بالەت الەمىندە يرجي كيلياندى حورەوگرافيا كەمەڭگەرى دەپ اتايدى. ونىڭ سپەكتاكلدەرىن قويۋ – كەز كەلگەن تەاتر ءۇشىن ابىروي بولسا, ال بالەت ترۋپپاسى ءۇشىن – ۇلكەن شەبەرلىك مەكتەبى. دەمەك, كورنەكتى ەۋروپالىق حورەوگرافتىڭ كلاسسيكالىق قيمىل-قوزعالىستىڭ جوعارى ستاندارتتارىنا ساي قويىلعان ۇزدىك جۇمىسى ماحاببات تۋرالى ۇزدىك قويىلىم عانا ەمەس, تەاتر رەپەرتۋارى ءۇشىن دە زور تابىس ەكەنى داۋسىز. الەمدىك بالەت جۇلدىزى, «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆانىڭ باستاماسىمەن قويىلعان حورەوگرافيالىق عالامات تۋىندى بالەتسۇيەر قاۋىم ءۇشىن تاماشا تارتۋ بولارى انىق.
– مەن «استانا وپەرادا» كلاسسيكادان باستاپ نەوكلاسسيكاعا دەيىن بالەت تاريحىندا بولعان ۇزدىك شىعارمالاردى كورسەتكىم كەلەدى. بالەتتە ءبىرتۇتاس باعىتتىڭ نەگىزىن قالاعان يرجي كيليان ءوز ءداۋىرىنىڭ ەڭ كەمەڭگەر حورەوگرافى سانالادى. زامانىمىزدىڭ بالەتمەيستەرلەرىنىڭ جاڭا ساڭلاقتار توبى ءدال سودان باستالادى. مەن وسىعان دەيىن تەاترىمىزدا يرجي كيلياننىڭ قويىلىمدارى كورسەتىلسە ەكەن دەپ ارماندايتىنمىن. ونىڭ ويلى بالەتتەرى كوپ, ايتسە دە ەڭ تانىمالدارى – «التى بي» مەن «كىشكەنتاي ءولىم». ارمانىم ورىندالىپ, «التى ءبيىن» بىلتىر تەاترىمىزدىڭ ساحناسىندا قويدىق, ەندى مىنە, رەپەرتۋارىمىز «كىشكەنتاي ولىممەن» تولىقپاق. بۇلار «اق-قارا ءتۇستى» بالەتتەر توپتاماسىنا جاتقىزىلادى, سەبەبى اتالعان سپەكتاكلدەردە ءتۇرلى-ءتۇستى كوستيۋمدەر مەن دەكوراتسيالار جوق, – دەپ التىناي اسىلمۇراتوۆا الداعى قويىلىمنىڭ ەرەكشەلىگىن اتاپ ءوتتى.
بەكزات ونەر باعالاۋشىلارىنىڭ ەسىندە بولسا, بىلتىر ناۋرىز ايىندا «استانا وپەرا» ساحناسىندا چەح حورەوگرافىنىڭ «التى بي» بالەتىنىڭ تۇساۋكەسەرى زور تابىسپەن وتكەن بولاتىن. ءازىل-وسپاق سيۋجەتتىك قايشىلىقتارعا ەمەس, تازا حورەوگرافياعا نەگىزدەلگەن كومەديالىق بالەتتىڭ سيرەك كەزدەسەتىن وزگەشە ءتۇرىن ەلوردالىق ونەرسۇيەر قاۋىم ىستىق ىقىلاسپەن قابىلدادى.
ايتۋلى قويىلىمدا نيدەرلاند بي تەاترىنىڭ بالەتمەيستەرى ءارى پرەمەرى ستەفان جەرومسكي يرجي كيلياننىڭ اسسيستەنتى بولادى. كوركەمدىك-قويىلىم ءبولىمىنىڭ جەتەكشىسى رەتىندە تاڭدالعان يۋست بيگەلار بالەتتى جارىق, دەكوراتسيا جانە كوستيۋممەن كوركەمدەيدى. «كىشكەنتاي ءولىمنىڭ» باستى ەرەكشەلىگى – قويىلىمدا قارا جۇمساق دەكوراتسيالار مەن روليكتەردەگى جىلجىمالى كرينولين كويلەكتەر قولدانىلادى. بارلىعى مينيماليستىك ستيلدە, اق-قارا تۇسكە قۇرىلعان. قويىلىم سونىسىمەن دە ەرەكشە.
دەمەك, سەزىمگە قۇرىلعان بالەتتىڭ ايتۋلى پرەمەراسى بەكزات ونەر جانكۇيەرلەرى ءۇشىن, شىن مانىندە, ۇلكەن جاڭالىق بولارى ءسوزسىز.
