام, قاۋىپسىز ەڭبەك تاسىلدەرىن وقىتۋداعى كەمشىلىكتەر سالدارىنان – 10 ادام, ەڭبەك قاۋىپسىزدىگى جانە ەڭبەكتى قورعاۋ ەرەجەلەرى بۇزىلعان سەبەپتى – 4 ادام, اقاۋلى ماشينالاردى, مەحانيزمدەر مەن جابدىقتاردى پايدالانعاننان 2 ادام زارداپ شەككەن.
بيىل ەڭبەك ينسپەكتورلارى «قاۋىپسىز ەڭبەك» اكتسياسى شەڭبەرىندە وبلىستىق كاسىپوداقپەن, سونداي-اق «Amanat» پارتياسىمەن بىرلەسىپ, جۇمىسكەرلەردىڭ ەڭبەك جاعدايىمەن تانىسۋ ماقساتىندا ونەركاسىپتىك جانە قۇرىلىس ۇيىمدارىن ارالاۋدى جالعاستىرىپ وتىر. مەملەكەتتىك باعدارلاما بويىنشا كوپپاتەرلى تۇرعىن ۇيلەر سالىپ جاتقان «التاير سك-7», «بولاشاق-ت» كومپانيالارى تەحنيكا قاۋىپسىزدىگى ەرەجەلەرىنىڭ قاراپايىم نورمالارىن ساقتاماي وتىرعانى انىقتالعان. كەيبىر جۇمىسشىلار جوعارعى قاباتتاردا قاۋىپسىزدىك بەلدىگى مەن قورعانىس كاسكاسىنسىز جۇمىس جۇرگىزگەنى, قۇرىلىس اۋماعى ارناۋلى لەنتامەن قورشالماعانى بەلگىلى بولعان. ول كومپانيا باسشىلارىنا كەمشىلىكتەردى جويۋ جونىندە ۇسىنىس بەرىلگەن.
«جازاتايىم وقيعا كوبىنە قانداي دا ءبىر تەحنوگەندىك قۇبىلىستان ەمەس, جۇمىس بەرۋشى تاراپىنان باقىلاۋ بولماي, قىزمەتكەر قاۋىپسىزدىك تەحنيكاسىن ساقتاماعاندا, جەكە قورعانىش قۇرالدارى مەن ارنايى كيىممەن قامتاماسىز ەتىلمەگەندە, تاعى باسقا ادامي فاكتورلارمەن بايلانىستى بولىپ جاتاتىنى وكىنىشتى», دەيدى ا.دوسجانوۆ.
سوندىقتان ەڭبەك قۇقىعىن قورعاۋ ماسەلەسىنە بارلىق قوعامدىق ينستيتۋت, جەكە ازامات تا اتسالىسۋى قاجەت-اق.
باتىس قازاقستان وبلىسى
